María do Cebreiro
María do Cebreiro é unha tradutora, investigadora, profesora de Universidade, escritora e poeta nacida en Santiago de Compostela o 5 de xullo do 1976.
É filla dos escritores Helena Villar Janeiro e Xesús Rábade Paredes, que lle transmitiron dende moi nova o seu amor pola poesía, gañando así en 1990 e con só 14 anos, o primeiro premio no XVI Certamen Poético Antonio García Hermida.
Nome completo: María do Cebreiro Rábade Villar
Datas: 1976
Lugares: Santiago de Compostela
Campo de actividade: Literatura; Teoría da Literatura; Filoloxía
Grupo asociado: Universidade de Santiago de Compostela
Ocupación: Escritoras; Profesoras; Científicas; Tradutoras; Poetas
Lingua: Galego
Web: http://mariadocebreiro.net/
Twitter: https://twitter.com/mariadocebreiro
En 1998 publicou o seu primeiro poemario, O estadio do espello e licenciouse en Filoloxía Hispánica pola Universidade de Santiago de Compostela, onde actualmente traballa como investigadora e profesora de Teoría da Literatura.
A súas principais liñas de investigación son a teoría do poema, o estudo comparado das antoloxías de poesía no ámbito peninsular e a narrativa do século XIX, temas sobre os que escribiu artigos que aparecen en revistas como Bulletin of Hispanic Studies, Rilce, Revista de Literatura, Romance Notes...
En relación á súa obra poética, ao seu libro O estadio do espello, seguiuno nós, as inadaptadas (accésit do XXI Premio Esquío de Poesía en Lingua Galega), Non queres que o poema te coñeza (Premio de Poesía Caixanova 2003), O barrio das chinesas e Os hemisferios, entre outros.
No ano 2002 foi galardoada co Premio de Investigación Dámaso Alonso pola súa obra As antoloxías de poesía en Galicia e Cataluña, extraída da súa tese doutoral, e en 2005 publica As terceiras mulleres, ensaio centrado na nova maneira de entender a representación da subxectividade feminina e a creación artística feita por mulleres.
Por último, cabe destacar que tamén é profesora de literaturas comparadas na Escola das Artes da Universidade de Porto e que coordinou coleccións como A poesía é o gran milagre do mundo (2001) que é unha mostra de poesía galega traducida ao inglés e Damas negras (2002), unha antoloxía e tradución ao galego de cancións realizadas por mulleres.
Obra poética:
O estadio do espello (Xerais, 1998).
(nós, as inadaptadas) (accésit do XXI Premio Esquío de Poesía en Lingua Galega; Sociedade de cultura Valle-Inclán, 2002).
Non queres que o poema te coñeza (gañador do II Premio Caixanova de Poesía 2003; P.E.N. Clube de Galicia 2004).
O barrio das Chinesas (O Correo Galego, 2005).
Os hemisferios (Galaxia, 2006).
Cuarto de outono (Sotelo Blanco, 2008).
Non son de aqui (Xerais, 2008).
Poemas históricos (2010).
O grupo (2011).
A guerra (Barbantesa, 2013) con Daniel Salgado.
A ferida (2013) con Ismael Ramos.
Os Inocentes (Galaxia, 2014).
O deserto (Apiario, 2015).
A lentitude (Chan da pólvora, 2017).
Soños. Arquivos. Cartas (Xerais, 2018).
Ensaio:
As antoloxías de poesía en Galicia e Cataluña (Universidade de Santiago de Compostela, 2004).
As terceiras mulleres (Galaxia, 2005).
Fogar impronunciable. Poesía e pantasma (Galaxia, 2011).
Antoloxías coordinadas:
A poesía é o grande milagre do mundo / Poetry is the world´s great miracle (P.E.N. Clube de Galicia 2001).
Damas negras: música e poesía cantada por mulleres (Xerais, 2002).
Bibliografía:
Álvarez, Elisa (1-10-2018) María do Cebreiro, Son o froito da historia de amor de meus pais coa poesía En: La Voz de Galicia Recuperado de: https://www.lavozdegalicia.es/noticia/santiago/santiago/2018/10/01/poetaspan-langgl-froito-da-historia-spanspan-langglamor-meus-pais-coa-poesiaspanspan-langglnome-spanspan-langglprofesion-spanspan-langglrecuncho-elixido-span/0003_201810S1C8993.htm [Consultado o 15/02/2019].
"María do Cebreiro Rábade Villar". En: mariadocebreiro.net, <http://mariadocebreiro.net/es/category/research/> [Consultado o 15/02/2019].
Grupo de Teoría da literatura e Literatura comparada da USC, Rábade Villar, María do Cebreiro. Recuperado de: http://www.tllc-usc.gal/persoa/maria-do-cebreiro/?lang=gl [consulta 20/05/2020]
Imaxes:
María do Cebreiro: Pepepapa678, María do Cebreiro, CC BY-SA 4.0