Заданні першага этапу

Выберыце героя-палешука, з якім вам цікава было б сустрэцца:

1. "… Хлопец з хмурымі заспанымі вачыма, з калматай не то русявай, не то цёмнай чупрынай, з упартымі губамі" . "А вочы такія... Такіх ні ў кога няма болей... Адно як вада светлае, а другое - як жалудок!"
2. "Крамяная дзяўчына", "пругкая ў хадзе, спрытная ў рухах", "з вільготна-цёмнымі, як спелыя вішні, вачыма, з шаўкавіста-чорнымі смелымі брывамі" .
3. "Нізкарослая, з кароткімі спрытнымі рукамі, ... як бы гладкая, мяккая. "Як булка"... Выраз твару "ясны, чысцейшы. I давер’я было больш у вачах, і каса была гусцейшая, цудоўная, русявая, з водблескам золата каса» .
4. "Не глядзеў ні на кога, рукі ў кішэнях сініх фарсістых галіфэ, папяроска ў ганарліва прыкрыўленым роце..." "…Відны хлопец, з норавам", "ганарыўся чубам, фарсіў ім, чуб быў яму святой мужчынскай красою".
5. "Пляцецца, як бы ледзьве кеўляе. Дзьмухне вецер — і, здаецца, паляціць, як пясчынка тая, рассыплецца, бы трухля…"
6. "…Быў выдатны, амаль легендарны чалавек, … меў тут такі аўтарытэт, якога, мабыць, не было ні ў аднаго не толькі валаснога, але і павятовага начальніка. Ен здзіўляў людзей многіх вёсак адвагай, адданасцю справе".
7. "Плячысты з васпаватым тварам малады мужчына ў вайсковай вопратцы і зімовай шапцы з вострым верхам..."
8. "... Акуратна паголены з далікатнымі тоненькімі вусікамі-крылцамі агністага колеру, у фасоністай гарадской шапцы, - першы ў Куранях палітык і прамоўца".
9. "У падранай свіце і ў падранай шапцы, але і ў гэтым звычайным сваім убранстве ўдаваў-такі проста фарсуном: так спрытна вісела наапашкі світа, так смела ліпла да макаўкі шапка". "Бацько і матка".
10. "Гаварлівая ўдава, дужа вяртлявая жанчына", "вочы яе проста бегалі, лавілі, праглі - чаго-небудзь цікавага!"
11. "...Сам ён хваравіты, худы, аж шчокі ўваліліся, кажух такі, што і латаць няма чаго - дзірка на дзірцы, на спіне, на рукавах, усюды тырчыць поўсць..."

Заданні другога этапу

Выберыце для сябе адну з роляў і па гэтым прынцыпе аб’яднайцеся ў групы.

Гісторыкі

Ваша задача - расказаць, якія гістарычныя падзеі адбываліся на Палессі ў 20­-я гады ХХ стагоддзя. Як вырашалася праблема адносін улады і чалавека? Якімі аўтар паказвае прадстаўнікоў улады? Чаму аўтар быў занепакоены лёсам сялянства?

Географы

Прырода Палесся паказана далёкай ад ідыліі, як далёкае ад ідыліі і жыццё палешукоў. Раскажыце, якую ролю адыгрываюць у рамане пейзажныя замалёўкі.

Захавальнікі традыцый

Палешукі трымаюцца традыцый. Іван Мележ паказвае нам святкаванне Калядаў, мы прысутнічаем пры падрыхтоўцы да вяселля. А як цікава на Вячорках! Ваша задача - расказаць як адпачываюць і святкуюць палешукі.

Вяскоўцы

Тэма зямлі бачылася пісьменніку даволі шматпланава: «Зямля — карміцелька; зямля — жыццё і зямля — надзея, любоў, нянавісць». Усе героі, усе падзеі ў "Палескай хроніцы" сканцэнтраваны вакол зямлі. Як у рамане вырашаецца адна з галоўных праблем - праблема «чалавек і зямля»?

Рамантыкі

Як у рамане вырашаецца праблема кахання? Ці кахалі Васіль і Ганна адзін аднаго? Калі кахалі, то чаму не пажаніліся?

Псіхолагі

Для І. Мележа чалавек — гэта складаны свет. Каб паказаць гэты свет ва ўсёй непаўторнай праўдзівасці, пісьменнік звяртаецца да псіхалагічнага аналізу. Майстэрства І. Мележа-псіхолага выяўляецца найперш у даследаванні глыбокіх, складаных, часта супярэчлівых чалавечых перажыванняў і ўчынкаў у адзінстве з прычынамі, якія іх выклікалі. Раскрыйце на канкрэтных прыкладах псіхалагічнае майстэрства пісьменніка.