IKAW NAMAN

Lungkot

Danilo B. Abacahin

sana bumbilya ang lungkot:

patay-sindi, patay-sindi, napupundi;

sa isang pindot, sa isang pihit,

napapatid ang kapatid ng puso,

pumipikit na liwanag na pumapaso

sa magdamag

sana damit ang lungkot:

suot-hubad, suot-hubad, napupunit;

higpit ng kapit na nakakalag;

sapin lamang o saplot,

hindi balat ng buhay-kirot

na kulay-inip

sana daga ang lungkot:

labas-masok, labas-masok, nahuhuli

kahit nagkukubli sa mga lungga

ng kaluluwa; pesteng puwedeng

lasunin, akitin sa patibong, ipain

sa pusang gutom

sana lagnat ang lungkot:

init-lamig, init-lamig, nalulusaw

sa pawis, nalulunod sa tiis;

hindi binat na habang-buhay

na bumubulag, bumabalot, lumuluray

ng ulirat