madwavijaya-Eng-4

caturthaH sargaH

athaiSha sallOka-dayA-sudhArdrayA sadAgama-stEna-nirAsa-kAmayA |

ramA-varAvAsa-bhuvA vishAradO vishAlayA&ciMtayadAtmanO dhiyA||4.1||

ananya-saMgAd guNa-saMgitA harErjanasya mAnaM tu vishiShTacEShTitam |

asaMgamasmAt prakaTI-karOmyahaM nijaM bhajan pArama-haMsyamAshramam ||4.2||

mama prabhOrnAparathA hi shObhatE dviShatsu viShNuM yadadaMDadhAraNam |

hari-svasA nanvacirAdasad-bhidE bhavEdatO nAsmica daMDa-dhArakaH ||4.3||

vi-ciMtayannitthamanaMta-ciMtakaH samasta-saMnyAsa-nibadhdha-nishcayaH |

asAvanu-j˜jArthamathAnamaddhariM samasta-saM-vyApinamAtma-dAya-gam ||4.4||

nijE janE kiM namasIti pRucChati bruvan svasastupraNatiM vyadhAmiti |

gurO kilAnvEShaNavAn jagad-guruH tadA jagAmAkhila-lOka-shikShakaH ||4.5||

yatiryatAtmAbhuvi kashcanAbhavadvibhUShaNO bhUri-virakti-bhUShaNaH |

na nAma-mAtrAcChucimarthatO&piyaM janO&cyuta-prEkShamudAharat sphuTam ||4.6||

puraiSha kRuShNA-kara-siddha-shuddhimad-varAnna-bhuktyA kila pAMDavAlayE |

vi-shOdhitAtmA madhu-kRut-pravRuttimAn-cacAra kAMshcit pari-vatsarAn mudA ||4.7||

abhUt ku-shAstrAbhyasanaM na pAtakaM kramAgatAd vi-pratisAratO yatEH |

yathA ku-shAstrAdhyasanaM mura-dviShaH padAMbujE vyAdha-varasya garhitam ||4.8||

vinItamAMnAya-shirO-vishAradaM sadaiva tattvaM pra-bubhutsumAdarAt |

gururviditvOpa-natAM nijAM mRutiM kadA-cidUcE tamupa-hvarE giram ||4.9||

ahaM svayaM brahmana kiMcidasti mat paraM vijRuMbhEta yadA sphuTaM citiH |

itIha mAyA-samayOpa-pAditaM niranvayaat su-vrata mA sma vishvasIH ||4.10||

yadEtadAtmaikyamupAsti-cOditaM na mE gurOrapyaparOkSha-tAM gatam |

purAtanAnAmapi saumya kutracit tatO mukuMdaM bhaja saMvidE mudA ||4.11||

itIdamAdishya vacO vacasvini svakE gurau lokamathAnyamIyuShi |

asEvatA&lOcya muhurgurOrgiraM sa rUpya-pIThAlayamiMdirA-varam ||4.12||

su-bhaktinA tEna sa bhakta-vatsalO ni-ShEvitastatra paraM bubhutsunA |

bhaviShyataH shiShya-varAddhi viddhi mAm iti praviShTaH puruShaM tamabhyadhAt ||4.13||

pratIkShamANaM tamanu-grahaM mudA ni-ShEvamANaM punaraMbujEkShaNam |

satAM guruH kAraNa-mAnuShAkRutiH yatiM prashAMtaM tamupA-sasAda saH ||4.14||

sutaM yatIMdrAnu-caraM vi-rAgiNaM nishamya saMnyAsa-niShaNNa-mAnasam |

su-vatsalau rUpya-taLAlaya-sthitaM viyOga-tAMtau pitarau samIyatuH ||4.15||

varAshramastE jaratOranAthayOrna jIvatOH syAdayi naMdanAvayOH |

sa-yAcanaM vAkyamudIrya tAvidaM parItya putrAya natiM vi-tEnatuH ||4.16||

natirna shushrUShu-janAya shasyatE nataM bhavadbhyAM sphuTamatra saMpratam |

ahO vidhAtrA svayamEva dApitA tadabhyanuj~jEti jagAda sa prabhuH ||4.17||

anuttara-j~jaH sa tamarthayan punaH yatIMdramA-namya gataH priyA-yutaH |

gRuhE vasan kalpa-samAn kShaNAn nayan sutAnanEMdOranishaM tatO&smarat ||4.18||

sa ciMtayan putramanO-rathaM shucA punashca tIrtvOpa-gatO mahA-nadIm |

yatIshvarAnu-vratamAtma-naMdanaM tamaikShata grAma-varE maThAMtarE ||4.19||

sa jAta-kOpAkulitO dharA-surO mahAtmanAm laMghana-bhIrurapyalam |

sutasya kaupIna-dhRutau hi sAhasa-pratishravO mE dRuDha ityabhAShata ||4.20||

kShaNEna kaupIna-dharO nijaM paTaM vidArya hE tAta kuruShva sAhasam |

itImamuktvA prabhurabravIt punaH shubhAMtarAyaM na bhavAMshcarEditi ||4.21||

na putra pitrOravanaM vinA shubhaM vadaMti saMtO nanu tau sutau mRutau |

ni-vartamAnE na hi pAlakO&sti nau tvayIti vaktAramamuM sutO&bravIt ||4.22||

yadA viraktaH puruShaH pra-jAyatE tadaiva saMnyAsa-vidhiH shrutau shrutaH |

na saMga-hInO&pi pari-vrajAmi vAm ahaM tu shushrUShumakalpayanniti ||4.23||

bahu-shrutatvAdyadi tat sahE balAt na sA savitrI virahaM sahEta tE |

iti dvijEnAbhi hitE&namat sa taM bhavAnanuj~jAM pra-dadAtviti bruvan ||4.24||

viciMtya vidvAn sa niruttarI-kRutaH tathA&stu mAtA&nu vadEd yadIti tam |

udIrya kRucCrAdupa-gamya maMdiraM priyA-sakAshE tamudaMtamabravIt ||4.25||

nishA-carArEriva lakShmaNaH purA vRukOdarasyEva surEMdra-naMdanaH |

gadO&tha shaurEriva karma-kRut priyaH su-bhaktimAn vishva-vidO&nujO&bhavat ||4.26||

kadAcidApyA&laya-buddhirAlayaM ni-vEdayan pAlakamEtamEtayOH |

dRuDha-sva-saMnyAsa-niShEdhanishcayAM dhavAnumatyEdamuvAca mAtaram ||4.27||

varAshramAptiM mama saM-vadasva mAM kadAcidapyaMba yadIcChasIkShitum |

yadanyathA dEshamimaM pari-tyajan na jAtu dRuShTErviShayO bhavAmi vaH ||4.28||

iti bruvANE tanayE kadAcida-pyadarshanaM tasya mRutErnidarshanam |

viciMtya paryA-kulitA cikIrShitaM sutasya kRucChrAnnyaruNanna sA shubhA ||4.29||

athOpagamyaiSha guruM jagadguruH prasAdya taM dEva-vara-prasAditaH |

sadA samastAshrama-bhAk surEshvarO vishEShataH khalvabhajad-varAshramam ||4.30||

kriyA-kalApaM sakalaM sa kAla-vid vidhAna-mArgENa vidhAya kEvalam |

sadA prasannasya harEH prasattayE muhuH samasta-nyasanaM samabhyadhAt ||4.31||

********************************************************************

anaMtamAtrAMtamudAharaMti yaM trimAtra-pUrvaM praNavOccayaM budhAH |

tadA&bhavad bhAvi-caturmukhAkRutiH japAdhikArI yatirasya sUcitaH ||4.32||

guNAnu-rUpOnnati pUrNa-bOdha i-tyamuShya nAma dvija-vRuMda-vaMditaH |

udAharad bhUri-yashA hi kEvalaM na maMtra-varNaH sa ca maMtra-varNakaH ||4.33||

niraMga-rAgaM mukha-rAga-varjitaM vi-bhUShaNaM viShTapa-bhUShaNAyitam |

amuM dhRutAShADhamavEkShya mEnirE svabhAva-shObhA&nupamEti jaMtavaH ||4.34||

bhujaMga-bhUtEsha-vihaMgapAdikaiH pra-vaMditaH sAvasara-pratIkShaNaiH |

nanAma sO&yaM guru-pUrvakAn yatIn ahO mahIyO mahatAM viDaMbanaM ||4.35||

varAshramAcAra-vishESha-shikShaNaM vi-dhitsurasyA&caritaM ni-shAmayan |

vishESha-shikShAM svayamApya dhIra-dhIH yatIshvarO vismayamAyatA&Mtaram ||4.36||

sa rUpya-pIThAlaya-vAsinE yadA nanAma nAthAya mahA-matirmudA |

tadA&munA&grAhi nara-pravEshinA bhujE bhujE&nAshu bhujaMga-shAyinA ||4.37||

cirAt su-tatvaM pra-bubhutsunA tvayA niShEvaNaM mE yadakAri tat-phalam |

imaM dadAmItyabhi-dhAya sO&munA tadA praNIya pra-dadE&cyutAtmane ||4.38||

anugrahaM taM prati-gRuhya sAgrahaM mudA&&tmanA&&ptAM kRuta-kRutyatAM smaran |

abhUdasaMgO&pi sa tat-su-saMgavAn asaMga-bhUShA nanu sAdhu-saMgitA ||4.39||

yiyAsati svastaTinIM muhurmuhuH namatyanuj~jArthini bhUri-cEtasi |

tamasmarat svAminamEva dUna-dhIH gururbhaviShyad-virahAgni-shaMkayA ||4.40||

itastRutIyE divasE dyu-nimnagA tvadarthamAsmAka-taTAkamAvrajEt |

atO na yAyA iti taM tadA&vadat pravishya kaMcit karuNA-karO hariH ||4.41||

tadAj~jayOpAgata-jAhnavI-jalE janO&tra sasnau saha pUrNa-buddhinA |

tataHparaM dvAdasha-vatsarAMtarE sadA&&vrajEt sA tadanugrahAMkinI ||4.42||

gatE dinAnAM dashakE samAsakE varAshramaM prApya sa-patra-laMbanam |

jigAya jaitrAn bahu-tarka-karkashAn sa vAsudEvAhvaya-paMDitAdikAn ||4.43||

gurOH sva-shiShyaM caturaM cikIrShitaH pracOdanAt shrOtumihOpa cakramE |

athEShTa-siddhishphala-jAti-vAridhiH nirAdarENApi mahAtmanA&munA ||4.44||

tadAdya-padya-sthamavadya-maMDalaM yadA&vadat ShODashaka-dvayAtmakam |

uparyapAstaM taditi bruvatyasau gurau tamUcE praNi-gadyatAmiti ||4.45||

bhavat-pra-vaktRutva-samarthatA na mE sa-kOpamitthaM vadati vratIshvarE |

apIha mAyA-samayE paTau nRuNAM babhUva tad-dUShaNa-saMshayAMkuraH ||4.46||

budhO&bhidhAnaM shravaNaM budhEtarO dhruvaM vi-dadhyAd vi-mumukShurAtmanaH |

yatirvishEShAditi lOka-cOdanAt pravakti mAyA-samayaM sma pUrNa-dhIH ||4.47||

akhaMDitOpanyasanaM vi-saMshayaM sa-saMpradAyaM pravacO dRuDhOttaram |

samAgaman shrOtumamuShya sAgrahAH janAH shrutADhyAshcaturA bubhUShavaH ||4.48||

gurOrupAMtE shravaNE ratairdvijaiH sa paMcaShairbhAgavatE kadAcana |

bahu-prakArE likhitE&pi vAcitE prakAramEkaM prabhurabhyadhAd dRuDham ||4.49||

para-prakArEShvapi saMbhavatsu tE vinirNayO&smin kathamityudIritE |

mukuMda bOdhEna mahA-hRudabravIt prakAramEnaM bhagavat-kRutaM sphuTam ||4.50||

ni-gadyatAM gadyamihaiva paMcamE jagad-gurOrvEttha kRuti-sthitiM yadi |

iti bruvANE yati-sattamE svayaM tadukta-mArgENa jagAda bhUri-hRut ||4.51||

ashESha shiShyaishca tadAj~jayA tadA parIkShaNAyaikShi samasta-pustakam |

sa tatra haMtaika-tamE sthitaM tyajan na tAvadadhyAya nikAyamabhyadhAt ||4.52||

atra janmani na yat paThitaM tE jaitra bhAti kathamityamunOktE |

pUrva-janmasu hi vEda purEdaM sarvamityamita-buddhiruvAca ||4.53||

iti bahu-vidha-vishvAshcarya-citta-pravRutteH jagati vitatimAyannUtanA&pyasya kIrtiH |

kShapita-tata-tamaskA bhAskarIva prabhA&laM sujana-kumuda-vRuMdAnaMda-dA caMdrikEva ||4.54||

iti shrImatkavikulatilaka trivikramapaMDitAcAryasuta nArAyaNa paMDitAcArya-viracitE shrI madhva-vijayE mahAkAvyE AnaMdAMkitE caturthaH sargaH