(Ang nasalarawan ay sina SK Chairperson Rowen Domingo at mga kasamahan sa Philippine Army Reservist noong Search and Relief Operation ng Bagyong Nika, Si SK Domingo ay isang aktibong miyembro ng Philippine Army Reservist)

Sa tuwing may sakuna o hindi inaasahang pangyayari, agad na tumutugon ang aming grupo sa pamamagitan ng Emergency at Disaster Relief Operations.

Layunin ng mga aktibidad na ito na maihatid ang agarang tulong tulad ng pagkain, tubig, gamot, damit, at iba pang pangunahing pangangailangan sa mga pamilyang naapektuhan ng kalamidad.

Sa tulong ng mga boluntaryo at katuwang na organisasyon, naipadama natin ang malasakit at pagkakaisa ng komunidad sa oras ng pangangailangan. Ito ay tunay na bayanihan sa gitna ng unos.

Dahil sa kabutihang loob ng mga nag-sponsor, nakatanggap tayo ng mga libreng sapatos na buong pusong naipamahagi sa mga batang matagal nang nangangarap magkaroon ng sariling sapatos.

Ganoon din, ang mga pangunahing goods na ibinahagi ay naging tulong at pag-asa para sa ilan nating mga kabarangay na tunay na nangangailangan.

Isang simpleng hakbang, ngunit may dalang malaking epekto sa puso at buhay ng ating komunidad. 

Bilang bahagi ng aming layunin na mapalakas ang kabataan at mapatatag ang ugnayan sa komunidad, aktibo kaming nakilahok sa iba’t ibang gawain kasama ang mga paaralan. Naging posible ito sa pakikipagtulungan ng mga guro, administrador, at mga estudyanteng-lider.

Mula sa pagbibigay ng mga talakayan at pagsasanay, hanggang sa pagsuporta sa mga programa at aktibidad ng paaralan, hangad naming maging katuwang sa paghubog ng mga susunod na lider ng ating bayan.

Ang mga gawaing ito ay patunay ng iisang layunin ang pagtutulungan ng barangay at paaralan para sa mas maliwanag na kinabukasan ng kabataan.

Dahil sa mga nagdaang sakuna na labis na nakaapekto sa ating barangay, aktibong nakikibahagi ang mga kabataan sa proseso ng rehabilitasyon upang muling maibangon ang komunidad.

Hindi rin matatawaran ang kanilang dedikasyon, dahil tuwing huling Sabado ng bawat buwan, kusang-loob silang nagbibigay ng serbisyo para sa paglilinis at pagpapanatili ng kaayusan sa barangay.

Isang patunay na ang kabataan ay tunay na kasangga sa pagbangon at pagbabago. 

Dahil sa kalituhan ng ilang turista kung saang direksyon dadaan patungong Rolling Hills, minabuting maglagay ng signage upang magsilbing gabay para sa mga bisita. Gayundin, ang daang ito ay matagal nang bako-bako at delikado, na naging sanhi ng ilang aksidente.

Bilang tugon, sama-samang kumilos ang mga boluntaryong mamamayan, sa pangunguna ng SK ng Barangay Bugallon Proper, upang ayusin at pagandahin ang daan para sa mas ligtas at maayos na paglalakbay ng lahat. Bukod dito, naglagay din kami ng mga solar lights upang mas mapabuti ang visibility at kaligtasan sa gabi, lalo na para sa mga dumaraan.

Bilang tugon sa pangangailangang medikal at dental ng ating mga kabarangay, matagumpay na isinagawa ang Medical at Dental Mission sa tulong ng mga doktor, dentista, at boluntaryong tagapaglingkod.

Layunin ng programang ito na maghatid ng libreng serbisyong medikal at dental, tulad ng check-up, bunot ng ngipin, konsultasyon, at pamamahagi ng gamot lalo na sa mga walang kakayahang makapagpagamot.

Ang aktibidad na ito ay hindi lamang tungkol sa kalusugan, kundi isang patunay ng malasakit, bayanihan, at pagkakaisa para sa mas malusog na komunidad.