ប្រវត្តិ​មជ្ឈមណ្ឌល​

សាវតារ

មជ្ឈមណ្ឌល​គរុកោសល្យ​ភូមិភាគ​ខេត្ត​តាកែវ​មាន​ទីតាំង​ស្ថិត​តាម​បណ្ដោយ​ផ្លូវ​ជាតិ​លេខ​២ ភូមិ​៣ សង្កាត់​រកាក្នុង ក្រុង​ដូនកែវ​ ខេត្ត​តាកែវ​។ មជ្ឈមណ្ឌល​នេះ​មាន​ព្រំប្រទល់​ខាង​ជើង​ជាប់​នឹង​ផ្លូវ​កៅស៊ូ​ខេត្ត​និង​សាលា​បឋម​សិក្សា​តាកែវ​ក្រុង​ ខាង​កើត​ជាប់​នឹង​សាលា​បឋមសិក្សា​អនុវត្តន៍​ក្រុង ខាង​ត្បូង​ជាប់​នឹង​ផ្លូវ​ជាតិ​លេខ​២ និង​ខាង​លិច​ជាប់​នឹង​វិទ្យាស្ថាន​ពហុបច្ចេកទេស​ភូមិភាគ​តេជោ​សែន​ខេត្ត​តាកែវ​។ មជ្ឈមណ្ឌល​មាន​ទីតាំង​ភូមិសាស្ត្រ​នៅ​លើ​ប្លង់ដី​រួម​គ្នា​ជាមួយ​នឹង​សាលា​គរុកោសល្យ​ និង​វិក្រឹតការ​ខេត្ត​តាកែវ​ និង​ដែល​មាន​ទីធ្លា​កីឡា​សាធារណៈ​(ទីលាន​បាល់ទាត់​) ស្ថិត​នៅ​ចំ​កណ្ដាល​។

យោង​ទៅ​តាម​សំណៅ​ឯកសារ​ប្រវត្តិ​ខ្លះៗ​ដែល​មាន​បន្សល់​ទុក​ មជ្ឈមណ្ឌល​មួយ​នេះ​ បាន​ចាប់​ផ្ដើម​ដំណើរការ​ដំបូង​ចាប់​តាំង​ពី​ ខែ​កក្កដា ឆ្នាំ​១៩៨១ ហើយ​ត្រូវ​បាន​គេ​ស្គាល់​ថា​ជា “មជ្ឈមណ្ឌល​គរុកោសល្យ​ភូមិភាគ​បឋម​សិក្សា”​ ដែល​ដំណើរការ​កម្មវិធី​បណ្ដុះបណ្ដាល​គ្រូ​កម្រិត​បឋមសិក្សា​ តាម​ប្រព័ន្ធ ៧ បូក ១ សម្រាប់​បំពេញ​តម្រូវការ​គ្រូ​ក្នុង​ខេត្ត​ចំនួន​ ​បី ​គឺ៖ ខេត្ត​តាកែវ​ ខេត្ត​កំពត និង​ខេត្ត​កំពង់សោម ។ នៅ​ឆ្នាំ​១៩៨២ មជ្ឈមណ្ឌល​ចាប់ផ្ដើម​បើក​វគ្គ​វិក្រឹតការ​ គ្រូ​កម្រិត​សិក្សា​ទី​២​ ឬ ដែល​បច្ចុប្បន្ន​យើង​ហៅ​ថា គ្រូ​មធ្យម​សិក្សា​បឋម​ភូមិ ឬ​ហៅ​តាម​ពាក្យ​សាមញ្ញ​ថា​ “គ្រូអនុ”​ តាម​រូបភាព​វគ្គ​បំប៉ន​រយៈពេល​ខ្លី ហើយ​ដែល​បាន​អនុវត្ត​បន្តបន្ទាប់​ហូត​ដល់​ឆ្នាំ​១៩៨៧​។ ដោយឡែក ឈ្មោះ​ផ្លូវការ​ថា​ “មជ្ឈមណ្ឌល​គរុកោសល្យ​ភូមិភាគ​ខេត្ត​តាកែវ” ត្រូវ​បាន​បង្កើត​ឡើង​តាម សេចក្ដី​សំរេច លេខ ១៣៧ ស.ស.រ ចុះថ្ងៃទី០៦ ខែ​សីហា ឆ្នាំ​១៩៨៤ របស់​ក្រុម​ប្រឹក្សា​រដ្ឋមន្ត្រី នៃ​សាធារណរដ្ឋ​ប្រជាមានិត​កម្ពុជា​។ ការ​គ្រប់គ្រង​គ្រឹះស្ថាន​មួយ​នេះ​ ក៏​ត្រូវ​បាន​បែងចែក​ជា​ពីរ​ដាច់​ពី​គ្នា ត​រៀង​មក​ គឺ មជ្ឈមណ្ឌល​គរុកោសល្យ​ភូមិភាគ​ខេត្ត​តាកែវ និង​សាលា​គរុកោសល្យ និង​វិក្រឹតការ​ខេត្ត​តាកែវ​ ហើយ​ដែល​ត្រូវ​បាន​អនុវត្ត​ចាប់​ពី​ឆ្នាំ​១៩៨៥ បន្តបន្ទាប់​មក រហូត​ដល់​សព្វថ្ងៃ​។

គិត​ត្រឹម​ខែ​សីហា ឆ្នាំ​២០២២​ មជ្ឈមណ្ឌល​គរុកោសល្យ​ភូមិភាគ​ខេត្ត​តាកែវ​មាន​អាយុ​កាល 38​ឆ្នាំ​។ ក្នុង​ដំណើរ​ការ​វគ្គ​បណ្ដុះបណ្ដាល​តាំង​ពី​ដំបូង បូករួម​ទាំង​វគ្គ​បណ្ដុះបណ្ដាល​ខ្លី​ក្នុង​អំឡុង​ទសវត្ស​ឆ្នាំ​១៩៨០ និង​ដោយ​គិត​ត្រឹម​ឆ្នាំ​២០២១​ កន្លង​ទៅ​ថ្មីៗ​នេះ មជ្ឈមណ្ឌល​បាន​បណ្ដុះបណ្ដាល​គរុសិស្ស និង​សិក្ខាកាម​សរុប​ចំនួន​ប្រមាណ 7,743 នាក់ ក្នុង​នោះ​ស្រី​ 2,522 នាក់ ហើយ​ដែល​បាន​បែង​ចែក​ជា ៣០ ជំនាន់​ផ្សេងៗ​គ្នា​។ លើស​ពី​នេះ​ មជ្ឈមណ្ឌល​ក៏​បាន​ដំណើរ​ការ​វគ្គ​បំប៉ន​គ្រូ​បង្រៀន​កម្រិត​បឋមសិក្សា ឡើង​ទៅ​ជា​គ្រូ​បង្រៀន​កម្រិត​មធ្យម​សិក្សា​បឋមភូមិ បាន​ចំនួន ១២ ជំនាន់ ដែល​មាន​សិក្ខាកាម​ចូលរួម​សរុប​ចំនួន​ប្រមាណ 1,972 នាក់ ក្នុង​នៅ​ស្រី 652 នាក់។