Ua hoʻokumu ʻia ka Hale Kuamoʻo e ka ʻAhaʻōlelo o ka Mokuʻāina ʻo Hawaiʻi i ka makahiki 1989 e kākoʻo a e paipai ʻia ai ke ola ʻana o ka ʻōlelo Hawaiʻi he ʻōlelo mana o ka hoʻonaʻauao, pāʻoihana, aupuni, a me nā pōʻaiapili ʻē aʻe o ka nohona o Hawaiʻi a ma ʻō  aku. He kahua kohu loa ia e paʻa ai nā mākau ʻoihana i nā haumāna muapuka a mulipuka o Ke Kulanui o Hawaiʻi ma Hilo. ʻOiai he māhele noiʻi a lawelawe ia o Ka Haka ʻUla o Keʻelikōlani, lawelawe ʻia nā hui a kula kaiaʻōlelo, kaiapuni, kākoʻo ʻōlelo Hawaiʻi, a me ka poʻe ʻōiwi keu hoʻi ma ʻAmelika ʻĀkau a me ka Pākīpika e hoihoi ana i ka hoʻōla ʻōlelo a moʻomeheu ʻōiwi. He honua pū ia e ʻōmaka aʻe ai nā hana a ke koleke e lawa ai nā kālele ʻewalu (8) o lalo iho. ʻO ka Hale Kuamoʻo ka mea hoʻopuka haʻawina nui loa––he haʻawina, puke, a kumuwaiwai kākoʻo paha––i paʻi ʻia ma ka ʻōlelo Hawaiʻi a pau pū ka waihona puke uila Hawaiʻi i kapa ʻia ʻo Ulukau nona ka puke wehewehe ʻōlelo Hawaiʻi nui loa e hoʻohana ʻia e ka 1 miliona a ʻoi kānaka i kēlā māhina kēia māhina.

1. Ka hoʻomohala ʻia o nā kumuwaiwai aʻo no ka hoʻohana ʻia ma nā kula kaiaʻōlelo Hawaiʻi o ka mokuʻāina;

2. Ka noiʻi ʻia o ka ʻōlelo Hawaiʻi;

3. Ka haku ʻia o nā huaʻōlelo hou, nā puke wehewehe ʻōlelo Hawaiʻi, a me nā huaʻōlelo pili pilinaʻōlelo;

4. Ka hoʻopuka a hoʻomalele ʻia aku o nā kumuwaiwai no ka lēkiō, nūpepa, kīwī, ʻenehana lolo uila, ala kelekaʻaʻike, a me nā pāheona a pāpaho pū;

5. Ka papa hoʻonui ʻike kumu;

6. Ka hoʻokumu ʻia o nā kula kaiaʻōlelo Hawaiʻi (mālaaʻo-12);

7. Ka lawelawe i nā lāhui kanaka a me ka poʻe hoihoi i ka hoʻōla ʻōlelo a moʻomeheu ʻōiwi;

8. Ka pili pū ʻana o nā kaiaulu kūloko a puni honua ma o nā honua uila e like me ke Kualono a me ka Waihona Puke Uila ʻo Ulukau.