鬥陣來跳舞好無

你會當綴咧我的跤步

振動 轉踅 

慢慢仔踏

尻川䫌扭啊扭

來來去去 有進有退

一二三 澎恰恰

一二三四 澎恰恰恰

鬥陣來跳舞好無

我跳你嘛跳

密喌喌的甘蔗園

有鳥仔咧跳舞

邊仔的水筍

綴風搖搖擺擺

水雞嘓嘓吼佇咧為咱伴奏

爸爸媽媽佮囡仔做伙跳

彼敢毋是巷仔口的叔公 猶閣有

廟邊低厝仔的里長伯嘛來鬥鬧熱

𠢕喋詳的阿雀姨佮妗婆嘛佇遮

驚驚袂得頂

跤步踏差啥人無

趣味就好

歡喜就好

遮是寶島的埔里

有跳舞的人 快樂的人

咱攏是 有夢上媠的人