Anindia Nazla - CARITA PANTUN

ᮎᮛᮤᮒ ᮕᮔ᮪ᮒᮥᮔ᮪

Sajarah

Carita Pantun kaasup sastra lisan. Turun-temurun jeung sumebarna tatalepa ku cara lisan. Mangkana, carita pantun teh geus aya ti jaman baheula. Carita pantun teh baheula mah dianggap mibanda kakuatan goib (sakral). Malah baheula mah, mun rek magelarkeun carita pantun teh kudu nyayagikeun sasajen heula. Kitu deui juru pantunna, biasana mah jalma lolong. Ku kituna, dina magelarkeun carita pantun ge teu sagawayah, kudu ditataharkeun heula ti anggalna.

Dina sastra Sunda, carita pantun teh gelarna samemeh abad ka-14. Buktina dina naskah Sunda kuno Sanghyang Siksa Kandang Karesyian (1518 M), ngeunaan carita pantun teh geus disabit-sabit.

Ku kituna, carita pantun dianggap karya sastra asli (pituin) Sunda. Nurutkeun para ahli, carita pantun teh kaasup karya sastra sampakan dina sastra Sunda, lain karya sastra sampeuran. Hartina, lain mangrupa pangaruh tina sastra deungeun. Sanajan can kanyahoan jinekna, tapi carita pantun geus aya dina sastra Sunda ti jaman Pajajaran keneh.

Dina mangsana, carita pantun teh kaasup kasenian anu dipikaresepen ku urang Sunda. Dipintonkeun pikeun hiburan, ditanggap di nu karian, jeung acara ritual seperti ngaruat. Carita pantun anu populer diantarana:

Lutung Kasarung, Ciung Wanara, Mundinglaya Dikusumah, Deugdeug Pati Jaya Perang, Ratu Bungsu Karma Jaya, Sumur Bandung, jeung Demung Kalagan

Struktur

RAJAH

Bagian rajah teh biasana sok ditembangkeun ku juru pantun samemeh mangkat carita. Eusi rajah mangrupa sanduk-sanduk ka karuhun lantaran rek ngamimitian mantun. Sanduk-sanduk teh hartina menta idin, menta pangrakarsa jeung pangriksa ti nu ngageugeuh eta lembur sangkan saralamet

NARASI

Bagian narasi atawa nyaritekeun, ditepikeun dina mangsa juru pantun nyambungkeun hiji kajadian kana kajadian saterusna. Dipiring ku kacapi najan ukur digalantangkeun bae oge.

DESKRIPSI

Bagian deskripsi nyaeta bagian anu ngagambarkeun kajadian tingkah paripolah tokoh carita dina hiji kajadian, pangrasa hate, jeung kakayaan. Bagian deskripsi teh sok ngahaleuangkeun ku juru pantung, nu matak sok disebut oge papantunan

DIALOG

Bagian dialog atawa paguneman nyaeta paguneman antara parapalakuna. Dialog teh di antarana pikeun ngagambarkeun watek atawa karakter palaku, ngalancarkeun jalan carita, sarta nepikeun gagasan-gagasan.