Petroglifo de O Castriño

Localízase en Conxo, Santiago de Compostela, e trátase dun dos petroglifos máis coñecidos do espazo rupestre galaico. Coñecido polos seus gravados onde dominan de forma absoluta as representación de armas.

Os gravados dispóñense sobre unha laxe inclinada cara o oeste, coincidindo coa liña da muralla do castro que lle da nome. Na parte inferior localízase un grande motivo triangular que foi definido como un escudo ou escutiforme. Xunto a el, un grupo de catro espadas ou puñais, un deles unido a un motivo escaleiriforme, que seguro que formara parte ca coroa dun motivo triangular como o anterior, pero en peor estado de conservación ou non conservado. Máis arriba represéntanse dous puñais enfrontados polo mango, e un peor conservado no medio. Entre este grupo e o primeiro obsérvase unha alabarda e un novo motivo triangular (escutiforme). Na parte superior, máis confusa e erosionada, achéganse a ver dúas ou tres alabardas e un posible escudo.

Mentres que o resto de motivos son pequenos e non se conservan de maneira óptima ou non están ben definidos.

Acceso

Saíndo de Santiago pola rúa Rosalía de Castro continúase recto durante un quilómetro e catrocentos metros ata que se localice a Finca da Rocha. Nesta zona deberase deixar o coche e seguindo o camiño que bordea o castro de Conxo, a cen metros abrirase un sendeiro que ascende ata o petroglifo.