Sa patuloy na pagsisikap ng Samahan ng mga Mag-aaral ng Kasaysayan - PNU (SAMAKA-PNU) na itaguyod ang puspusan at tuluyang intelektwalisasyon ng Samahan, datapwat nawala na ang pagpapakadalubhasa sa Kasaysayan sa Pamantasang Normal ng Pilipinas, at kapwa upang hubugin, hasain at gawing pamilyar ang mga kasapi nito sa gawain ng pananaliksik at paglilimbag ay nais nitong ilunsad, matapos ang tatlumpung taong pag-iral, ang kauna-unahang dyornal pangmag-aaral na magtatampok at maglilimbag ng mga pananaliksik, mga artikulo at iba pang akdang pampanitikan na nakikitaan ng kahusayan at pagtupad sa layunin ng Samahan na itaguyod ang intelektwalisasyon ng pagtuturo ng Kasaysayan sa bansa at ihatid ang mga aral nito sa bawat Pilipino upang luminang ng mga mabubuti, mapagkakatiwalaan at mapanagutang mamamayan.

Ang dyornal pangmag-aaral ng Samahan ay piniling pangalanang 'Hamaka' — salitang mula Kastila at ginagamit na rin ng mga Tagalog, na ang ibig sabihin ay duyan. Ang hamaka ay isang mahalagang uri ng transportasyon noon magpasa-hanggang ngayon lalo sa mga lugar na walang maayos na daan at mga sasakyan.