Melshornløpet

NM i motbakkeløp 2026 – Volda og Melshornet klare for folkefest! 

Foreininga Melshornets venner, i samarbeid med VTI Friidrett, er stolte over å få arrangere Noregsmeisterskap i motbakkeløp 2026 – med start i Volda sentrum og målgang på majestetiske Melshornet (807 moh).

Dette blir første senior-NM i Volda sidan 1981, då Noregsmeisterskapen i alpint vart arrangert på Reset. Den gongen i vinterdrakt – no i sommarversjon, men på eit like spektakulært fjell like ved. Løypa vil også gå forbi Turnhytta, som i dag blir driven av Melshornets venner, og som er ein sentral del av både løpsdagen og friluftslivet i området.

Mads Melbø, leiar for arrangementskomiteen, ser på tildelinga som eit løft for heile regionen:

– Melshornløpet har samla eit imponerande startfelt beståande av både eliteutøvarar, mosjonistar og ungdom sidan oppstarten. At vi no, saman med VTI Friidrett, får arrangere eit NM, gir løpet ein ekstra dimensjon. Vi forventar ein ekte folkefest i heile Volda denne dagen. Vi ønskjer både løparar og publikum hjarteleg velkomne til ein uforgløymeleg dag i fjellet.

Arrangementskomiteen er leia av Mads, som har vore primus motor for å få eit NM til Volda. Saman med seg har han Bjørn Brudevoll og Ole Sunde. Samarbeidet med VTI Friidrett, ved Johan Roppen, gir komiteen ekstra tyngde og fokus inn mot det viktige løpet i 2026.

Eit krav i NM-samanheng er at ein skal ha fleire aldersklasser enn til vanleg – heile 13 klasser for både kvinner og menn. Det kjem garantert til å bli knallhard kamp om medaljane i fleire av klassane, medan det i dei yngste og eldste klassane kan vere meir ope både på dame- og herresida. I enkelte klasser vil ein faktisk kunne bli noregsmeister berre ved å delta.

Ein stor takk går til hovudsponsor Sparebanken Møre, som gjer det mogleg å gjennomføre løpet på eit høgt nivå. Atle Driveklepp, finansiell rådgivar i banken, seier:

– Vi i Sparebanken Møre er imponert over jobben Melshornets venner og VTI Friidrett gjer for lokalsamfunnet, og vi deler mange av dei same verdiane som dei har. Vi gler oss saman med dei over tildelinga av eit NM, og er sikre på at dette vil gi både deltakarar og publikum eit minne for livet. Dette er eit arrangement som løftar heile regionen.

Melshornløpet mini – barnas store høgdepunkt – vil sjølvsagt også vere ein viktig del av NM-helga.

Melshornløpet 2025 går av stabelen laurdag 6. september, og blir ei viktig generalprøve før NM året etter. Arrangørane ønskjer alle velkomne til ein ny folkefest – med god stemning, ein framifrå trasé, flotte premiar og kanskje litt sol over tindane. Som alltid stiller dei med mange og svære uttrekkspremiar for alle deltakarar, i tillegg til premiepengar til dei raskaste.