Preguntas frecuentes

Podo seguir o curso sen asistir ás clases presenciais?

Presencialidade e virtualidade están interrelacionadas e non se concibe a unha sen a outra. Aínda que a asistencia non é obrigatoria, participar en ambas as dúas é necesario para poder acadar os obxectivos do curso de maneira satisfactoria.

Ao final do curso, vou conseguir o mesmo certificado  que na modalidade presencial?

Si. Os cursos de ambas as modalidades, tanto a presencial coma a semipresencial, conducen á obtención da mesma certificación, logo da realización dunha mesma proba.

Podo matricularme aínda que non teña experiencia neste tipo de formación?

Si. Aínda que ter experiencia en formación en liña é sempre unha vantaxe, non é requisito imprescindible para matricularse. O teu profesor/a servirache de orientador/a e guía e axudarate en todo o que necesites.

A modalidade semipresencial require máis tempo de estudo?

Non necesariamente. En ambas as modalidades haille que dedicar tempo ao estudo. O que si se precisa no ensino semipresencial é un maior grao de autonomía na xestión do tempo e da propia aprendizaxe.

Podo acceder á plataforma dende un dispositivo móbil?

Si. A aula Moodle do centro está preparada para poder acceder a ela dende un dispositivo móbil, se ben non se pode facer uso de todas as funcións. É por iso que se recomenda traballar dende un ordenador persoal.