Antiga Estación de Cornes

Coa súa apertura en 1873, converteuse nunha das dúas cabeceiras da primeira liña de ferrocarril galega: Conxo-O Carril. Foi construída no desaparecido termo municipal de Conxo, o que motivou que o consistorio santiagués perseguise a anexión deste territorio, o que conseguiu en 1925.

Desde que se comezou a formular a construción da liña, trece anos antes da súa posta en funcionamento, a idea era que a ubicación da estación en Cornes fose provisional, xa que quedaba moi lonxe do centro urbano. Deste xeito, a estación foi construída inicialmente como un pequeno edificio de madeira dunha soa planta que tan só buscaba servir de refuxio aos pasaxeiros que esperaban a chegada do ferrocarril. Non obstante, mantívose durante case 50 anos, a pesar das críticas á súa incomodidade. Foi en 1920 cando se construíu o edificio definitivo, feito de cachotaría, ladrillo e formigón. 

Coa apertura do tramo Santiago-A Coruña da liña A Coruña-Ourense, onde confluiría a nova liña procedente de Ourense coa Santiago-Redondela, ficando Cornes relegada a terminal de mercadorías durante varias décadas ata o seu progresivo abandono.

En 2009, xa coa praia de vías levantada desde había anos e reurbanizada, o antigo predio principal da estación reabría como Casa das Asociacións, acollendo actividades veciñais e dependencias municipais. 

Bibliografía:

• Estación de Cornes (s.d.). Wikipedia. Recuperado o 16 de febreiro de 2024 de https://gl.wikipedia.org/wiki/Estaci%C3%B3n_de_Cornes

• Rey, C. (26 de novembro, 2020). Cornes, la estación de la que partió el primer ferrocarril de Galicia. El Español. Recuperado de https://www.elespanol.com/quincemil/articulos/actualidad/cornes-la-estacion-de-la-que-partio-el-primer-ferrocarril-de-galicia

Imaxes:

1. Noel Feans, Casa das Asociacións (Santiago de Compostela), CC BY 2.0