Article - About Vaikasi Visakam

முருகப் பெருமான் நமக்கு வீடுபேற்றை அளிக்கவல்லவன். இந்த வீடுபேற்றை பெற தடையாக இருக்கும் காம, குரோத, லோப, மோக, மத, மாச்சர்யம் என்ற ஆறு பகைவர்களை அழித்து வீடுபேறு அடைய நினைப்பவர்கள்ஆறுமுகனின் ஆறெழுத்தை ஓதவேண்டும். ஆறுபடை வீடுகளை சேவிக்க வேண்டும். அதிலும் வைகாசி விசாகத்தன்று செய்வது சிறப்பு.

நம் உடம்பில் ஆறு ஆதாரங்கள் உள்ளன. இவற்றின் அடையாளமாய் விளங்குவது ஆறுபடை வீடுகள். மூலாதாரம்- திருப்பரங்குன்றம்; தெய்வானையை மணந்து உல்லாசமான தலம். சுவாதிஷ்டானம்- திருச்செந்தூர்; சிந்தனை அலைமோதி துன்பம் துடைக்கும் தலம். மணிபூரகம்- பழனி; ஞானதண்டபாணி உள்ள யோகத்தலம். அநாகதம்- திருவேரகம் என்ற சுவாமிமலை; தந்தைக்கு உபதேசித்த தலம். விசுக்தி- திருத்தணி; சல்லாபமாய்குறிஞ்சியில் விளையாடும் தலம். ஆக்ஞை- பழமுதிர்சோலை; ஞானப்பழம் உதிரும் சோலையாகிய தலம். இதை, 'உல்லாச நீராகுல யோக இத சல்லாப விநோதனும் நீ மலையே' என கந்தரனுபூதியில் அருணகிரிநாதர்கூறுகிறார்.

வேலனுக்கு சிவன் உபதேசம் செய்த தலம் தென்சேரிகிரி. இது பொள்ளாச்சி- திருப்பூர் சாலையில் அமைந்துள்ளது. இங்கு மலைமேல் உள்ள கோவிலில் வள்ளி, தேவசேனாவுடன் வேலாயுதசாமி கோவில் கொண்டுள்ளார். இங்குதான் பகைவர்களை வெல்ல சிவன் வேலனுக்கு உபதேசம் செய்தார். முருகன் வாகனம் இடப்பக்கம் தலை திருப்பி இருக்கும். இடப்பக்கம் சேவற் கொடிக்குப் பதில் சேவலே உள்ளது.

முருகன் சுவாமிமலையில் தந்தைக்கு உபதேசம் செய்ததுபோல் செம்பனார் கோவில் தலத்தில் அன்னை பார்வதிக்கு உபதேசம் செய்ததாக புராணம் கூறுகிறது.

திரையில் தோன்றும் முருகன்

இலங்கை கதிர்காமத்தில் செம்பு ஓடால் வேயப்பட்ட கொட்டகைதான் முருகன் ஆலயம். இங்கு முன்வாசலில் ஏழு திரைகள் உள்ளன. இதில் ஏழாவது திரையில் முருகன் இரு தேவியருடன் மயில்மீது அமர்ந்த ஓவியம்தீட்டப்பட்டுள்ளது. திரைக்குப்பின் ஒரு பெட்டியில் சடாட்சர மந்திர வடிவ யந்திரம் உள்ளது. மரகத வேலுக்குதான் அபிஷேகம், ஆராதனை, பூஜை நடத்துவர். இங்கு வைகாசி விசாக விழாவைப் பிரபலமாக நடத்துகின்றனர். இதற்கு 'ஆறுமுகம் புறப்பாடு' என பெயர்.

குன்றுதோறாடும் அந்தக் குமரக் கடவுளை வைகாசி விசாக நாளில் வழிபட்டு இம்மையிலும் மறுமையிலும் நன்மை பெறுவோம்.

வைகாசி விசாக திருநாளில் புத்தபெருமானின் வாழ்க்கை வரலாற்றை முன்னிறுத்தி பலவித சமய நிகழவுகள் இடம்பெறும். இந்துக்கள் ”வைகாசி விசாகம்” என கொண்டாடும் இப் புனிதநாளை பௌத்தர்கள் ”வெசாக்பண்டிகை” என கொண்டாடுகின்றனர்.

இந்த நாள் மூன்று முக்கியத்துவங்களைக் கொண்ட நாளாக பெளத்தர்களால் கொண்டாடப்படுகின்றது.

1. சித்தார்த்தர் எனும் கெளதம புத்தர் லும்பினி (நேபாள்) என்னுமிடத்தில் அவதரித்த நாளாகவும்,

2. புத்தகயா எனும் இடத்தில் அவர் தவம் புரிந்து புத்த நிலை (ஞானம்) அடைந்த நாளாகவும்.

3. புத்தரபிரான் பரிநிர்மாணம் அடைந்த நாளாகவும் இன்நாள் அமைந்து நிற்கின்றது.

இம் மூன்று நிகழ்வுகளும் மே மாத பூரணை நாட்களிலேயே நிகழ்ந்ததாக பெளத்தர்கள் நம்புகின்றனர்.

இக்காலப் பகுதியில் தண்ணீர்ப் பந்தல்கள், அன்னதான உணவு வழங்கும் பந்தல்கள், தோரணங்கள், வெளிச்சக் கூடுகள் கட்டப்பட்டு எங்கும் விழாக்கோலமாக இருக்கும். நேபாளத்தின் லும்பினி என்ற இடத்தில் கி. மு. 560 ஆம் ஆண்டு காலப் பகுதியில் சுத்தோதன மன்னனுக்கு மகனாகப் பிறந்தார் சித்தார்த்தர். இளமைக் காலத்தின் சுகபோகங்களை அனுபவிக்கும் தனது 29 ஆவது வயதில் வாழ்க்கையில் மூன்று முக்கியதத்துவங்களான மூப்பு, பிணி, மரணம் ஆகியவற்றை நேரில் கண்டார்.

இச்சம்பவத்தின் பின் இம்மானுட வாழ்வின் நிலையாமையை உணர்ந்து நிலையான மெய்ஞ்ஞானத்தைத் தேடி முற்றும் துறந்த துறவியாக மாறி “கெளதம புத்தர்” என்ற பெயரைப் பெற்றார் இளவரசராகிய சித்தார்த்தர்.

தான் மரணிக்கும் வரைக்கும் பல்வேறு இடங்களுக்கும் விஜயம் செய்து பொருளுக்கும் போகத்திற்கும் போராடும் மாந்தர்களுக்கு வாழ்வின் உண்மையான அர்த்தங்களைப் போதித்து வந்தவர் புத்த பிரான்.

வாழ்வில் எதிர்நோக்கும் துன்பங்களுக்கு முதன்மைக் காரணம் மெய்ப்பொருள் பற்றிய அறிவின்மை. நிரந்தரமாற்ற சிற்றின்பங்களின் மீதான பற்றே அறியாமை உருவாக வழிசமைக்கின்றது. அகிம்சையைப் பின்பற்றும்தியான வழிமுறை ஊடாக மன அமைதியையும் தெளிவையும் பெறுவதன் மூலம் அறியாமை இருள் நீங்கி மகிழ்ச்சியான வாழ்வை வாழமுடியும் என்பதை கெளதம புத்தரின் போதனைகள் வலியுறுத்துகின்றன.

வெசாக் பண்டிகை பெளத்தர்கள் பெரும்பான்மையாக வாழும் இலங்கையில் ஒரு வார காலத்திற்கு மேலாக அனுஷ்டிக்கப்படுகின்றது. நாடு தழுவிய ரீதியில் மத நிகழ்வுகள் இடம்பெறும். இக்காலப் பகுதியில் மக்கள்கேளிக்கை கொண்டாட்டங்களைத் தவிர்த்து அமைதி, தியானம், வழிபாடு ஆகியவற்றில் தம்மை ஈடுபடுத்திக் கொள்கின்றனர்.

போதி மாதவனின் போதனைகளை நினைவுறுத்தும் வெசாக் வெளிச்சக் கூடுகள் எங்கும் காணப்படுகின்றன. வெசாக் என்றால் எல்லோர் மனதிலும் தோன்றுவது காற்றில் மிதக்கும் வண்ண வண்ண வெளிச்சக்கூடுகள்தான் பெளத்த மதத்தவர்கள் மட்டுமன்றி அனைவருமே வெசாக் அலங்காரங்கள் மேற்கொள்வதை ஒரு சம்பிரதாயமாகக் கடைப்பிடிக்கின்றனர்.

இல்லங்கள், வீதிகள், பொதுவிடங்கள் மற்றும் நகரின் மையப்பகுதிகளில் கலைநயம் மிகுந்த வெசாக் வெளிச்சக் கூடுகள் எண்ணெய் விளக்குகளாலும் மின் குமிழ்களாலும் ஒளியூட்டப்பட்டு உயரமாகக் கட்டித்தொங்கவிடப்பட்டிருக்கும் நாடே விழாக் கோலம் பூண்டிருப்பது போன்ற உற்சாக உணர்வு அனைத்து மக்கள் மனதிலும் ஊற்றெடுக்கும்.

எளிமையான எண்கோணத்தில் அமைந்த வெசாக் கூடுகள் முதல் வியக்க வைக்கும் நுட்பமான கலைப்படைப்புகள் அனைத்தும் ஒளி வெள்ளத்தில் மிதப்பதைப் பார்க்கும் பொழுது எம் மனது உவகையில் பூரிப்பதைஉணரலாம். பல வர்ணக் கடதாசிகளாலும் மூங்கில் பிரம்பு, தென்னம் ஈர்க்கு, சரட்டை முதுலான தென்னை மரத்தின் பாகங்களைக் கொண்டும் மெல்லிய உலோகப் பொருட்களைக் கொண்டும் மிகவும் பிரமாண்டமானவெசாக் கூடுகள் தயாரிக்கப்படுகின்றன. இந்த வெளிச்சக் கூடுகள் பெரும்பாலும் பெளத்த மதத்துடன் தொடர்புடைய பல்வேறு மலர்கள், விலங்குகள் மற்றும் பறவைகளின் வடிவங்களில் அமைந்திருப்பதனால்பார்வையாளர்களை அதிகளவில் கவர்கின்றன.

மெய்ஞ்ஞானத்தை அடைந்த மனிதனின் வாழ்வில் அறியாமை இருள் நீங்கி நிலையான மகிழ்ச்சியும் அமைதியும் குடியிருக்கும் என்ற பெளத்த மதத்தின் தத்துவத்தை வெசாக் வெளிச்சக் கூடுகள் எடுத்துக்கூறுகின்றன. வெசாக் கூடுகளைப் போன்று மக்களின் ரசனைக்கு விருந்தாகக் காணப்படுபவை பிரதான சந்திகளில் வைக்கப்பட்டிருக்கும் வானுயர்ந்த மாபெரும் வெசாக் பந்தல்கள். கண்களைக் கொள்ளை கொள்ளும்வர்ண ஜாலமும் பிரமாண்டத் தன்மையும் மக்களிடம் இவை அதிக வரவேற்பைப் பெறுவதற்குக் காரணமாகின்றன.

பிரமாண்டமான வெசாக் கூடுகளைத் தயாரிப்பதற்குப் பல மாதங்களுக்கு முன்னரே தயாராகி விடுகின்றனர். சிறந்த அலங்காரத்தை உருவாக்குவதற்காக இவர்கள் காட்டும் அர்ப்பணிப்பும் ஈடுபாடும் பாராட்டுதற்குரியது. இதற்கப்பால், மக்களின் கலாரசனையைக் கட்டியெழுப்பும் நிகழ்வாகவும் அமைகின்றன.

ஒவ்வொரு வருடத்திலும் முன்னைய வருடத்தை விடவும் பல புதிய, மேம்பட்ட கலைப்படைப்புகள் பார்வையாளர்களைப் பரவசப்படுத்தத் தயாராகின்றன. மக்களுக்குப் புத்த பகவானின் உன்னத பண்புகளையும் அவரின்போதனைகளையும் நினைவுறுத்துவதை முதன்மை நோக்காகக் கொண்டவை. வெசாக் அலங்காரங்கள், அனைத்து இன மக்களும் பெளத்த மதத்தின் பெருமையையும் வரலாறையும் எளிமையான வடிவில் புரிந்துகொள்வதற்கான சந்தர்ப்பமாகவும் இது உள்ளது.

இவை எல்லாவற்றுக்கும் அப்பால் உண்மையான ஆன்மிகத் தேடல் உடையவர்கள் கண்களில் ஒவ்வொரு வெசாக் வெளிச்சக் கூடும் பரிநிர்வாணமடைந்த ஒரு போதி மாதவனை மனக்கண் முன்கொண்டு வருகின்றது. வண்ண மயமான வெசாக் கூடுகளைப் பார்த்து மகிழ்ந்த பின் அன்றிரவு தனது இல்லம் திரும்பும் ஒவ்வொரு பக்தனும் மன இறுக்கம் தளர்ந்து தெளிவான சிந்தையுடன் செல்கின்றான்.

அன்பு ஒன்றை மட்டுமே போதித்து வந்த போதி மாதவனின், பிறப்பு, பரி நிர்வாணமடைதல், இறப்பு ஆகிய முப்பரிமாணங்களை நினைவுகூரும் தினமே வெசாக் பண்டிகை. இந்தியாவின் பல மாநிலங்களிலும் 'விசாகப்பண்டிகை' யாக இது கொண்டாடப்படுகிறது.

மணிமேகலை காவியத்திலும் இப்பாண்டிகைபற்றி விரிவாகக் கூறப்பட்டுள்ளது. அன்புதான் உலக ஜோதி, அன்பு தான் இன்ப ஊற்று, அன்புதான் உலக மகா சக்தி என்று மக்களுக்குப் போதித்து வந்தவர் சித்தார்த்தன் எனும்பெயர் கொண்ட புத்த பெருமான். அப்பெருமானின் பொன்மொழிகளே போதும், ஒரு வீடும் சமூகமும் நாடும் ஏன், உலகமும் சுபீட்சம் பெற. இதோ அவரது பொன்மொழிகள் சில :

* தியானத்தின் மூலம் ஞானம் கிடைக்கிறது. தியானத்தின் குறைவால் ஞானம் குன்றிவிடுகிறது. திருப்திதான் பெருஞ்செல்வம்.

* தீமை புரிபவன் இந்த உலகில் துன்புறுகிறான். மறுமையிலும் துன்புறுகிறான். இரண்டிலும் அவனுக்குத் துன்பமே. தான் செய்த தீமையைப் பற்றி நினைக்கும் போது அவன் துன்புறுகிறான். தீய பாதையில் செல்லும்போதுஇன்னும் அதிகமாய்த் துன்புறுகிறான்.

* காஷாய ஆடைகளால் தோள்களை மூடிக் கொண்டிருப்பவர்களிலும் கூட பலர் தன்னடக்கமின்றி சீர்கெட்டுப் போயிருக்கிறார்கள்.அத்தகைய தீமை புரிபவர்கள் தங்கள் தீச்செயல்களாலேயே நரகத்தை அடைகிறார்கள்.

* குற்றமற்றவர்களைத் தண்டித்துத் தீங்கு செய்கிறவன்,கூர்மையான வேதனை, வியாதி, உடற்குலைவு, பெரும் விபத்து, சித்தப்பிரமை, அரசு தண்டனை, பயங்கரமான குற்றச்சாட்டு, உறவினர்களை இழத்தல், அனைத்துசெல்வம் இழப்பு, நெருப்பாலோ, இடியாலோ அவன் வீடு எரிந்துபோதல் ஆகிய துன்பங்களில் ஒன்றை உறுதியாகக் காண்பான். மரணத்தின்போதும் அந்த வறட்டு மூடன் துக்கத்தில்தான் மறுஜனனம் காண்கிறான்.

* கருத்துடைமையில் களிப்புறு; உன் எண்ணங்களைக் கட்டிக் காத்துக்கொள்; சோர்வுறாதே. சேற்றில் விழுந்த யானையைத் தூக்கி விடுவதுபோல் உன்னைத் தீயவழியிலிருந்து மீட்டுக்கொள்.

* வெளிப்புறத்தைக் கழுவியது போதும்! உட்புறத்தைக் கழுவுவதே எனக்குத் தேவை.

* நம்பிக்கை, ஒழுக்கம், வீரியம், சித்தம், நடுவுடைமை,தர்மத்தை ஆராய்ந்து தெளிதல், அறிவு, நற்பயிற்சிகள், சிந்தனை ஒருமிப்பு – இவற்றில் பரிபூரண நிறைவு பெற்றால்,துன்பங்களை விரட்டி விடலாம்.

புத்தரின் கடைசிக் காலம். இது தெரிந்த உடன் புத்தருடைய அன்புச் சீடனான ஆனந்தன் அழுதான். கெளதம புத்தர், 'ஏன் அழுகிறாய்? எனக்கு மரணமில்லை. நான்தான் மறுபடியும் பிறப்பேன் என்று உனக்குச்சொல்லியிருக்கிறேனே?'

'சுவாமி நீங்கள் பிறப்பீர்கள். ஆனால் எங்கே, எப்படிப் பிறப்பீர்கள்? நான் எப்படி உங்களை அடையாளம் கண்டுபிடிப்பேன்?' என்று ஆனந்தன் கேட்டான்.

புத்தர் புன்னகை செய்தபடி, 'ஆனந்தா! என்னை அடையாளம் கண்டுபிடிப்பது மிகவும் சுலபம். அன்புடைய எல்லோரும் புத்தன்தானே...?'' என்று கேட்டார்.

புத்தரைப் பல சித்திகள் தெரிந்த சித்தர் ஒருவர் சந்தித்தார். புத்தரிடம் உயிருள்ள சிப்பி ஒன்றைக் கொடுத்த அந்த சித்தர், 'இந்த சிப்பிக்குள் விலை உயர்ந்த முத்து உள்ளது. சிப்பியை உடைத்து முத்தை எடுத்துக்கொள்ளுங்கள்' என்றார்.

அதற்கு புத்தர், 'முத்து எவ்வளவு விலை உயர்ந்ததாக இருக்கட்டுமே! ஓர் உயிரைக் கொல்வது என்பது என்னால் முடியாது! சிப்பியை நீயே எடுத்துச் செல்' என்று சொல்லிவிட்டார்.