Castejondik igarotzen diren errepideetako baten (N-113) ertzetik abiatu gara. Ibilaldian zehar nagusi izango den landetako pista zabaletik hurbildu gara trenbideko zubira lehenik eta Ebro ibaira geroxeago. Eguraldi freskoa dugun arren eta oraindik berotzen ez badu ere, eguzkia da jaun eta jabe zeru urdinean.

Bide laua izan dugu ia ibilaldi osoan. Alde batean Ebro ibaia eta beste aldean soro-zelai handiak ditugula egin ditugu lehenbiziko kilometroak. Landa emankor hauetan fruta arbolak dira nagusi, errenkadan txukun asko landatu eta zaindutakoak. Nabaria da zenbat eta zeinen ondo lan egiten duten inguruko nekazariek.

Inguru hauetan ezagunak dira ibai ondoko ibar-basoak. Ibar-basoa edo ibaiertzeko basoa ibaiaren ibilguaren ertzetan hazten diren zuhaitz eta zuhaixken multzo estua da. Oso ekosistema aberatsak dira eta ibilgua babesteko ezinbestekoak. Landare-espezieak ibaiaren ibilguan zehar sortzen dira: ur gehien behar dutenak ibaitik gertuen kokatzen dira, sustraiak arroan bertan hondoratuta (sahatsak), eta, atzerago, ur gutxiago behar dutenak kokatzen dira: haltzak, makalak, lizarrak, zumarrak, etab.

Urrunean Milagro herria ageri zaigula, Aragoi ibaiak bere urak Ebrorenetan isurtzen dituen gunera hurbildu gara. Aragoi ibaiaren ertzetik gabiltza orain, baina hango urak ez bezala, gu ibaian gora goaz. Milagrotik hurbil atsedenleku leku polit bat topatu dugu eta hantxe indarberritu gara aurrera jarraitu ahal izateko.

Milagro izenak ez du zerikusirik erlijio gaiekin. Latineko miraculum (begiratokia) hitzetik dator eta argazkia ikusita garbi dago guztiz izen egokia dela. Aragoi ibaia zeharkatzen duen zubitik herri dotorea ikusten da. Harantz goazela, zikoinak ikusi ditugu arbola puntetan, gure argazkilarien zain baleude bezala.

Bidean ez ezik, Milagro herrian ere ikusi ditugu amiamokoak. XVII. mendean eraikitako Abateen Andre Mariaren elizako kanpandorrean lehenbizi, eta Erdi Aroko gazteluko horma bakanen gainean geroago. Famatuak dira Milagroko gereziak eta fruta horri eskainitako egun berezia ospatzen dute herri honetan ekainaren bigarren asteburuan.

Gaztelurako bidetik Milagro behean utzi eta mendialdera igo gara. Goi lautada hauetan, fruta arbola eta mahasti artean, baratze berezi bat topatu dugu: eguzki-panelez betetakoa. Tramankulu erraldoi hauek zeregina izango dute gaurko eguzkiarekin. Hauek ere, lehenago fruta-arbolak bezala, errenkadan ondo eta zuzen ipinita ageri zaizkigu.

Hurrengo geldialdia Peñalengo amildegia ikusteko. Anai-arrebek amildegi honetatik bota zuten Antso IV.a 1076an. Hemendik Aragoi eta Arga ibaien elkargunea ere ikusten da. Elkargune hartatik aurrera Aragoi ibaiak kilometro batzuk egiten ditu bere urak Ebrorenetan isuri aurretik. Jarraian Funes herrira jaitsi eta Arga ibaiaren ertzetik jarraitu dugu Azkoienen amaitu arte.