IEC Materials

Ang DSWD Field Office NCR – Disaster Response Management Division (DRMD) ay gumawa ng isang audio-visual presentation (avp) kung saan itatampok ang proseso ng pagre-repack ng mga Family Food Packs na ipinamamahagi ng Kagawaran sa 17-lokal na pamahalaan na sakop ng National Capital Region bilang suporta sa pagbibigay ng agarang tulong sa mga taong lubos na nangangailangan lalo na sa panahon ng kalamidad o sakuna.

Ipinasilay naman ni DRMD Social Welfare Officer II, Ms. Kristel Anne Panganiban, ang ilang bahagi ng DSWD NCR Warehouse sa Chapel Road, Pasay City, na syang tumatayong repacking hub at imbakan ng Food and Non Food Items (FNFIs) ng DSWD Field Office NCR.

Makikita rin sa nasabing avp ang manual na pagre-repack ng mga Family Food Packs sa tulong ng mga volunteers ng Kagawaran. Mula sa mga raw materials, inihahanda ng mga volunteer ang bawat laman ng Family Food Packs sa apat na istasyon: paghahanda ng mga kahon; pagbabalot sa 6-kilo ng bigas; paglalagay sa kahon ng ni-repack na 6-kilo ng bigas 10-canned goods at 10-pakete ng coffee o cereal drink; at huli ang pag sealed sa mga kahon at paglagay nito sa storage area.

Nagbahagi naman ng kanilang mga personal na kuwento sina Ms. Edzel Camacho at Mr. Richard Orence patungkol sa kanilang karanasan bilang mga volunteers ng Kagawaran.

“Naranasan ko na din pong maging volunteer. Hindi madali ang pagiging isang volunteer dahil nandoon yung pagod – bilang volunteer masaya kaming nakatutulong sa Bayan”. – pahayag ni Ms. Edzel Camacho.

“Bilang staff ng DSWD, pilit kaming bumabangon para sa laban ng Bayan”. – sambit naman ni Mr. Richard Orence.

Ang mga pahayag na ito ng mga kawani ng Kagawaran ay sumasalamin sa kanilang adhikain na makapagbigay ng tapat,maagap, mapagkalinga at walang puwang na serbisyo sa bayan.

Kaya naman upang patuloy na maihatid ng Kagawaran ang mga mandato nito sa publiko, ay nakipag-ugnayan sina DSWD NCR Regional Director Vicente Gregorio B. Tomas at DRMD Head Bienvenido V. Barbosa, Jr. sa tanggapan ng Department of Public Works and Highways (DPWH) NCR upang makausap si DPWH NCR Regional Director Eric A. Ayapana patungkol sa posibilidad na pagpapagawa ng isang warehouse na itatayo sa Chapel Road, Pasay City na syang gagamitin ng DSWD Field Office NCR. Ang nasabing ipapatayong warehouse ay magsisilbing imbakan ng mga Food and Non-Food Items (FNFIs) na ihahanda ng Kagawaran upang makapag hatid ng agarang suporta sa mga Lokal na Pamahalaan sa National Capital Region (NCR) lalo’t higit sa panahon ng sakuna at kalamidad.

Sa kasalukuyan ay naihanda na ng Kagawaran katuwang ang DPWH-NCR ang unang draft ng Site Development Plan para sa pagpapatayo ng nasabing warehouse. Inaasahang sa susunod na taon (2022) ay masisimulan na ang pagpapagawa nito pagkatapos maihanda ang mga kinakailangang dokumento at pondo para dito.

Ang Kagawaran katuwang ang iba’t ibang sangay ng Pamahalaan ay patuloy na gagawa ng mga inisyatibong makatutulong sa paghahatid ng maagap at mapagkalingang serbisyo sa bawat Pilipino. ###

Maging maagap!

#HANDA ka na ba at ang iyong pamilya pagdating ng iba’t ibang uri ng kalamidad tulad ng BAHA, SUNOG, at LINDOL?

Ang DSWD Field Office NCR – Disaster Response Management Division ay nag #HANDA ng isang leaflet na naglalayong makapag-bigay ng dagdag kaalaman patungkol sa mga paghahanda na maaaring gawin ng isang indibiduwal o ng buong pamilya pagdating ng anumang kalamidad o sakuna.

Sa brochure na ito mababasa ang mga dapat gawin bago, habang nangyayari, at matapos mangyari ang isang kalamidad o sakuna.

Para sa kabuuang detalye, i-click lamang ang link na ito: https://bit.ly/3gsVjwD o i-scan lamang ang QR code na nasa larawan sa pag-access ng nasabing brochure.

Maaari ring i-download ang actual size at design ng leaflet sa link na ito: https://bit.ly/3ygWLbv

#DSWDMayMalasakit