Alfredo Vigo Trasancos
Alfredo Manuel Vigo Trasancos naceu en Ferrol (A Coruña) no ano 1951. Catedrático de Historia da Arte da Universidade de Santiago de Compostela, especialista no Barroco e no Século das Luces.
Nome completo: Alfredo Vigo Trasancos
Datas: 1951
Lugares: Ferrol, A Coruña
Campo de actividade: Historia da arte
Grupo asociado: Universidad de Santiago de Compostela
Ocupación: Historiadores del arte ; Catedráticos de universidad
Lingua: Castelán
Especialista en temas de Arquitectura e Urbanismo, estudou de maneira específica o século XVIII, particularmente o Barroco e a Ilustración. Realizou así neste campo varias publicacións de interese, entre as que destacan: Arquitectura y urbanismo en el Ferrol del siglo XVIII (1984), que trata a importancia da cidade e do seu arsenal militar; La fachada del Obradoiro de la Catedral de Santiago (1996), na que analiza dita construción, fito do Barroco galego e La Catedral de Santiago y la Ilustración (1999) que axuda a comprender o pensamento historicista que xa había no século XVIII.
Por outro lado, outras obras que merecen ser destacadas son, en primeiro lugar, a titulada A Coruña y el Siglo de las Luces (2007) na que trata a realidade urbana da cidade nunha das súas épocas máis importantes, cando se levou a cabo a restauración da Torre de Hércules. Outra obra destacada é Galicia y el siglo XVIII. Planos y dibujos de arquitectura y urbanismo (2011) na que saca á luz arredor de 1.600 planos históricos de cidades e monumentos galegos con grande valor histórico.
Ademais destes libros, é tamén autor de numerosos artigos de investigación, director de obras colectivas e teses de doutoramento, investigador en proxectos realizados polo Ministerio de Educación e Ciencia e a Xunta de Galicia, membro do consello de redacción de varias revistas e coordinador dun Grupo de Investigación da Universidade de Santiago formado por máis dunha decena de investigadores.
Tamén é recoñecido no mundo da crítica artística e da crónica de cidades. Foi comisario en varias exposicións sobre a Torre de Hércules e a cidade de A Coruña no seu 800 aniversario e participou en numerosos congresos nacionais e internacionais.
Por toda esta traxectoria profesional, sobre todo pola investigación e posta en valor do patrimonio arquitectónico da cidade de Ferrol, recibiu a Insignia de Ouro do Concello no ano 2011.
Bibliografía:
“Alfredo Vigo Trasancos”, Seminario Internacional Patrimonio Cultural Vinculado con el Agua, <https://seminarioarpacur2013.wordpress.com/alfredo-vigo-trasancos/> [Consultado o 13/02/2019].
“Alfredo Vigo Trasancos”, Asociación Cultural Estudios Históricos de Galicia, <http://www.estudioshistoricos.com/?page_id=840> [Consultado o 12/02/2019].
Imaxes: