My reflections

CM211. Summer Course.

S82719410.

ASSIGNMENT 3: REFLECTION.

Tōku irinaki anga e puapinga tikai tāku i mou mai nō runga i te ‘āpi’i LL191, no te mea kāre au i kite ana i te papa’anga tupuna ō te reo Porinetia. Kua kite mai au ē, te reo Kūki Airani Māori nō Austronesia mai ē tae ua mai ki Pōrinetia. ‘E piri anga tō teia reo Kuki Airani Māori ki te reo Tahiti ē te reo Maori ō Nutireni. Tūketūke te tangi anga o te au reo o te au tangata porinetia ē perā te reo Kūki Āirani Māori. Te reo māori o te pā enua tokerau, tūketūke te tangi anga pēra te tātā anga. Te reo Pukapuka tūke rai tona tangi anga, e tangi Samoa e te Ellice. E tūke rai te tangi anga o te reo o te pā enua tonga, e taingauru mā ā tangi anga, ē iva consonants. Te pā enua tokerau e tai ngauru mā rima tangi anga i roto i tō ratou reo, ē tai ngauru consonants.

Taku moemoeā e inangaro au kia kite au i te tāta tua i roto i te reo māori. Kua riro teia ‘āpi’i ei ‘aka’ara’ara i tōku manako nō runga i te ‘aka’ma’ata atu anga i tōku inangaro i te tā‘anga’anga i te reo kia kore ē ngaro.

Tūkētūkē te au ‘āpi’i rorouira tei tā’anga’anga ia ei akara’anga nō te tātā tua ei ‘āpi’i kite tamariki ‘api’i. Kote ELAN, te Toontastic ē te tātā tua kōmiki. Kua riro tēia ei tauturu mai i tōku kite kore. ‘E tē vai atūra te au ‘āpi’i kanga’kangai tārere i runga i te rorouira ki tētai pupu ē ki tētai pupu. Mataora teia ‘āpi’i ē te tano meitaki kia kanga’kanga te tamariki ‘āpi’i.

I mua ana kāre au i kite ē’aa te āite anga ō te mākorona ē te āmata. Ī tēia rā kua rauka mai tētai mārama ou noku, e te tīmata pakari nei au i te tātā kia kore e ngaropoina. ‘E maata uatu rai te kupu tāku ē tīmata pakari nei kia mārama meitaki au, mei te pū, tumu anga’anga, verepara, verepa, nōmena e te vai atura. Kāre katoa oki au e kite meitaki ana i te ta’anga’anga, no te mea, e reo ingiriti oki te reo tāku ē tuatua putuputu ana i te au ra ravarai. Ka tīmata pakari rā au i te tā’anga’anga i teia ‘āpi’i na roto i te tuatua e te tata ? imene i roto te reo māori.

Ko te tuanga rua o te ‘api’i i teia mataiti kua tā’anga’anga ia te au rorouira ‘āpi’i tūketūke, no te tātā tua kangakanga ki runga i te Toontastic. Kua oki au i te tamou pakari kia mou meitaki tikai te ‘āpi’i no runga i te au ‘āpi’i ou tei ‘āpi’i ia mai e te puapii. Te au tū o te kupu ou, te kupu apaina ia mai, te kupu amaniia, e te kupu akarito ia. I tōku manako kāre e maata roa te au kupu amani ia i roto i to tatou reo Kūki Āirani Māori e ta’anga’anga ia nei i roto i te au ‘āpi’i kavamani. Ko tetai manako kia tauī ia te ingoa Kūki Āirani ki tetai reo tupuna, no te mea e kupu apaina ia mai e kua tāmaori ia kāre e tangi reka ana kāre oki e rito i roto i teia kupu. Te turanga o teia ‘āpi’i e maata te rito tei akāri ia mai e te au puapii na roto i ta ratou akāri anga mai na runga i te rorouira no runga i te reo Māori Kūki Āirani. Te au manako no runga i te reo māori kia akapakari te reo i te ‘āpi’i ia na roto i te au putuputu anga katoatoa i teia tuatau kia mou pakari te uki āpopo i to tātou re māori kia kore e ngaro.