Créditos

Esta Web Quest foi elaborada para o alumnado de 5º e 6º de Ed. Primaria.

A tarefa proposta afonda nos contidos curriculares desenvoltos no bloque 2 (O ser humano e a saúde) de 5º e 6º de Ed. Primaria na asignatura de Ciencias Naturais.

A temporalización estimada son 4 sesións:

• 1º sesión: Presentación da WebQuest, formación dos grupos e comezo do traballo coa primeira actividade

• 2º e 3º sesión: continuación da primeira actividade e realización da segunda.

• 4º sesión: finalización da WebQuest realizando a 3º actividade

Os contidos traballados a través desta WebQuest son os seguintes:

• Saúde e enfermidade.

• Principais enfermidades que afectan aos aparellos e sistemas do organismo humano.

• Hábitos saudables para previr enfermidades.

• Trastornos alimenticios.

• Efectos nocivos do consumo de alcohol e drogas.

• Tipos de dietas. Elaboración de menús saudables. Clasificación de alimentos.

Os obxectivos curriculares relativos aos bloques citados anteriormente son os seguintes:

a) Coñecer e apreciar os valores e as normas de convivencia, aprender a obrar de acordo con elas, prepararse para o exercicio activo da cidadanía e respectar os dereitos humanos, así como o pluralismo propio dunha sociedade democrática.

b) Desenvolver hábitos de traballo individual e de equipo, de esforzo e de responsabilidade no estudo, así como actitudes de confianza en si mesmo/a, sentido crítico, iniciativa persoal, curiosidade, interese e creatividade na aprendizaxe, e espírito emprendedor.

c) Adquirir habilidades para a prevención e para a resolución pacífica de conflitos que lles permitan desenvolverse con autonomía no ámbito familiar e doméstico, así como nos grupos sociais cos que se relacionan.

d) Coñecer, comprender e respectar as diferentes culturas e as diferenzas entre as persoas, a igualdade de dereitos e oportunidades de homes e mulleres e a non discriminación de persoas con discapacidade nin por outros motivos

e) Coñecer e utilizar de xeito apropiado a lingua galega e a lingua castelá, e desenvolver hábitos de lectura en ambas as linguas.

h) Coñecer os aspectos fundamentais das ciencias da natureza, as ciencias sociais, a xeografía, a historia e a cultura, con especial atención aos relacionados e vinculados con Galicia.

k) Valorar a hixiene e a saúde, aceptar o propio corpo e o das demais persoas, respectar as diferenzas e utilizar a educación física e o deporte como medios para favorecer o desenvolvemento persoal e social.

m) Desenvolver as súas capacidades afectivas en todos os ámbitos da personalidade e nas súas relacións coas demais persoas, así como unha actitude contraria á violencia, aos prexuízos de calquera tipo e aos estereotipos sexistas e de discriminación por cuestións de diversidade afectivo-sexual.

As competencias básicas traballadas son:

1º. Comunicación lingüística (CCL).

2º. Competencia matemática e competencias básicas en ciencia e tecnoloxía (CMCT).

4º. Aprender a aprender (CAA).

5º. Competencias sociais e cívicas (CSC).