Manuel María é o autor da letra do poema que Luís Correa e Pablo Rial musicaron no ano 2017.

Veleiquí, Outono, grande e puro,

vestindo ao mundo de dourado,

con saibo a mosto fermentado,

a mazá, a sal, a grao maduro.

Veleiquí, Outono, nel procuro

o rumor do vento namorado,

o laio do mar ben concertado

e o misterio máis escuro.

Veleiquí, Outono, fosco e ledo,

con brasas secretas, soedosas,

acenas nas brétemas do medo.

Veleiquí, Outono, xa sen rosas,

sementando mágoas misteriosas

no meu corazón ceibe e acedo.