Sunnudagur 20. febrúar kl. 13-15.00

Plöntuleikhússmiðja þar sem plöntusérfræðingar á öllum aldri geta prófað sig áfram í leikritun og búið til senur sem leiknar eru fyrir, með eða af plöntum. Farið verður í leiki og gerðar leiklistaræfingar.

Leiðbeinendur eru sviðshöfundarnir Andrea Elín Vilhjálmsdóttir og Lóa Björk Björnsdóttir. Best er að mæta í pörum eða hópum þar sem blandast saman börn og fullorðnir svo allir hafi góðan ritara.

Listrænn stjórnandi plöntuleikhússins er Lóa Björk Björnsdóttir.

Það kostar ekkert að taka þátt í smiðjunni en vegna sóttvarna er aðeins pláss fyrir 25 þátttakendur. Skráning fer fram hér

Dagana 17.-20. febrúar kl. 10-17.00

Á sýningu Sjóminjasafnsins FISKUR & FÓLK er fjallað um alls konar forvitnileg sjávardýr, skip, sardínudósir og margt fleira sem tengist hafinu og reyndar líka það sem ætti ekki að finnast þar. Hvað skildi það nú vera?

Í fjölskylduleikjum fá ungir gestir skemmtilegar þrautir til að leysa. Þær leiða krakkana um sýningu safnsins og eru lítil verðlaun í boði fyrir þá sem leysa þrautirnar.

Aðgangur er ókeypis fyrir fullorðna í fylgd með börnum.

Dagana 17.-20 febrúar kl. 13-16.00

Skemmtilegur og skapandi vettvangur fyrir alla fjölskylduna til þess að útbúa sín eigin hús fyrir húsdýr - og grímur sem breyta börnum um leið í það húsdýr sem þau kjósa helst.

Þegar fyrstu landnemarnir komu til Íslands á víkingaöld voru þeir með húsdýrin með sér, því þau voru nauðsynleg hverjum bóndabæ. En auðvitað þurftu þessi húsdýr hús, eins og nafnið gefur til kynna, og því voru reist fjós, hesthús, fjárhús og margt fleira.

Á Landnámssýningunni verður hermt eftir landnemunum. Þar verður hægt að kubba stór hús og klippa og lita húsdýragrímur á eigin tíma og hraða. Þátttaka ókeypis í tilefni af vetrarfríi og allt föndurefni í boði.

Sunnudaginn 20. febrúar kl. 14-15.00

Í tilefni af Góu verður boðið upp á vindóróasmiðju í Kornhúsinu í Árbæjarsafni. Óróarnir verða útbúnir úr mórauðri ull og trjágreinum svo úr verður fallegt listaverk sem börnin taka með sér heim.

Góa er fimmti og næstsíðasti mánuður vetrar eftir gömlu íslensku tímatali og í gamla daga tíðkaðist að hengja upp rauðan ullarlagð út í glugga til að blíðka góuna í von um gott veður.

Umsjón hefur Jóhanna Guðrún Árnadóttir, verkefnisstjóri

Þátttaka er ókeypis í tilefni af vetrarfríi en athugið að þörf er á skráningu þar sem takmarkað pláss er í boði.

Gestir eru hvattir til að kíkja inn í önnur hús á safninu og sérstaklega að skoða sýninguna Karólína vefari á neðri hæð Kornhússins. Sýningin fjallar um Karólínu Guðmundsdóttur sem vann geysifallegt handverk úr íslenskri ull á síðustu öld en verk hennar prýddu óteljandi heimili og stofnanir.

Dagana 17.-20. febrúar kl. 13-17.00

Árbæjarsafn býður fjölskyldur velkomnar dagana 17.-20. febrúar en þá verður ókeypis aðgangur fyrir fullorðna í fylgd barna.

KÍKT Í KOFFORTIÐ er léttur leiðangur um munageymsluna Koffortið þar sem leitað er að gripum og fræðst um þá um leið.

Þá er forvitnilegt að kíkja inn í safnhúsin sem hver hafa sína sögu að segja.

KOMDU AÐ LEIKA er leikafangasýning þar sem börn mega handfjatla og leika sér með alls konar leikföng frá ýmsum tímum.

Dagana 17.-20. febrúar

Á Ljósmyndasafninu er boðið upp á skemmtilega myndaþraut um sýninguna Augnablik af handahófi. Á sýningunni er ljósmyndum og textum teflt saman og ungir sem aldnir geta leikið sér að því að finna texta sem þeim finnst passa við myndirnar. Myndaþrautin gengur út á samveru og samvinnu fjölskyldunnar um leið og sýningin er skoðuð. Lítil verðlaun í boði fyrir þá sem taka þátt.

Ókeypis aðgangur fyrir fullorðna í fylgd með börnum.

• Mán-fim. kl. 10-18.00

• Föstud. kl. 11-18.00

• Helgar kl. 13-17.00