Estadio Municipal Verónica Boquete de San Lázaro
O Estadio Municipal Verónica Boquete de San Lázaro, coñecido ata 2018 como Estadio Multiúsos de San Lázaro, é un estadio situado no barrio de San Lázaro. Nel caben 16.666 persoas, e as súas dimensións son 105 x 68 metros. Desde 2018 leva o nome da futbolista compostelá Verónica Boquete.
Na actualidade é o feudo local do SD Compostela. Nas súas instalacións teñen as súas sedes a Dirección Xeral para o Deporte da Xunta de Galicia, o departamento de Deportes do Concello de Santiago, a Delegación local de Fútbol, a Federación Galega de Baloncesto, a Federación galega de Caza, a Escudería Compostela, o Comité local de árbitros de Fútbol e o Moto Club Compostela.
Denominación: Estadio Municipal Verónica Boquete de San Lázaro
Tipoloxía: infraestruturas/enxeñaría fabril
Cronoloxía: 1993
Etiquetas / Uso:
Localización: Avda. de Fernando Casas Novoa, 20
Coordenadas: 42°52′58″N 8°30′58″O
Propiedade: Pública
Foi deseñado polo arquitecto coruñés Andrés Fernández-Albalat. O campo é de herba natural. A súa construción comezou en 1991, no arrabalde leste da parroquia de San Lázaro. O estadio ten forma oval e o tellado de cor terracota, deseñado para aguantar unha posible ampliación cun segundo chanzo no lado oeste. O campo está rodeado dunha pista de atletismo de case 400 metros de lonxitude, algo inusitado nos estadios españois. A maior parte dos seareiros poden estar sentados en cadeiras individuais, todos eles baixo cuberto.
A inauguración tivo lugar o 24 de xuño de 1993, cun torneo a catro entre o Deportivo da Coruña, o CD Tenerife, o Club Atlético River Plate e o Sao Paulo. O Dépor e o River xogaron o primeiro partido, marcando Bebeto o primeiro gol.
A pista de atletismo ten oito carreiros, pero por non acadar os 400 metros, a Federación Galega nunca lle concedeu a homologación para a desputa de competicións oficiais. Non obstante, varios clubs da cidade empregan as instalacións para adestrar, habendo uns 300 usuarios federados e uns 50 particulares.
O estadio acolleu un partido da selección galega de fútbol en 2005, un partido da selección española de fútbol en 2012 e un encontro da selección española de rugby en 2013.
Bibliografía:
Estadio Municipal Verónica Boquete de San Lázaro (n.d.). En Wikipedia. Recuperado de https://gl.wikipedia.org/wiki/Estadio_Municipal_Ver%C3%B3nica_Boquete_de_San_L%C3%A1zaro [consulta 19/02/2024]
SD Compostela (n.d.). Instalacións - SD Compostela. Recuperado de https://sdcompostela.com/gl/clube/instalacions/ [consulta 19/02/2024]
Imaxes:
JonnyJonny, Estadio Multiusos de San Lazaro, marcado como dominio público, para máis detalles véxase Wikimedia Commons