Во 1967 избран на огласот за дописник од Тетово на весникот ’Вечер’ каде останува цели 34 години се до 2001. Дописник е и на други бројни весници (подолу цела листа).

Во 1969 заедно со Живко Стефановски се основачите на Локалниот Весник ПОЛОГ, како орган на Сојузот на Социјалисти на Тетово, кој потоа се обединува со Радио Тетово во 1971 во еден 'Центар за Информирање и Издавачка Дејност ’ПОЛОГ’ - Тетово'. Токму Ефтоски бил и Директор на овој центар од 1975 до 1983.

Во 1974 завршува и едногодишна школа на тогашниот престижен Југословенски Институт за Новинари во Белград, каде еден од неговите професори е и познатиот писател и новинар Момо Капор.

Автор е на 8 книги за Тетово (види подолу листа)

Значаен придонес има и во спортскиот живот со тоа што во 1980-тите е член на одборот на Одбојкарскиот Клуб Љуботен а во еден период и Претседател. Член на одбојкарскиот сојуз на Македонија и на Југославија (таму и член на претседателството).

Од 1999 до денес е редовен дописник од Тетово за Весникот 'Утрински Весник'.

На прашањето, на кои негови написи во кариерата е најповеќе горд, јасно одговара дека тоа се репортажите кои ги објавува во весниците, а се однесуваат на цели историски теми за историјата на Тетово (хоровите, школството, Лешок итн).

Ефтоски напоменува дека според неговата евиденција во целокиупниот негов дописнички стаж во овие 50 години (1967-2017) тој има објавено над 30.000 прилози. Според пресметките, ако тие се во просек текстови од половина страна тоа значи дека има објавено над 15.000 страници текст. На шега вели: тоа ’во превод’ би биле дури 150 романи од по 100 страни...

Негови идни планови, покрај ангажманот како дописник за ‘Утрински Весник’ и ‘Пензионер’ се и објавување на уште 3 книги со неговите новински написи за Војната 2001, Како и Неговите Новински Репортажи од Тетово, и новинските исечоци 'На минута со...' кое го објавуваше како дописник за Утрински.

Весникот и Издавачки Центар ПОЛОГ

Ефтоски ни раскажа за историјата на Издавачкиот Центар Полог (каде 7 години бил и Директор) и двата најважни делови на овој Ценар: Весникот Полог и Радио Тетово:

1967 во Работничкиот Униврзитет (стариот, на местото на денешниот ГТЦ во Тетово) се формира Радио Тетово со 15 ватна станица по иницијатива на Бране Штакле како орган на Работничкиот Универзитет

1967 – Го формираат заедно со Живко Стефановски весникот Полог каде он е Главен и Одговорен Уредник а Живко Директор, првин на Македонски и Албански јазик, еднаш месечно. 

1971 се спојуваат Полог и Радио Тетово во Центар за Информирање и Издавачка Дејност 'Полог' –Тетово – како орган на Социјалистички Сојуз на Општина Тетово

1975 излегува тројазично (сега и на Турски), а Центарот го превзема и водењето на Службениот весник на Општина Тетово. 

Седиштето на весникот е напрвин од 1967 во денешната зграда на денешното Биро за Социјални Работи во Тетово (ул.121), од каде 1971 им се придружува и радио Тетово префрлајќи се од Работнички Универзитет тука. Од 1976/7 Центарот се префрла во зградата на ул.Радован Цониќ (спроти Тетовскиот Музеј) каде останува до крајот.

Издавачкиот центар во чиј склоп е и Радиото и Весникот од 5-6 вработени на почетокот станува на 24 вработени до 1983. Издавачката дејност покрива издавање и на над 40 наслови на книги на различни автори од Македонија.

1973/4 - Ефтоски е иницијатор за формирање на ’Здружение на Локални радио Станици во Македонија’ кое функционира до 1990-тите.

Од 1975 до 1983  Директор на Центарот за издаваштво ’Полог’ е токму Гојко Ефтоски.

1975/6 – На Радио Тетово се воведува емисија на 4-ти јазик: Ромски – со што Радио Тетово влегува во историјата како Радио на кое прв пат во светот се слушнал Ромскиот јазик

Посебно горд е што за време на неговиот манадат како директор, во 1981 се отвора зградата на Радио Тетово на патот кон Брвеница опремена со предавател од 2 кв, со среднобранова антена, ултра кратки бранови, 2 студија (мало и големо), скривница, најсовремен агрегат за струја...

Се сеќава дека Радиото било толку рентабилно, особено со ‘поздрави и честитки’ што во одредени периоди само 10% од приходите биле од страна на општината и тоа можело да се самоодржува.

Дејноста на издавачкиот центар, весникот Полог и Радио Тетово трае до 1990-тите кога згаснуваат особено по Законот за приватизирање на локалните радио станици.

Ефтоски во својата кариера е тетовски дописник на:

• • Радио Гостивар 

  • Млад Борец 

  • Студентски Збор 

  • Компас (локален тетовски весник)

  • Монитор (локален тетовски весник)

  • Неколку ревијални весници во Македонија 

  • Борба (на сојузно ниво, во 1970-тите) 

  • Весник ’Фудбал’ 

  • Весник ’Спорт’

  • Од 1967 до 2001 - весник ’Вечер’ 

  • Од 1999 до денес – ’Утрински Весник’ 

  • 2003/2004 – Радио Детроит на Македонски Јазик во САД

  • Од 2011/12 до денес – весник ’Пензионер’ 

Книги на Ефтоски:

Ефтоски е самостоен автор или коавтор на неколку монографии и книги:

• • 1979 - ФК Љуботен Тетово : 60 години : [1919-1979] - Ефтоски Гојко

  • 1979 - Солидарноста на дело - Стефановски Живко, Ефтоски Гојко, Алити Абдурахман 

  • 1980 - Тетово и околината - Стефановски Живко, Ефтоски Гојко 

  • 1982 - Југохром : монографија - Наумовска Магдалена, Ефтоски, Гојко 

  • 1983 - Распукнала Шар Планина : [изворни народни песни од Тетово и Тетовско] - Крстовски-Томе Тихомир, Ефтоски Гојко, Павловски Јован, Момировски Томе, Кузманоски Павле 

  • 2002 - Нашиот херој Цоки (прво издание) - Ефтоски Гојко 

  • 2012 - 65 години пензионерска организација Тетово - Ефтоски Гојко 

  • 2015 - Нашиот херој Цоки (второ издание) - Ефтоски Гојко