Hoʻolale a ka ʻŪkiu

Hoʻolale a ka ʻŪkiu:

Kā J. W. H. I. Kihe Hoʻoilina Moʻolelo

He pāhana ʻo Hoʻolale a ka ʻŪkiu i hoʻomohala ʻia me ke kākoʻo o ka ʻaelike Uku Hoʻoponopono no ke Ala ʻo Kaʻahumanu. I pāhana hoʻi ia e kālele ana ma ka hoʻoilina moʻolelo ʻāina a ko Kona, Hawaiʻi mea kākau a paʻa moʻolelo ʻo John Waile Heremon Isaac Kihe. Ua hānau ʻia ia paʻa moʻolelo ma Kalaoa, Kona, Hawaiʻi ma ka makahiki 1853. Nāna i hoʻopuka i nā moʻolelo o Kamiki, Mākālei, a me “Na Hoonanea o ka Manawa” ma ka nūpepa ʻōlelo Hawaiʻi ʻo Ka Hoku o Hawaii. Mai ia mau kākau ʻana āna i hoʻomohala ʻia ai he mau kumuwaiwai moʻolelo ʻāina hou no ka poʻe kumu a haumāna mai ka pae kula haʻahaʻa i ke kulanui, i mea hoʻi e hoʻākea ʻia ai ka ʻike ʻāina a ʻōlelo Hawaiʻi o ko Hawaiʻi poʻe. He mau māhele hoʻomohala ko ka pāhana: he puke, he pelaha, he haʻawina, a he noiʻi palapala ʻāina o nā Kona kekahi.