3-04 畢業典禮-在校生致歡送詞

畢業典禮-在校生致歡送詞（閩南語）

在校生致歡送詞

鳳凰花猶原在開，驪歌偕奄哺蠐(蟬)的聲嘛做夥來響起，唉！又更是一個季節的離別時。

敢更會記得，彼時陣逐項攏毋識的倪仔疕，來到這個生份學校彼當時，是誰予咱溫暖貼心的滋味。

在學校內有恁歡喜的笑聲，嘛有恁拋拋走的影，咱在日頭腳走相掠，走到歸身軀汗，笑聲偕目屎攏在這，伊在咱的心內行，樹仔嘛恬恬聽，替咱加油喝到大大聲，恁一定會記得這親像青春嶺，因為這有影跡。

白雲原在在行，草仔猶原青青在彼，厝角鳥仔嘛在樹仔頂叫予咱聽，老師上課嘛講「少年著打拼，食老才食名聲」，更講「人情留一線，日後好相看」，這陣粉筆嘛親像置黑板在唱歌，山猶原是山，海岸嘛是海岸，只是學長、學姊暫時毋偕阮做伴，因而就減了笑聲，續多一份心內的感傷偕無快活。

想著咱的友情，無的確這陣鼻頭酸，毋過毋通未記咱的熱情，嘛毋通未記序大人偕老師的叮嚀，俗語講：「有心打石石成磚，有心開山山成園」，若認真就偕人有比評，成功就在目睭前。

這陣驪歌又來響起，應該是離別的時，三年的景緻來截止，在這請帶著老師的教示，不時提醒家己，逐家對任的央望嘛著愛堅持，隨時鼓勵家己。

現此時校門若踏出去，恁就行向人生的好景緻，阮心內的毋甘無法度用言語來講起，僅且會得(當)恬恬祝福恁有好時機。

在這請恁帶著阮祝福的心意， 會得(當)「一舉首登龍虎榜，十年身到鳳凰池」，飛向美好的前程去。