Si yes nuevu/a per equí igual nun sabes lo que ye'l filandón. Nun t'esmolezas, esplicámostelo nun momentín. Nel Diccionariu de la Llingua Asturiana (DALLA) atopamos:

filandón, el: sust. Axuntanza [de persones pa filar, pa esbillar]. 2 Axuntanza [de persones pa falar, pa pasar el tiempu]. 3 Baille [nuna boda, nuna fiesta].

Entós ¿un filandón ye una cosa asturiana? Nun tien por qué. Los filandones faense n'Asturies sí, pero tamién n'otres partes como en Castiella. Y en tolos llaos ye más o menos lo mesmo, una axuntanza de persones pa trabayar o celebrar daqué.

Y agora igual tas entrugándote ¿por qué un filandón ye tan importante como pa facé-y un proyeutu educativu? Porque'l filandón ye una parte perimportante de la nuesa cultura. El filandón yera un llugar pa falar na llingua del país, pa cuntar histories y cuentos, pa cantar romances vieyos, pa baillar, pa cortexar, pa comer... yera un llugar nel que se palpaba una cultura que tamos escaeciendo adulces. Y como nós nun queremos perder la nuesa cultura, tampoco queremos escaecer los filandones. Échanos un gabitu.