Nā Kumuwaiwai ʻOhana
Ua ʻilau hoe ke kime hoʻomohala i ka mālama ʻana i 9 papa hoʻonui ʻike ʻohana. He alo a he alo ke ʻano o ka papa mua loa i mālama ʻia. A laila mai i hekau iho ai ka maʻi ahulau Kowiki-19. I mea e mālama pono ai i ka palekana o ka poʻe, ua lawelawe ʻia ka hapa nui o ia mau papa no nā ʻohana o kēlā me kēia kula kaiapuni o ka pae ʻāina ma o nā ʻenehana keleaʻo. Aia i lalo iho nei ke pihi e kele aku ai i ka papahana o kekahi o ia mau papa hoʻonui ʻike ʻohana.
ʻO ka ʻohana ka piko e ola ai ka ʻōlelo makuahine hiwahiwa o Hawaiʻi nei.
He ʻilau hoʻi ka hana e hoʻomohala ai i nā puke kumuwaiwai ʻeono i ʻike ʻia i lalo nei. Pēlā hoʻi ke kuahui ʻana i māhuahua ai nā haʻawina kūkaʻipā Quizlet i loulou ʻia ma ke pihi i lalo nei. Ua hoʻomalele ʻia nā puke i nā ʻohana M-3 i lawelawe ʻia ma ka wā pāhana. E kōmi ma ke pihi i lalo nei e kele aku ai i nā haʻawina aʻo huaʻōlelo ma Quizlet.
Ua kō ka 10 kumuwaiwai i hoʻolālā ʻia i kinohi a ma ʻō loa aku ka māhuahua ʻana. He 77 ka heluna hui pau loa ʻia o ia mau huahana like ʻole ke hoʻohui i nā puke kumuwaiwai ʻohana he 6, nā puke uila o ka pāhana he 40, a me nā haʻawina Quizlet he 31. I mea ia mau hua a pau e kākoʻo a paipai ai i ka ʻōlelo Hawaiʻi he ʻōlelo ola ma ka ʻohana. He mau momi hoʻonaʻauao ʻōlelo Hawaiʻi nō hoʻi ia e kākoʻo ana i ka hoʻonaʻauao ma nā kula ʻōlelo Hawaiʻi.