本土語文讀者劇場文本
臺灣台語語國小學生組
節能愛地球 陳美蘭
口白:彼盈暗 , 各人做各人的代誌…
阿公:老e仔!愛會記得明仔載食素喔！
阿媽:知啦! 知啦!我咧看電視 莫吵啦！
阿公:誠實是作戲悾，看戲憨喔！
阿母:阿爸，我共妳講喔！
阿公：啥代！
阿母：彼我hoonn去買太陽能的手電仔，哇囉! 哇囉!有夠好用的啦!
阿公：袂䆀，會曉好天著積雨來糧。
阿電:哦！盈暗食甲有夠飽的。
阿爸:恁徦看啦！人講腹肚皮若𠕇，目睭皮就冗，隨咧盹龜矣！
阿電:壞矣！欲交的報告猶袂好，較緊！較緊！
口白：隨去切冷氣.開電腦.放音樂…
阿能:跳甲足熱e，來沖一下仔身軀咧。
口白:這個時陣……
阿能:阿母矣！------啥人共我關電火啦！
阿公:停電矣啦！喝~遐大聲，強欲予妳驚驚死。
阿爸:莫驚！莫驚！我攑手電仔。
阿母:佇遮，拄仔好用著。
口白: 阿爸安搭逐家緊張的心情。
阿能:hoonn！早毋停慢毋停，人頭拄洗落呢！這聲去了了矣！
阿電:哎喲！壞矣啦!資料攏無khiam起來！
阿能:這馬知影用電傷重(tang)，會無電，後改我袂擱按呢矣!
阿公:細貳無蝕本，緊插頭拔拔咧，電來才袂相拍電。
阿爸:猶是恁阿公想較有到。
阿母:明仔載愛讀冊、上班。緊去睏！
阿能:hoonn!無冷氣欲那睏會去啦！
阿媽:心靜~自然就涼~！
阿電:阿公，無電火，人~人~人~家己毋敢睏啦！阿公~~你陪我好毋！
阿母:誠實hoonn！惡人無膽。
口白:逐家甲窗仔門攏拍開，過一下矣！
阿能:阿公，怪奇呢？無冷氣，房間嘛誠涼呢！
阿公:hng呀！共窗仔門攏拍開，免冷氣就會涼矣！來~緊睏。
口白:從彼tau停電了後，逐家知影節電佮省電的重要，毋通無蹔無節一直用電。
口白:歇睏日準備欲出門去𨑨迌囉……
阿能:小等一下，我看插頭有拔無？
阿母:嗯，袂䆀喔！阮阿能是節能小天使哦！
阿電:哼！阿母偏心，人我嘛攏共冷氣定佇26度。
阿母:e~~讚喔！恁兩兄妹仔會曉愛護地球，節約用電喔！
阿爸:閣毋行，公車就坐袂著囉！
阿電: 緊！緊！公車來矣！
本土語文讀者劇場文本
閩南語國小學生組
臺灣的好滋味 吳遊惠
小瑩:唉!到底欲去佗位較好咧?
其他人:你一直吐大氣，是發生啥物代誌?
小瑩:啊就阮表姊對美國轉來𨑨迌，伊講想欲食咱臺灣在地的好食物，我咧想欲𤆬伊去佗位才會當共臺灣在地的好口味食透透--lah。
小旭:敢有遐困難？。就𤆬伊去夜市仔，逐項在地的好食物攏嘛有。
其他人:規欉好好，無錯。
小瑩:著嘑！我哪會無想著。我若去夜市仔，一定攏會去食肉圓，彼肉圓食起來𩚨嗲嗲，淋頭家獨家祕方的搵料，食落去，有夠紲喙的，我一下仔就食了囉!是講食好鬥相報，恁嘛來講看覓，若去夜市仔，恁上愛食佗一項好料的咧?
小錡:我上愛食臭豆腐，遠遠就鼻著臭豆腐的味，有夠唌人的。彼臭豆腐糋甲赤赤，濫蒜蓉、泡菜做伙食，咬落去，外口脆脆，內底幼軟!雖罔，味鼻起來臭臭，毋過食起來真芳呢!
其他人: 日頭跤~有影都著。
小庭:共你講喔，我逐擺去夜市仔，若無食著蚵仔煎，就敢若無來咧，彼鮮沢的蚵仔、軟𩚨啊軟𩚨的粉糊、芳芳芳的雞卵、清甜的白菜仔，搵料擱共淋落去，好食!
小樺:聽你講煞，我喙瀾強欲津落來啊 !
其他人:你喔！。有夠枵饞的。
小娣:換我講!換我講!我上佮意的是咱遮有名的丸仔羹麵，頭家用香菇、筍絲來牽羹，湯頭有夠讚的。逐擺我攏會濫薟薑仔醬，抐抐咧才開始食，按呢才有著味，連鞭就共一碗羹麵食了了。
其他人:你蹛佇巷仔內的喔!誠內行，阮嘛攏是按呢食呢!
小享:鹹酥雞上著我的味，除了鹹酥雞，我擱會點雞尾椎、菜頭粿、thia̋n-pú-lah……，頭家共所有的物件糋甲芳芳酥酥，糝寡胡椒粉，那食鹹酥雞那啉『可樂』，真正是人生上大的享受啊!
小樺:恁講的tsûai，我逐項攏想欲食啦!
其他人: 你真正是菱角喙，無食大心氣。
小晴:恁講的攏是鹹的，我愛食的就佮恁無仝啊!我上愛食的是甜粅粅豆花，會當摻家己愛食的料，上特別的是頭家濫的毋是糖水，伊是濫豆奶。甜蜜、滑溜的豆花，白拋拋、軟㽎㽎，食起來綿綿綿。食落到地~hông心涼脾土開。
小瑩:夜市仔真正是逐項好料的攏有—neh。
小樺:下暗拄好有夜市仔，咱緊攢攢--leh通來去。
其他人: 你有影講著食，就舂破額。
小瑩:好，咱做伙𤆬阮表姊來去食臺灣的好滋味!
所有人唱:下暗~咱相招來去~咱來去來去踅夜市~