Baltzola (Dima) - Zubialde (Zeberio)

Ezusteko arazoren bat tarteko, Dimako Baltzola auzoko San Lorentzoren ermitan eman diogu hasiera zazpi euskal hiriburuetako etapa berriari. Dimako Indusi auzoan hasteko asmoa genuenez, aldaketaren ondorioz ikusi gabe gelditu dira, besteak beste, Jentilzubia eta Axlor eta Baltzolako kobazuloak.

Ermitatik abiatu eta pinudi artean inguratu dugu  Bargondiako Atxa mendia, Bargondia auzora jaitsi aurretik. 

Bargondia auzora hurbildu aurretik, mintegi eder baten ondotik igaro gara; eureka, badatoz aldaxka berriak! Leku laiotzean gabiltzan arren, eguzkia dugu goizean goizetik; oraingoz inguruko mendiak argitzen ditu eta nola argitu gainera. Besteak beste, Lekanda eta Gorbeia. Bargondia igarota, Dimako auzune nagusira heldu gara: Ugaranara.

Ugaranan, hango udaletxearen eta San Pedro elizaren ondotik igaro eta Igorrera joan gara, bide asfaltatuak eta bidegorria tartekatuz. Han, parke batean egin dugu hamaiketakoa, eta indarrak berrituta ekin diogu berriro bideari. Igorretik Bizkaiko Arantzazura joan gara. Arantzazuko elizaren eta udaletxearen ondotik igaro eta Arratia ibaia zeharkatu dugu Zelaiako zubitik, mendialderako bidea hartu baino lehen. Izenburu bitxia duen frontoia edo kiroldegia ere ikusi dugu (“Ondo kostata”).

Guk ere, batzuetan, ondo kostata egiten ditugu ibilaldiak. Tarte honetan, behintzat, ez dago horrelakorik. Aldapa handirik gabeko bidean goaz, basoko itzalaren gerizpean. Tropelean gabiltza taldea gehiegi luza ez dadin. Bestela, aurrekoak atzekoen zain gelditu behar izaten baitira.

Itzaletik jalgi eta eguzkitan goaz tarte honetan. Laster murgildu gara berriro basoan eta bidea ere tentetu egin zaigu. Bide gurutze batean, nahasketa txiki bat izan dugu, baina berehala konpondu ahal izan dugu Apalagagoikoa izeneko eraikuntzara heldu aurretik. Beste aldapa tente bat igo eta Argiñaoko Atxa mendiko lepora iritsi gara.

Argiñaoko Atxa lepoan, talde nagusiak aurrera jarraitu duen bitartean, beste taldetxo bat mendi hartako tontorrera (524 m) hurbildu da. Une batez bidea leundu egin zaigu, baina laster etorri da eguneko aldaparik handiena, gaurko mendi garaienera eramango gaituena. Ahalegin handia eskatzen duen igoera da.

Poliki-poliki, ordea, gainditu dugu tarte batzuetan % 40ko maldak dituen aldapatzarra. Mandoia (637 m) mendiaren gailurrean gaude, gure atzealdean Bilbo eta inguruko herriak ditugula. Horiek bakarrik ez, itsasoa eta Bilbo inguruko mendiak ere ederki ikusten dira gain honetatik. A ze taldea elkartu garen gaurkoan; 55 lagun, alajaina.

Behetik gorakoak amaituta, goitik beherako lanak egin behar orain. Eguzkiz argitutako eta udazkeneko kolorez margotutako baso ederrak igaro ditugu; argazkian ageri dena, esate baterako.

Aurrerago, Zeberiogana auzoan, hango Andre Mariaren ermitaren inguruan, bide berria hartu eta Zeberioko auzune nagusia den Zubialdera jaitsi gara, hango Herriko Taberna jatetxean (Zubialde, 10. ZEBERIO. Tel.: 94 648 08 76; 617 906 325) bazkaltzera. Gaurkoan ere oso giro ederrean bazkaldu dugu taberna ondoko plazan.