Administrerande direktør Arve Varden si oppsummering første halvår 2022

Tysdag 5. april 2022 avvikla Helse Førde beredskapen i samband med koronapandemien. Det har vore eit langvarig og krevjande arbeid, men eg er stolt over innsatsen og engasjementet medarbeidarane har lagt ned. Eg synest at vi har takla pandemien på ein svært god måte og som sjukehus har vi lært mykje som vi tek med oss vidare. Sjølv om første del av året var prega av pandemi har det vore stor aktivitet på mange andre område. Slik eg ser det er vi på rett veg innan fleire av dei prioriterte utviklingsområda. Eg vil særleg trekke fram at samarbeidet med kommunane om Helsefellesskap har kome godt i gang. Det gler meg òg at innsatsen innan forsking og innovasjon er styrka i Helse Førde. At byggeprosjektet Nye Førde sjukehus er i rute er ikkje sjølvsagt, då både pandemi og krigen i Ukraina kunne ha skapt større problem for framdrifta. 

Vi har likevel utfordringar som vi må jobbe vidare med. Det som uroar meg mest er at ventetida innan somatikken er vedvarande høg og at det er ein aukande trend med fristbrot. Her blir vår jobb å finne tiltak som har effekt. Dette er noko som styret i Helse Førde etterspør, og som vi vil prioritere høgt. 

Vi er på rett veg innan desse områda

• Sogn og Fjordane helsefellesskap vart etablert i desember 2021. Arbeidet med revidering av avtaleverket og å etablere felles innsats for dei prioriterte pasientgruppene er godt i gang.

• Prehospital plan er inne i sluttfasen med gjennomføring av tiltaka. Føremålet har vore å sikre innbyggarane i Sogn og Fjordane gode prehospitale tenester og å legge til rette for eit godt samarbeid mellom helseføretaket og kommunane om den akuttmedisinske kjeda.

• Vi vil starte opp ein forsøksperiode med Avansert heimesjukehus for barn og unge (AHS) i løpet av hausten 2022.

• Vi er i gang med delprosjekt ved Nordfjord og Lærdal sjukehus for å sikre god kapasitetsutnytting ved alle våre lokasjonar.  

• Framdrifta i byggeprosjektet Nye Førde sjukehus er godt i rute. Det nye Liva-bygget som er under bygging skal romme sengepostar, operasjonssalar og sterilsentral.

• Parallelt med bygginga foregår det mange tenesteutviklingsprosjekt som skal sikre god og effektiv drift i nytt bygg.  

• Tiltaka innan miljømåla er vi godt i gang med, spesielt gjeld dette energiøkonomisering i bygga våre.

• Helse Vest har auka midlane til forsking i mindre helseføretak. Desse midlane sikrar forskingsprosjekt av høg kvalitet og Helse Førde er i gang med fleire prosjekt innan forsking og innovasjon.

• Det vert jobba med realisering av Vestlandslegen saman med undervisningssektoren.

• Kvalitetsindikatorar vi har gode resultat på: helsetenesteassosierte infeksjonar, diabetesbehandling, psykisk helsevern for vaksne.

Vi har utfordringar innan desse områda

• • Ventetida innan somatikken for pasientar som har starta behandling, er vedvarande høg på rundt 70 dagar.

  • Innan psykisk helsevern er ventetida for barn og ungdom som har starta behandling uendra (49 dagar, måltal 35), medan gjennomsnittleg ventetid er noko synkande (32 dagar).

  • Det er aukande trend med fristbrot som i hovudsak skuldast mangel på sentrale behandlingsressursar.

  • Kvalitetsindikatorar som vi har for dårleg kvalitet på: pakkeforløp på kreft, brukarinvolvering i psykisk helsevern og rus, ventetid somatikk.

  • Det skal bli sendt brev til pasienten om time innan ti dagar. Kartlegging viser at om lag 25 – 30 prosent av tilviste pasientar i perioden februar til april ikkje har fått brev.

  • Økonomi – vi har ikkje nådd måltala for første halvår 2022.