De symposii acroasibus et oratiunculis

Maria Angelorum Almela, magistra linguae Latinae Graecaeque in lyceo c. n. Agora Matritensi in oppidulo Alcobendas sito et ministra a secretis Societatis Hispanae Studiorum Classicorum, acroasim habuit aditialem, qua conspectum statumque rerum ad philologiam Classicam apud Hispanos quod attinet necnon rationes utriusque linguae docendae saepius usurpatas clare et dilucide effinxit et ostendit.

Maria Álvarez Díaz, magistra linguae Latinae et Graecae, de utriusque classicae, ut aiunt, linguae momento et pondere in vernaculis hodiernisque aliis linguis acquirendis usurpandisque, speciatim ad Anglicam et Germanicam quod attinet linguam, idque grammaticas earum rationes apprime si perspexeris, multa splendideque disseruit.

Maria Iesus Ramirez et Carmela López de Abetxuko inceptum narrarunt suum, quo discipuli linguam Anglicam exaudientes et vivida quadam ratione usurpantes bonam honestamque linguae Latinae notitiam assequi possint, quod mirum valde!

Anna Ovando, linguae Graecae quantum vis multisque nominibus nota magistra clarissimaque, novissimas eas quas nunc temporis in discipulis lingua Graeca erudiendis adhibet rationes methodosque liquide exposuit. Quibus usi usaeque pauci nostri quin Grraeciores discipulisque suaviores exagitaturi simus scholas numerabimur.

Helena González, linguae Graecae apud Studiorum Vniversitatem UNED inscriptam magistra, simulacrum id retiale et artificium, quo discipuli e longinquo lingua Graeca doceri possint, KYBERNETES nominatum eiusque in adhibendo successum assecutum lautis monstravit verbis.

Luna Clavero Agustín linguae Latinae magistra luculentam habui oratiunculam, qua vestigia ea cultus et humanitas tam Graecus quam Romanus quibus abundat quaeque aetas nostra multis in locis redolere solet, simili mostravit arte ac discipulos discipulasque suos eis rebus imbui vult. Cuius autem -dolendum!- imagines oratiunculae tantam machinula videographica vim non habuit excipiendi, quae minimae quidem ullae monstrari possint.

Germanus González, linguae Latinae magister Valentinus, eam quam nuperrime methodum sequi decreverit novam, SEQVERE ME! inscriptione, verbis fusius declaravit suis. Quae enim methodus, tota in sermonibus serendis de rebus certis necnon discipulis discipulabusque sat notis manifestisque posita, quin eorum vim linguae Latinae intellegendae et usurpandae facilitatemque foveat non potest.

Iacobus Guijarro eam habuit iucundissimam oratiunculam, sale et meridionali aceto totam sparsam conditamque, qua eius methodi directae, a Ioanne illo Oerbergio aliquando fictae, succesum bonis eis lautisque verbis et pependit et proclamavit, ut Antonio Glez. Amador magistro eamque methodum inductori necnon ipsi Iacobo eius studioso quin gratulemur fieri non potest.

Marius a Río et Angelus Ludovicus Gallego uterque linguae Latinae magister didascalica ea instrumenta retialemque paginam qua huius generis omnia colliguntur NVNC EST LOQVENDVM! inscriptam eo praebuerunt pacto, quo colloquium vividum eumque Latinum discipulos inter magistrumque omnino esse necessarium ad veram linguae notitiam adipiscendam luce clarius patuit.

Ansgarius Legionensis (Óscar Ramos more Hispanico) Latinis verbis eisque non tam puris castigatis emendatisve statum rerum apud nos Hispanos ad methodos frequentius adhibitas quod attingit difficultatesque eas ex legibus latis et constringentibus exoriri quae solent breviter carptimque adumbravit. Quibus brevissimam addidit suae ipsius experientiae in nova docendi via ingredienda notitiam.

Michael Angelus González Manjarrés, linguae Latinae in Studiorum Vniversitate Vallisoletana professor, nos allocutus est, inter alios haud secus qui fecerunt, de usu coram discipulis apud Facultatem suam methodi Oerbergianae his postremis annis facto, quanta enim ex eo exorta sit intentio discipulorum ad linguam fusius cognoscendam Latinam, id quod ipso teste numquam antea factum erat, brevissimo tempore et curriculo studiorum quin altiora tractarentur impedientibus. Cuius autem allocutionis, machinula denuo exhausta, nullae quae monstrari possint excerptae sunt imagines. Ignoscite!