tālia tum placidō Sāturnius ēdidit ōre:
"dīcite, iūste senex et fēmina coniuge iūstō
digna, quid optētis." cum Baucide pauca locūtus 705
iūdicium superīs aperit commūne Philēmōn:
"esse sacerdōtēs dēlūbraque vestra tuērī
poscimus, et quoniam concordēs ēgimus annōs,
auferat hōra duōs eadem, nec coniugis umquam
busta meae videam, neu sim tumulandus ab illā." 710
vōta fidēs sequitur: templī tūtēla fuēre,
dōnec vīta data est; annīs aevōque solūtī
ante gradūs sacrōs cum stārent forte locīque
narrārent cāsūs, frondēre Philēmona Baucis,
Baucida cōnspēxit senior frondēre Philēmōn. 715
iamque super geminōs crēscente cacūmine vultūs
mūtua, dum licuit, reddēbant dicta "valē" que
"ō coniūnx" dīxēre simul, simul abdita tēxit
ōra frutex: ostendit adhūc Thynēius illīc
incola dē geminō vīcīnōs corpore truncōs. 720
haec mihi nōn vānī (neque erat, cūr fallere vellent)
nārrāvēre senēs; equidem pendentia vīdī
serta super rāmōs pōnēnsque recentia dīxī
"cūra deum dī sint, et, quī coluēre, colantur."'
Dēsīerat, cunctōsque et rēs et moverat auctor, 725
Thēsēa praecipuē; quem facta audīre volēntem
mīra deum innīxus cubitō Calydōnius amnis
talibus adloquītur: 'sunt, ō fortissime, quōrum
forma semel mota est et in hōc renovāmine mānsit;
sunt, quibus in plūrēs iūs est trānsīre figurās, 730
ut tibi, conplexi terram maris incola, Prōteu.
nam modo tē iuvenem, modo tē vidēre leōnem,
nunc violentus aper, nunc, quem tetigisse timērent,
anguis eras, modo tē faciēbant cornua taurum;
saepe lapis poteras, arbor quōque saepe vidērī, 735
interdum, faciem liquidārum imitātus aquārum,
flūmen eras, interdum undīs contrārius ignis.