Casa da Conga

O edificio estrutúrase como un bloque de catro casas unificadas nunha soa fronte, delimitadas visualmente por cinco pilastras que soben ata a cornixa. Presenta unha arquitectura de marcado estilo clasicista, en contraste coa veciña Casa da Parra, situada na parte superior da praza. O conxunto destaca polo seu vistoso pórtico corrido, composto por columnas dóricas exentas que sosteñen tres arcos de medio punto na planta baixa. Na planta nobre, cada vivenda conta cun balcón con varanda de ferro e unha ventá a cada lado. Sobre a pilastra central da fachada sitúase o escudo do cabido catedralicio, mentres que no tellado destaca unha gran cheminea.

Actualmente, a Casa da Conga alberga diversos usos. A casa da dereita acolle a sede do Colexio de Arquitectos de Galicia e unha sala de exposicións, mentres que o resto do edificio está ocupado por establecementos comerciais, restaurantes, bares e cafeterías. Tamén foi sede de diferentes institucións culturais e académicas, como Campus Stellae, que desenvolveu actividades de postgrao, arte e coworking.