Noticias

O proxecto eólico de Arena Power ameaza o 40 % do subministro de auga de Marín, Moaña e Vilaboa

  • Non sería posible garantir o abastecemento de auga da Escola Naval Militar

  • O sector marisqueiro podería verse afectado por escorras de auga doce, debido á pouca permeabilidade do solo

  • Un de cada tres aeroxeradores invadirían a zona de policía de varios cursos fluviais

O informe hidrolóxico difundido pola Plataforma Eólicos no Morrazo Non conclúe co alarmante dato de que, polo menos, o 40 % do volume anual de auga dos municipios de Marín, Moaña e Vilaboa podería verse afectado dada a proximidade da infraestrutura eólica ás numerosas captacións das traídas veciñais.

O abastecemento de auga no Morrazo é garantido a través das Comunidades de Usuarios de traídas veciñais cuxas captacións están localizadas nas partes máis altas. Por este motivo, representantes da plataforma insisten que calquera proxecto de Parque Eólico no Morrazo é incompatible co abastecemento de auga aos seus habitantes.

Tanto é así, que nin a Escola Naval Militar de Marín se libraría do risco de desabastecemento, pois os aeroxeradores estarían a unha excesiva proximidade das 21 captacións que a institución militar ten no monte en man común de San Tomé de Piñeiro.

A construción da infraestrutura macroeólica, con aeroxeradores de 180 metros de altura, implicaría novas pistas e voaduras con explosivos para a construción das zapatas que afectarían a capa freática e os mananciais utilizados para o consumo.

O informe destaca outros elementos en risco desde o punto de vista hidrolóxico, como a posible afectación dun sector como o marisqueiro, que xera 55 millóns de euros anuais, en caso de producirse escorras de auga doce motivadas pola pouca permeabilidade do solo.

Adicionalmente, un de cada tres aeroxeradores invadirían a zona de policia de varios cursos fluviais segundo as localizacións publicadas do Rexistro Eólico de Galicia, ao que habería que engadir todas as plataformas, vías e liñas de evacuación do proxecto, por agora non dispoñibles ao público.

As conclusións do informe de ‘Eólicos no Morrazo Non’ salientan que a afección hidrolóxica na comarca podería ser maior, pois aínda se descoñecen moitos detalles do proxecto de Arena Power. Actualmente aínda non hai información de aspectos como as plataformas de construción, as liñas de evacuación ou as vías que habería que crear ou ensanchar para a construción do Parque Eólico.

‘Eólicos no Morrazo Non’ demanda a eliminación da ADE

A plataforma salienta que a Área de Desenvolvemento Eólico está totalmente rodeada por diferentes figuras de protección como a Reserva Mariña Internacional das Rías Baixas ou a Enseada de San Simón e este ou calquera outro proxecto eólico non serían compatibles nin coa biodiversidade nin coas persoas.

E altamente relacionado coa protección da biodiversidade, unha serie de zonas húmidas, como as Brañas de Corno Pineda ou do Monte Sobreira, quedarían rodeadas polos aeroxeradores, o cal «sería incompatible coa súa protección» lamentan representantes da Plataforma Eólicos no Morrazo Non, concluíndo que «ningún proxecto eólico é compatible cos 90.000 habitantes desta comarca e, por tanto, a Área de Desenvolvemento Eólico debe ser eliminada canto antes».

DESCARGA O INFORME EN: https://rebrand.ly/hidroloxia

Catro especies de morcegos do Morrazo estarían en risco por colisión cos aeroxeradores

• A única colonia de morcegos Bechstein de Galicia localízase no Morrazo.

• Os mamíferos voadores controlan pragas e melloran a saúde das persoas.

Un informe publicado pola Plataforma Eólicos no Morrazo Non revela que catro especies de morcegos do Morrazo terían risco de morte por colisión coas pas dos aeroxeradores.

Das trece especies existentes na península morracense, seis están catalogadas como vulnerables e unha delas ten no Morrazo a única colonia coñecida de Galicia.

O estudo sinala que, aínda que haxa especies vulnerables con risco de colisión baixo, estas dependen intimamente de formacións de caducifolias, xa moi escasas na comarca. Nesta liña, a salientan que construción dun parque eólico degradaría o seu hábitat fragmentándoo considerablemente.

A península do Morrazo conta con máis da metade das especies que se citan en Galicia e é a segunda zona con maior diversidade de quirópteros da provincia.

A comunidade científica ten alertado nos últimos anos do preocupante índice de mortandade de morcegos por causa dos macroeólicos, estimando para España con 385.000 morcegos mortos anualmente.

O proxecto de parque eólico do Morrazo proposto por Arena Power, tal e como recolle a pouca documentación oficial dispoñible, implicaría a morte de 1000 morcegos por ano, segundo os valores medios máis recentes.

Os morcegos galegos aliméntanse de insectos que poden constituír pragas agrícolas ou forestais, como a procesionaria do piñeiro, así coma vectores de enfermidades, como os mosquitos. Desta forma, a presenza de poboacións de morcegos ben conservadas contribúe a mellorar a saúde dos ecosistemas e, por tanto, das persoas.

Descarga o estudo en: https://rebrand.ly/morcegos

ROLDA DE PRENSA CONXUNTA PLATAFORMA EÓLICOS NO MORRAZO NON E AS ALCALDÍAS DE MOAÑA, VILABOA, CANGAS E BUEU

• As 4 alcaldías reiteran que a Xunta de Galicia debe rexeitar este proxecto eólico 

Asistencia: Moncho Millán presidente da Mancomunidade de Monte do Morrazo, en representación da “Plataforma Eólicos no Morrazo NON”. Polo concello de Moaña, a alcaldesa Leticia Santos, a concelleira de medio ambiente Dolores Chapela, e os presidentes das comunidades de montes de Domaio, Rubén García, de Moaña David Faria e de Meira Manuel Currás. Polo concello de Vilaboa, o alcalde César Poza, o concelleiro de medio ambiente Francisco Costa e o presidente da comunidade de montes de San Adrián Ricardo Lameiro. Polo concello de Bueu asistiu o alcalde Félix Juncal e o concelleiro de medio ambiente Xosé Leal. Polo concello de Cangas asistiu a alcaldesa Araceli Gestido. Por Marín asistiu o presidente e secretaria da comunidade de montes de San Tomé de Piñeiro, Daniel Rosales e Mari Carmen Rosendo.

Máis do 80 % das mámoas do Morrazo en risco polos proxectos eólicos

• A mámoa da Chan do Gagán a 13 metros dun aeroxerador

• Varios Bens de Interese Cultural rodeados polo proxecto de Parque Eólico 

Este é o dato máis preocupante do recente informe difundido pola Plataforma Eólicos no Morrazo Non sobre o Patrimonio Cultural da comarca afectado pola Área de Desenvolvemento Eólico. Non menos preocupantes son outros datos: 3 de cada 10 Bens de Interese Cultural do Morrazo están afectados e un 16 % do total do Patrimonio Cultural.

Con respecto á escasa información pública de que se dispón sobre o proxecto de Parque Eólico no Morrazo, promovido por Arena Power, cabe destacar a proximidade dos aeroxeradores con elementos como a mámoa da Chan do Gagán: unicamente 13 metros separan o seu contorno de protección do voo das pás do aeroxerador Ballestrinque 16. O petróglifo do Gorgullo quedaría a 44 e 109 metros doutros dous aeroxeradores.

Cun grao de protección maior, elementos BIC como a mámoa da Chan da Arquiña, a 152 metros do seu contorno de protección, ou a Mámoa do Rei a 318 metros.

Hórreos, achados, xacementos e muíños completan unha longa lista de patrimonio cultural realmente próximo ás localizacións das infraestruturas eólicas.

A parroquia con maior número de elementos afectados pola ADE é Santo Adrán de Cobres, con 95 elementos, e San Tomé de Piñeiro, con 57, é o que conta con maior proporción de elementos afectados, máis da metade do total.

Do total de patrimonio localizado na Área de Desenvolvemento Eólico, o de interese etnolóxico (hórreos, muíños ou fontes) é o máis afectado, o 67 %, aínda que o arqueolóxico conta cun 29 %, principalmente mámoas e petróglifos.

Elementos de interese artístico tamén están afectados pola Área, tales como a igrexa parroquial, o cemiterio e a casa reitoral de Ermelo, a Capela do Pirelo no Pereiro, a Ermida de San Lourenzo en Domaio e varias pontes, casas e conxuntos tradicionais.

O informe conclúe salientando a urxencia de parar o antes posible este proxecto, para que non pase como no Acibal ou no Iribio (proxecto anulado polo TS despois de ter destrozado a Serra). Incídese en que un único aeroxerador abrirá a porta a máis Parques Eólicos e que 287 elementos do Patrimonio Cultural están potencialmente afectados. 

A Plataforma Eólicos no Morrazo Non insiste en que a cuestión non é cal sería a mellor localización dos aeroxeradores para causar o menor dano posible, o debate debe centrarse en eliminar a Área de Desenvolvemento Eólico nunha comarca tan poboada e con tanta riqueza patrimonial, para que non teñamos cada certos anos unha ameaza como esta enriba da mesa.

DESCARGA O INFORME EN: https://rebrand.ly/info-patrimonio

Unha simulación do Parque Eólico no Morrazo mostra a desfeita

• Aeroxeradores rozan os núcleos de poboación 

• As consecuencias para o abastecemento de auga son imprevisibles 

A Plataforma Eólicos no Morrazo Non publica unha simulación a partir da escasa información pública do proxecto de Parque Eólico no Morrazo, promovido por Arena Power. Nel pódese observar á escala os aeroxeradores, a súa localización e o enorme impacto paisaxístico en que derivaría a súa posible construción.

A proximidade aos núcleos de poboación provoca incerteza en canto ás consecuencias para a saúde das persoas polos efectos derivados do ruído ou parpadeos. Lugares como a Fraga (Moaña), Pastoriza (Ardán), Pereiro (San Tomé), Sobreira (San Adrián), Vilar (Santa Cristina) ou San Lourenzo (Domaio) sufrirían as consecuencias máis directas onde nalgúns casos quedarían incluso rodeados dos aeroxeradores.

Igualmente, nunha comarca en que o abastecemento de auga é asegurado a través de traídas veciñais con captacións que proveñen do monte, resultaría complicado garantir o abastecemento despois de dinamitar o monte, práctica que testemuñamos recentemente no monte Acibal (Amil).

Non menos importante é o patrimonio cultural, principalmente mámoas e petróglifos, que quedan realmente próximos das infraestruturas eólicas, nalgúns casos a 13 metros do Contorno de Protección, o que fai difícil responder á pregunta de como sería posible levar en camións palas de 75 metros sen danar ningún elemento patrimonial. 

Unha imaxe vale máis que mil palabras. Convidamos a todos a ver a simulación, informarse e mobilizarse para deitarmos abaixo, canto antes, este proxecto.

O 10 de novembro do 2021, na Casa da Cultura de Ardán, veciñanza e colectivos da Península do Morrazo, decidimos crear a plataforma "Eólicos no Morrazo Non" e acordamos levar a cabo as accións que sexan necesarias para a paralización dos proxectos que pretenden a instalación dun número indeterminado de aeroxeradores nos montes do Morrazo. 

Consideramos que non é viable nunha área tan densamente poboada como o Morrazo (90.000 habitantes) instalar uns parques eólicos deste calibre sen causar un enorme impacto paisaxístico, medioambiental, económico e tamén sobre a calidade de vida dos veciños e veciñas que vivimos nesta comarca polas seguintes razóns:

1. As pistas, desmontes no terreo necesarios para subir e montar estas enormes estruturas, que poden acadar os 200 metros de altura, aos montes máis altos da comarca, arruinarán a paisaxe do Morrazo. Estes cortes no monte producirán tamén graves danos nos acuíferos polo que a dispoñibilidade de auga corrente verase comprometida.

2. O ruído e o efecto sombra ("discoteca") destes macromuíños afectará a zonas poboadas da comarca, diminuíndo a calidade de vida dos seus habitantes e podendo chegar a provocar trastornos como estrés ou depresións. Ademais, aínda non están claras as repercusións na saúde das radiacións electromagnéticas que producen as liñas de alta tensión. necesarias para evacuar a enerxía producida.

3. O valor das propiedades e fincas diminuirá sensiblemente (calcúlase até nun 30%) xa que ninguén quererá vivir ou mercar unha casa á sombra dos eólicos. Ademais, o solo do polígono afectado perde a cualificación de rústico e pasa a ser rústico de protección de infraestruturas.

4. O turismo tamén se verá seriamente afectado pola perda da beleza paisaxística da comarca. Especialmente aqueles negocios que potencian o goce da natureza, como as casas rurais. Mais tamén todas aquelas actividades asociadas ao goce do monte: sendeirismo, micoloxía, parapente, fotografía da natureza...

5. A fauna e a flora tamén sufrirán as consecuencias deste proxecto, xa que estamos a falar de construír basicamente unha liña de "autoestradas" que una os cumios do Morrazo. Así fragmentaranse totalmente moitas zonas naturais como brañas, breixeiras ou bosques de ribeira, todos eles hábitats protexidos pola Unión Europea. Ademais, están demostrados os graves danos que producen estas instalacións sobre as poboacións de aves e morcegos, varias delas en situación de ameaza ou perigo.

6. Estes megaproxectos, están financiados por grandes empresas que levan máis dun 95% dos beneficios mediante a venda de enerxía conseguida co sacrificio dos montes galegos. Por riba, moitos destes proxectos están subvencionados en máis dun 50% polas distintas administracións. Este parque eólico non vai supoñer beneficio ningún para a bisbarra do Morrazo, nin para os concellos afectados. Estamos ante un modelo de destrución do territorio e exportación de beneficios, propio dunha economía colonial.

7. Esta plataforma está totalmente a favor das enerxías renovables sempre que sigan un modelo local, sustentable e mancomunado. É dicir, instalacións máis pequenas, de carácter comunitario de ámbito local ou particular.

8. Esta plataforma cre importante lembrar que Galiza xa ten instalados máis de 4.000 muíños eólicos. Ademais, a nosa Comunidade é excedentaria en produción de enerxía; así por exemplo, no 2020 xerou 24.000 GWh e só consumiu 17GWh. Hai que destacar ademais que destes 24GWh o 75% foi xerado con tecnoloxías que non emiten CO2 (eólica e hidráulica), polo que Galicia xa sacrificou gran parte do seu territorio para a xeración dunha enerxía "limpa" que, en moitos casos, exportase a outras comunidades como Madrid, casualmente a única do estado español que non ten ningún parque eólico.

9. Queremos sinalar a nosa indignación pola opacidade con que se está xestionando todo este proceso, de costas á cidadanía. As empresas andan ás agochadas, poñéndose en contacto coas e cos propietarios dos montes amosando supostos anteproxectos e derivando neles a responsabilidade de decidir sobre un proxecto moi grande, que afecta a todos os sectores da comarca. Neste senso, consideramos que as ganancias económicas que ofrecen estas empresas son ridículas se as comparamos coa destrución do territorio que producen. Deberían amosar os anteproxectos publicamente a todos os concellos para que a cidadanía e os propios concellos poidan participar de xeito democrático nun asunto tan importante para a comarca do Morrazo.

10. E por todo isto demandamos a derrogación do Plan Sectorial Eólico de Galiza, así como a retirada da ADE (Área de Desenvolvemento Eólico) do Morrazo e de calquera proxecto ou anteproxecto de instalación eólica que poña en perigo a integridade ambiental da península do Morrazo.