BÚRDALU

Brota el Búrdalu com´un regachinu

vástagu delos cielus i la sierra;

engendrau con llantina de lucerus

i paríu entre suoris pola tierra.

El´arroyu chiquininu ansía sel ríu

pa dil-mus qu´es el amu dela jesa.

Por essu, hazi el chiriveji ruíu,

brincandu com´un chivi entre las pieras.

Mas solu consigui, d´agua hech´un críu:

gorgoreal ala Luna i las estrellas;

cual hilu líquiu enrollal-si nun líu

i pintal de color verdi las yerbas.

Calmau su impulsu, reposa i recuerda

oficius qu´antañu hizu él mesmu:

Quandu hué molineru ena ribera

i triturava ena muela el centenu

que´l probi arrancava al´estéril tierra;

o trocava el trigu en frol de harina,

mutá en pan morenu en hornus de leña.

I quandu hué sufríu artolanu,

i drentu delos surcus la su sangri vertía

pa crial verduras que, por quatru perras,

en praças d´abastus pregonás vendía.

Hué pastor estanti i dela Mesta;

mayoral de vacas bravas i ovejas.

Hué, ala sombra del cañaveral,

tocaor de rabel, campanus i esquilas;

i tendíu so la grama entre junqueras,

cantor dela Cañá Real Leonesa.

Tó quea en recuerdus, viejas vivencias.

Mientras, s´ahoga su alma ena tristeza,

sumía en pozas d´oscura pena;

pós su agua, endenantis cristalina,

chorrea agora heyonda i macilenta.

Ya n´oyi el cantal delas lavanderas

que, hincás de roíllas, batían sus vidrius

refregandu la ropa enas paneras

entre bayuncus, junquinus i lirius.

De laval a Periquitu el pañuelu

l´ofrecimientu tapocu suena.

Retumba, si acasu, nun negru sueñu

el ecu de sus síes drentu dela cueva.

Chopus, álamus i fresnus le preguntan,

quién l´arrebató su antigua grandeza.

I el ríu, con tímiu rumor, contesta

que hué el ombri indolenti i la su insolencia.

El cansau Búrdalu, ancianu en leguas,

en plena vega se vierti en Guadiana.

Dolíus por sus lágrimas le consuelan

ninfas d´oru i pececinus de prata.

Eduardo Moreno García

BÚRDALO

Brota el Búrdalo como un regachino

vástago de los cielos y la sierra;

engendrado con llantina de luceros

y parido entre sudores por la tierra.

El arroyo chiquinino ansía ser río

para decirnos que es el amo de la dehesa.

Por eso, hace el chiriveje ruido,

brincando como un chivi entre las piedras.

Mas solo consigue, de agua hecho un crío:

gorgorear a la Luna y las estrellas;

cual hilo líquido enrollarse en un lío

y pintar de color verde las hierbas.

Calmado su impulso, reposa y recuerda

oficios que antaño hizo él mismo:

Cuando fue molinero en la ribera

y trituraba en la muela el centeno

que el pobre arrancaba a la estéril tierra;

o trocaba el trigo en flor de harina,

mutada en pan moreno en hornos de leña.

Y cuando fue sufrido hortelano,

y dentro de los surcos su sangre vertía

para criar verduras que, por cuatro perras,

en plazas de abastos pregonadas vendía.

Fue pastor estante y dela Mesta;

mayoral de vacas bravas y ovejas.

Fue, a la sombra del cañaveral,

tocador de rabel, campanos y esquilas;

y tendido so la grama entre junqueras,

cantor dela Cañada Real Leonesa.

Todo queda en recuerdos, viejas vivencias.

Mientras, se ahoga su alma en la tristeza,

sumida en pozas de oscura pena;

pues su agua, antes cristalina,

chorrea ahora hedionda y macilenta.

Ya no oye el cantar de las lavanderas

que, hincadas de rodillas, batían sus vidrios

refregando la ropa en las paneras

entre bayuncos, junquitos y lirios.

De lavar a Periquito el pañuelo

el ofrecimiento tampoco suena.

Retumba, si acaso, en un negro sueño

el eco de sus síes dentro de la cueva.

Chopos, álamos y fresnos le preguntan,

quién le arrebató su antigua grandeza.

Y el río, con tímido rumor, contesta

que fue el hombre indolente y su insolencia.

El cansado Búrdalo, anciano en leguas,

en plena vega se vierte en Guadiana.

Dolidos por sus lágrimas le consuelan

ninfas de oro y pececinos de plata.

Eduardo Moreno García