Lestrardagbók

Lýstu aðalpersónunni og andstæðunni:
Skrifaðu sex til 10 (6-10) lýsingarorð sem lýsa aðalpersónu bókarninnar. Finndu síðan samheiti OG andheiti þessara orða.
Gott er að setja verkefnið upp í þremur dálkum.

Lýstu persónu með hugtakakorti:
Settu nafn persónunnar í miðjuna.
Notaðu bæði orð og myndir til að lýsa persónunni.
Lýstu fjölbreyttum þáttum persónunnar (útliti, skapgerð, félagslegri stöðu, áhugamálum, búsetu, aldri, tilfinningalífi, forréttindum o.fl.)

Auglýstu bókina:
Búðu til auglýsingu fyrir bókina. Í auglýsingunni þurfa að vera bæði myndir og texti og hún þarf að sannfæra fólk um að bókin sé þess virði að lesa hana.

Kahoot um kafla:
Búðu til fjórar krossaspurningar úr síðustu köflum sem þú last. Með hverri spurningu þarftu að hafa fjóra (4) svarmöguleika og merkja rétta svarið með stjörnu. Þú getur búið spurningarnar til á Kahoot og skilað skjáskotum eða skrifað þær upp á annan hátt.

Skrifaðu fréttina:
Veldu ákveðinn atburð í bókinni og skrifaðu frétt um hann. Hafðu grípandi fyrirsögn á fréttinni og skrifaðu textann eins og hann eigi að birtast á vefmiðli á borð við visir.is eða ruv.is.

Upplestur:
Lestu kafla úr sögunni upphátt og skilaðu upptöku af lestrinum. Vandaðu framsögn og túlkaðu textann til að halda athygli hlustenda.

Meðmæli á Instagram:
Skrifaðu stutt skilaboð til vinar/vinkonu eins og þú gætir sent á Instagram eða öðrum samfélagsmiðli. Útskýrðu hvers vegna þetta er einmitt rétta bókin fyrir hán/hana/hann.

Skrifaðu orðalista:
Skrifaðu orðskýringar fyrir 5-10 orð sem skipta miklu máli í síðustu köflunum sem þú last.

Myndglósur:
Glósaðu efni síðustu kafla sem þú last með einföldum myndum og örstuttum textum.
Í þessari kynningu á canva.com eru leiðbeiningar og kennslumyndbönd fyrir byrjendur í myndglósugerð.

Lagalisti:
Veldu 1-3 lög sem þér finnst lýsa bókinni á einhvern hátt. Taktu fram nafn lagsins og flytjanda eða höfund. Útskýrðu stuttlega hvernig lögin tengjast sögunni eða sögupersónum.

Landakortið:
Teiknaðu landakort sem sýnir hvar sagan gerist. Merktu 3-5 atburði eða mikilvæga staði í sögunni inn á kortið.

Bókakápa:
Hannaðu nýja bókakápu eða forsíðu á bókina. Gættu þess að nafn bókarinnar sé skýrt og að nafn höfundar komi líka fram. Myndskreyttu á viðeigandi hátt.

Allt tengist:
Skrifaðu bréf til aðalpersónu sögunnar og útskýrðu fyrir henni hvernig saga hennar tengist þér og þínu lífi.

Tölfræði lestrardagbókarinnar:
Settu upp töflu sem sýnir hvað þú hefur lesið mikið síðustu tvær til fjórar (2-4) vikur. Settu upplýsingarnar úr töflunni fram í myndriti, t.d. línuriti.

Skrifaðu ljóðið:
Skrifaðu ljóð sem lýsir átökum og/eða tilfinningum sem birtast í bókinni sem þú ert að lesa.

Bókarýni á netinu:
Stendur eitthvað um bókina á netinu? Gerðu stutta samantekt um það sem þú finnur.

Hvað ef...?
Hvað ef aðalpersóna sögunnar væri af öðru kyni en hún er í bókinni? Hefði sagan verið eins? Skrifaðu hugleiðingar þínar um þessa spurningu.

Tuttugu árum síðar:
Ímyndaðu þér hvað ein sögupersónan gæti mögulega verið að gera 20 árum eftir að sagan gerist og skrifaðu það niður. Hvers vegna sérðu hana fyrir þér í þessum sporum.