Carballeira de San Lourenzo
A carballeira de San Lourenzo é un pequeno bosque de carballos situado no barrio de San Lourenzo, a carón do pazo de San Lourenzo, preto do río Sarela.
Denominación: carballeira de San Lourenzo
Tipoloxía: patrimonio natural
Cronoloxía:
Etiquetas / Uso: parque patrimonial
Localización: Costa do Cano
Coordenadas: 42.87850019702376, -8.556266804207594
Propiedade: Pública
Actualmente ocupa unha superficie de máis de 8.000 metros cadrados, despois de que en 1872 se arrincasen 84 carballos debido á apertura da estrada de San Lourenzo á de Noia, e máis tarde se construíse un aparcadoiro no Campus Sur. Está catalogado como formación arbórea senlleira desde o 2007, dado o seu valor histórico e a existencia dalgúns carballos centenarios e de gran porte.
Anexo ao Campus Sur, co que limita pola antiga estrada de Noia, representa o que en tempos afastados foi unha extensa carballeira, na que a principios do século XII se construíu o convento de San Lourenzo de Trasouto, posteriormente transformado no Pazo de San Lourenzo. En 1546 o conde de Altamira doou o terreo á cidade de Santiago. Porén, os frades do convento de San Lourenzo explotaban a carballeira ilegalmente, ata a Desamortización de Mendizábal. Á sombra dos carballos celebrábanse festas e os domingos a mocidade organizaba as foliadas. A este lugar cantou Rosalía de Castro en Follas novas. A mediados do século XX celebrouse alí a feira, mentres se facían obras de mellora na carballeira de Santa Susana, acondicionándose o campo e plantándose algúns carballos.
Ademais de carballos, hai dous cruceiros de interese e unha fonte. Por medio da carballeira discorre o Camiño de Santiago, en dirección a Fisterra.
Bibliografía:
Carballeira de San Lourenzo (n.d.). En Wikipedia. Recuperado de https://gl.wikipedia.org/wiki/Carballeira_de_San_Lourenzo [consulta 28/02/2024]
Compostela Verde (n.d.). Compostela Verde|Parques e Xardíns de Santiago. Recuperado de https://compostelaverde.santiagodecompostela.gal/# [consulta 26/02/2024]
González Pérez, C. (2020). "As carballeiras de Santiago de Compostela", Anuario Brigantino, 43, pp. 351-380
SantiagoTurismo.com (n.d.). Carballeira de San Lourenzo|Parques e xardíns|Web Oficial de Turismo de Santiago. Recuperado de https://www.santiagoturismo.com/parques-e-xardins/carballeira-de-san-lourenzo [consulta 26/02/2024]
Imaxes:
m.dolores paderne sa…, Cruceiro na carballeira de San Lorenzo - panoramio, CC BY-SA 3.0