Capela de San Lázaro
A capela de San Lázaro é un templo católico situado no barrio do mesmo nome, na beira do Camiño Francés.
Denominación: capela de San Lázaro
Tipoloxía: edificios relixiosos
Cronoloxía: 1927
Etiquetas / Uso: Patrimonio da Humanidade...
Localización: rúa de San Lázaro, 28
Coordenadas: 42.886655801088075, -8.519949891204952
Propiedade: Pública
A reforma do hospital de San Lázaro en 1882 tivo, como consecuencia, que se devolvese a capela de San Lázaro, fundada orixinalmente en 1149, a súa situación xunto ao Camiño Francés, conservando unicamente a cruz antefixa que coroa o testeiro do campanario. O edificio actual foi promovido por Enrique Campos, párroco da Colexiata de Santa María do Sar, e executado por Fernando Ragel e Jesús López de Rego en 1924. A igrexa foi consagrada en 1927.
De estilo ecléctico, concibiuse como unha igrexa dunha soa nave, con presbiterio recto, lixeiramente elevado sobre o nivel do chan, sancristía posterior e porta lateral de acceso directo á nave. Esta está sostida por arcos apuntados; estes e mais as súas bóvedas, feitas en formigón armado, cargan sobre os seus contrafortes dispostos nos muros laterais.
En conxunto pódese definir como un edificio neogótico, como o reflicten as grandes xanelas apuntadas que esguizan cada un dos tramos da nave e a forma tamén apuntada da portada. A espadana é de carácter rexionalista, con dous arcos de medio punto e un óculo intermedio coroado pola cruz antefixa da antiga igrexa.
Bibliografía:
Compostela Verde (n.d.). Compostela Verde|Parques e Xardíns de Santiago. Recuperado de https://compostelaverde.santiagodecompostela.gal/# [consulta 28/02/2024]
Troiano, X. (23 de agosto de 2013). Capela de San Lázaro [Mensaxe nun blog]. Patrimonio Galego. Recuperado de http://patrimoniogalego.net/index.php/48305/2013/08/capela-de-san-lazaro-2/ [consulta 28/02/2024]