LATHALAIN

Kasabay ng pagbabago ng sikat na Social Media platform na Twitter sa bago nitong pangalan na X ay ang unti- unting pagpait ng tamis ng kabataan, kapalit ang init ng kalaswaan. Ang lugar kung saan nag-uugnay ang maraming tao sa mundo ay nauwi sa madumi laro ng negosyo.

Kilala ang lugar na ito bilang isang tila “online diary” kung saan ikaw ay may kalayaan maghayag ng iyong nararamdaman sa politika, kasiyahan, persona o kahit anuman, maging ang kalaswaan. Dito, maraming tao ang nakapaligid sa iyo, mayroon din silang laya na ito ay I-retweet, I-heart, o magbigay ng mga kumento.

Subalit sa gitna ng laya, pag-ibig at saya ay may nakakubling isang madilim na bahagi ng X, at ito ay maaring marating sa pamamagitan ng isang Hashtag- ang Hashtag #Alter. Para sa mga gumagamit ng X o Twitter, hindi na ito bago subalit dahil sa pag-usbong ng teknolohiya, ang bahaging ito ay naging kilala. Sa isang refresh, Taas at baba ang mga content ng kalaswaan. Mga litrato at bidyo ng katawan kundi isa na ring lugar para sa maduming bentahan.

Sa gitna ng pagpapasaya sa gising na laman ay marami dito ang nakatago ang katauhan. Nagpapalaro upang makakuha ng kasikatan kapalit ng pagbabahagi ng imahe ng pribadong bahagi ng katawan.

Walang ideya kung ito ba ay galing sa isang nakatatanda,o galing na lamang sa sang bata. Dahil sa kahirapan at upang malamanan ang kumakalam na tyan, handa kahit mga bata na ipagbenta, ipahawak at magpahulog sa mapusok na galamay ng katiwalian at karahasan sa ngalan ng pera. May mga pagkakataong wala sa mga palaruan, o paaralan ang mga batang ito, Doon sila matatagpuan, sa mga mall o panuluyan kasama ang kanilang mga nakilala sa Twitter.

Hindi para makipagkaibigan, hindi para lasapin ang tamis ng kabataan, hindi para ipahinga ang katawan bagkus upang makipag-patintero sa laro ng kalaswaan, ipinahahawak ang katawan kapalit ng laman tyan.

Ang maduming kabuhayan ng mga batang ito na may palitan ng pawis at katas ay maaring magdulot ng pagkahulog sa patibong ng isang sakit na walang lunas- ang HIV. Ang trese, katorse at kinse ang edad kung saan dapat sila ay napoprotektahan at labis na inaalagan dahil sa oras na sila ay mahulog sa maduming laro ng ilegal na kalaswaan, walang batang masayang maglalaro sa mga lansangan, tataas ang kamay sa tuwing may recitation sa paaralan, nakangiting kakain sa hapag-kainan dahil sa huli, hindi na sila magiging bata muli.

Sila ay mga indibidwal na hilaw pa ang kaalaman at hindi ito isang imbitasyon upang sila ay pagdausan. Sila ay anak ng mga magulang, kaibigan ng maraming tao , kapatid at kayamanan sa isang tahanan. Hindi isang laruan lamang.

Dustin Echizen Del Mundo

Mapa Doraemon man ng Pinas o Jollibee sa kiddie party o kahit pa ang tiyuhin mong barbero at titser mong maiinitin ang ulo noon! Mula sa nakakatuwang buhay ng isang batang si Poknat, hanggang sa adventurous na buhay ng isang estudyante at maging ang masungit na tindera sa canteen, huling huli yan at tunay ngang makakarelate ang kahit na sino man sa kwelang kwela hatid ng mga videos ni Goldwin Reyes sa Facebook na nagmula sa Lungsod ng Batangas!

Mula sa bayan ng Concepcion, lungsod ng Batangas nagsimula ang mga munting ideya mula sa puso at isipan ng isang 3rd year college ng Bachelor of Arts in Multimedia Arts sa University of Batangas na si Goldwin A. Reyes. Ang mga ideyang nagbunga ng pagpapatawa at nag hatid ng tuwa at ligaya sa mga taong nasa social media. Sa murang edad, sadyang hilig na ni Goldwin ang kumuha ng mga video na nakaka aliw bago pa man siya tumuntong sa kolehiyo. Sa elementarya at highschool nahubog ang kaniyang pagiging malikhain na lumalabas bilang katatawanan.

Ala Eh Try Lang Naman!

Sa pagpasok ng pandemya Corona Virus Disease (COVID 19), ito ang naging libangan ni Goldwin para makatakas sa lungkot ngpagkaburyong. Bago matapos ang taong 2020, sinimulan ni Goldwin gumawa ng mga videos na ayon sa kanya “try try lang” na kanyang ini uupload sa tiktok at sa facebook app na hindi nag tagal ay tinangkilik ng mamamayan. Ang kaniyang video na “Ala eh, Ala eh” ang nagpakilala kay Goldwin sa mundo ng kasikatan. Mula dito nag tuloy-tuloy na ang pagiging trending ng mga video niya mapa Facebook man o Tiktok. Dito nabuhay ang iba’t-ibang karakter na ginagamit ni Goldwin sa kanyang mga video. Bawat karakter, mga kwento ng iba’t ibang buhay ng bawat Pilipino.

Ala Eh Ngiti Ka Naman!

Ang mga mga kwento ng “Contemporary World” ang mga kwentong tiyak na makaka relate ang mga mamamayan at tiyak na magiging kwelang kwela para sa Goldwin. Mula sa batang si Poknat na pinapakita ang maraming karanasan ng isang estudyante, sa guro na nagngangalang si Ms. Pikatchu na nagpapakita ng mga ugali ng isang guro na kinakakwelahan ng mga mga tao. Kung papaano kung sa Pilipinas nabuhay ang sikat na sikat na cartoon character na si Doraemon at kung magiging matalik mong kaibigan ang kinagigiliwang si Jollibee. Ang lahat ng ito, base sa karanasan ng bawat mamamayang Pilipino na nilalagyan ng komedya para magbigay ng ngiti sa bawat isa sa kabila ng mga “stress at hagardness” na nangyayari sa mundo.

Ala Eh May Pera!

Sa ngayon miyembro si Goldwin ng Future Multimedia Artist Society ng University of Batangas, dito mas lumalawak pa sa ideya ng mga weekly content na kanyang ipinopost. Para kay Goldwin, malaki ang naging tulong nito sa kanyang buhay maging sa pinansyal na aspeto at isang malaking bagay ang makapaghatid ng ngiti at tawa sa kanyang mga kapwa kababayan. Tunay ngang ang pagiging malikhain, nasa dugo ng isang Pilipino! Sa mundo na ang social media ay minsang tinatawag na ‘toxic’ at punong puno ng ‘fake news’, take a break! Chill! Tumawa ka muna dahil laughter is the best medicine. Para kay Goldwin, share the happiness dahil ang tawa at ngiti sa kabila ng anumang pinagdadaanan, tatak pinoy! Isa itong patunay na sa kabila ng iba’t iba nating karanasan at mga nangyayari sa ating buhay, kung ang pagiging malikhain sa lahat ng ito, tiyak magbibigay ng ngiti at ligaya sa bawat isa at magiging trending na trending!

Yoesha Grace Velasco

Mapapakanta at mapapasabay ka sa himig ng tagumpay mula sa puso ng Batangas nang magawang sugpuin ng isang mag-aaral ang nakakaparalisang kondisyon ng kahirapan sa pamamagitan ng mga nota at liriko. Awit ng determinasyon ang nagtulak kay Archee Laguerta, mas kilala bilang Hattus, upang makapagtapos ng Senior High School sa tulong ng kita niya mula sa kanyang mga karera sa Spotify.

Himok ng Liriko

Hindi siya basta nagtapos ng high school, sapagkat kinilala siya bilang isang alagad ng musika na pinusuan ng madlang tagapakinig. “Feelings, thoughts, or even a word that would spark up from somewhere at anyplace, anytime. Then I just. Create,” ang mungkahi ng musikero. Malabo na sa kaniyang alaala ang unang kantang nalikha niya sapagkat labing-dalawang taong gulang pa lamang siya noong nagsimula siya sa pagkakamakata hanggang sa nagbunga ng kapantok-pantok na kanta ang pagkadurog ng kaniyang puso. Ang kanyang mga awitin ay naging batis ng ginhawa, hindi lang sa damdamin kundi pati na rin sa bulsa. Kasabay nang pagpatok ng kaniyang mga kanta ay ang pagtaas ng kaniyang puhunan dito upang matugunan ang tuition niya sa pag-aaral.

Himig ng Puhunan

Umabot ng mahigit sampung libo ang kaniyang kinita noong pumatok ang kaniyang unang awitin na “So Are We Platonic?” na siyang naging karagdagang pagtustos sa kaniyang semi-final exam noon. Nakade-kwatro at taimtim na nakakapit sa kaniyang Ukelele si Hattus nang sinimulan niya ang ‘first hit’ niya. Umabot ng mahigit isang milyong streams ang kaniyang awitin tungkol sa babaeng minsan na niyang pinangarap ngunit napagtanto niyang baliko ito at kapwa babae ang hanap. Mapait at saklap man ang kwentong pag- ibig niya ay nagbunga naman ito ng “relatable” na awitin ang kaniyang karanasan. Naging makulay at matamis ang tinamasa niyang tagumpay sa paglobo ng kaniyang pinamumuhunang libangan kasabay ang pagtanggap sa kaniya ng masa.

Hango ng Harmoniya

Sa bawat nota ng kwento ni Hattus, naging inspirasyon siya sa iba pang mga estudyante na may pangarap sa sining. "Creativity is one thing, and a deeper meaning is another. The only obstacle you have to go through is luck. No matter how beautiful your work is, it might never show up anywhere or even be seen or heard from by anyone. It is just harder for new artists to pop up and be a true icon," pahayag niya. At isa pa, nakabilang siya sa 216,000 na mga estudyanteng nagtratrabaho ayon sa pag-aaral ng Commission on High Education (CHED). Isang huwarang halimbawa si Hattus sa pagbibigay daan para sa iba pang mga musikero at artistang may pangarap sa industriya ng musika, isang tuwang nagmumula sa sariling talento at kasipagan. Kasing komplikado ng mga pangarap sa buhay ang paglikha ng mga melodiya at liriko na tila nagiging simponya ng pag-asa sa mga nagsisintonado sa hamon ng edukasyon. Mula sa simpleng awitin ay nakahanap ng tahanan at sandalan si Hattus nang naharana niya ang tadhanang nagbigay gabay

Jan Jeremy Obando

Hindi mga pagsusulit at mga awtput ang problema ng Transwoman na si Jim Mandigma sa pag-aaral kundi kung papasukin ba siya sa paaralan, suot ang kasuotang pinaniniwalan ng maraming na mali at hindi angkop.

Sa bayan ng Rosario, Batangas nagsimula ang makulay na mga pangarap ni Jim Mandigma. Ang buhok ng barbie, ang lipistik ng kanyang ina, ang magagarbong damit ng kaniyang manyika ang nagbibigay laya sa babaeng puso ni Jim. Hindi tulad ng masalimuot na karanasan ng maraming LGBTQIA+ sa kanilang pamilya na puno ng diskriminasyon, sa loob ng tahanan ng Pamilya Mandigma, si Jim ay hindi isang preso sa tila bilangguan bagkus mainit ang yakap ng pagtanggap, walang dahilan para magpanggap, ang laya na tila hanggang alapaap.

Puno ng talento ang pagdadalaga ni Jim. Ang rampahan ang kaniyang naging tahanan, ang kaniyang angking ganda ang nagbigay sa kanya ng korona sa Miss Gay Universe Bauan. Sa loob ng dalawang taon, ang Batangas State University- the National Engineering University ang kumupkop sa mga hangarin at pangarap niya subalit imbes na maging lugar ito para sa pagpapaunlad sa sarili at kalayaan, ang mga pasilidad ng nasabing paaralan ay naging tila isang hukuman. Papasok pa lamang sa mga pintuan, hinaharang, kinukuwestiyon at binabatikos dahil sa kaniyang kasuotan. Pinipilit na kumutan ang katawan ng isang kababaihan ng saplot na suot ng isang kalalakihan.

Ito ang nagtulak kay Jim upang gamitin ang teknolohiya upang idulog ang kaniyang masakit na karanasan. Ginamit niya ang Tiktok at nagpost ng ilang video na nagpapakita kung paano itrato ng nasabing paaralan ang mga taong gaya niya. Abril nang una niyang ilabas ang kaniyang video na nagpapaliwanag kung paano naapakan ang karapatan ng LGBTQIA+ ng mga alituntunin sa kasuotan na ipinatutupad ng paaralan na pumalo sa halos isang milyong manonood.

Nahanap ni Jim ang kalayaan, ang espasyo kung saan siya tanggap at kinikilala nang may respeto, sa bagong paaralan- sa University of Batangas, bilang isang Psychology Student. Mas nanaisin niyang umupo sa silid-aralan, kumain sa kantina ng paaralan at lumabas pasok sa pintuan na walang takot sa puso na siya ay mahuhusgahan.

Dahil ang kalinisan ng isang indibidwal ay hindi nasusukat sa haba ng kaniyang buhok, pula ng kaniyang pisngi, kapal ng kolorete, pungay ng mata, hulma ng katawan o pula ng kaniyang mga labi bagkus ang laki ng puso, pagmamahal sa kapwa at respeto ang tunay na sukatan.

Hanggang ngayon patuloy ang pakikipaglaban ni Jim para sa pantay na karapatan. Nagbabakasakali siyang sa pagdating ng panahon wala nang LGBTQIA+ ang sisitahin sa pintuan.

Ealy Jemima Salazar

Ang capcut ay isang online editing platform na patok na patok sa mga kabataan ngayon. Kalimitan itong ginagamit para mag-edit ng makabangong “MoJo” o “mobile journalism” – isang paraan upang kumuha ng mga bideyong maiihahalintulad sa ‘vlogging’ na may kaakibat na impormasyon at balita na kapupulutan ng aral. Pero, paano nga ba nakakapag- edit ng madalian sa capcut?

1.) Maaari kang pumili sa libo-libong templates na nakapaloob sa aplikasyon na siyang aakma sa iyong gusto at edits. Subalit kung nais mo ng orihinal na edit, pindutin lamang ang ‘New Project’ at magsimula sa iyong likhain.

2.) Pumili ng mga litrato o bidyo gagamitin mo sa iyong pag-eedit na nais mong isama sa iyong ‘content’.

3.) Dito ay may kalayaan kang pumili ng mga transisyon, “effects”, animasyon, at mga tunog/musika na pasok sa iyong istilo. Marami kang pagpipilian upang lubusang mapaganda ang iyong bidyo.

4.) Para naman masave ang edited na bidyo, pindutin ang “export” na opsyon. Maaari mo itong i-save deretso sa iyong gadget o kaya naman ay diretso sa Tiktok.

5.) I-post at i-enjoy ang iyong MoJo at ibahagi ito sa publiko at sa mga interesado sa “content” na nilikha mo sa kahit anong online na plataporma!

Naitala na mahigit sampong milyong beses na- dodownload ang aplikasyon sa buong panig ng mundo. Ang Capcut ay gawa ng Cheetah Mobile Inc, isang kilalang chinese tech company na gumawa rin ng mga nauusong games tulad ng piano tiles, dancing line at marami pang iba! Nabanggit ko na ba ns Capcut ay ang “sister app” ng JianYing, isang aplikasyon na orihinal na inilunsad sa China noong 2019. Kung ang JianYinh ay para lamang sa mga intsik, ang capcut naman ay inilikha para sa mga tao mula sa iba’t-ibang panig ng mundo, mga hindi. At dahil dito, ito ay lumawak sa buong mundo mula taong dalawang libo’t dalawampu’t (2020) at naging popular dahil sa kaugnayan o kolaborasyon nito sa online na palataporma na TikTok.