Estación de Ferrocarril de Santiago de Compostela
A estación de Santiago de Compostela é unha estación de tren de Adif situada na cidade de Santiago de Compostela. Ten servizos de longa e media distancia operados por Renfe.
En 2010 recibiu 2.604.937 pasaxeiros, sendo a estación con maior número de viaxeiros de toda Galicia.
Denominación: Estación de Santiago de Compostela
Tipoloxía: infraestruturas/enxeñaría civil
Cronoloxía: 1943
Etiquetas / Uso:
Localización: Rúa do Hórreo, 75A
Coordenadas: 42.87080886384081, -8.544727079920772
Propiedade: Pública
A estación atópase no punto quilométrico 378,811 da liña férrea de ancho ibérico que une Zamora e A Coruña, a 218 metros de altitude sobre o nivel do mar. Atópase tamén no punto quilométrico 92 da liña que a une con Redondela. Ademais, está integrada na liña de alta velocidade Olmedo-Zamora-Galicia, concretamente no tramo Santiago-Ourense, e no eixo atlántico de alta velocidade, que une A Coruña e Vigo.
O edificio actual inaugurouse en 1943, coa apertura da liña A Coruña-Santiago, que máis tarde se integrou na Zamora-A Coruña, pechándose a estación de Cornes, inaugurada en 1873.
Desde o 31 de decembro de 2004 Adif é a titular das instalacións ferroviarias. En 2011 inaugurouse o tramo Santiago-Ourense da liña de alta velocidade Olmedo-Zamora-Galicia. En 2015 quedou inaugurado o eixo atlántico de alta velocidade.
A estación está situada na zona sueste da cidade, a 1 km da catedral e da AP-9, preto do río Sar.
Fiel ao estilo das estacións da zona, o edificio segue o esquema dun pazo. Componse dun pavillón central de dous pisos flanqueado por dúas ás laterais que nos seus extremos posúen dúas torres de planta cadrada. O conxunto é asimétrico xa que mentres unha das torres alcanza os tres pisos, a outra case non supera a altura das ás laterais. A fachada principal está decorada por un soportal formado por unha galería de cinco arcos laterais e dous centrais.
Componse de tres plataformas, unha lateral e dúas centrais ás que acceden cinco vías. Todas elas están protexidas por unha gran marquesiña metálica de dúas vertentes. Fóra do seu alcance quedan máis vías de servizo destinadas a carga, apartado ou garaxe. Os cambios de plataforma realízanse a través de pasos subterráneos.
Conta con atención ao cliente, punto de información, venda de billetes, aseos, cafetería e alugueiro de coches. Todo o recinto está adaptado para persoas con minusvalía. Conta tamén con aparcadoiro e parada de taxis.
Dispón de conexións de longa distancia con Ferrol, Madrid, Barcelona e paradas intermedias, e de conexións de media distancia coa Coruña, Vigo, Ourense e paradas intermedias.
Bibliografía:
Estación de Santiago de Compostela (n.d.). En Wikipedia. Recuperado de https://gl.wikipedia.org/wiki/Estaci%C3%B3n_de_Santiago_de_Compostela [consulta 15/02/2023]
Redacción (23/02/2020). Casi nueve millones de viajeros usan cada año el tren gallego. El Correo Gallego. Recuperado de https://www.elcorreogallego.es/hemeroteca/casi-nueve-millones-viajeros-usan-cada-ano-tren-gallego-LTCG1231749 [consulta 15/02/2023]