3.演說稿

作者:陳美蘭

阮足無愛讀冊，上課攏袂專心，尻川閣親像有一尾蟲坐袂牢。老師上課講甲喙角全全波，我就親像鴨仔聽雷，霧嗄嗄。見擺寫課題嘛是敢若咧畫塗符仔，凊彩應付一下，莫怪我的成績對後壁算起來，攏是全班前三名啦!

有一工，阮阿爸騎oo-tó-bái載我，經過一間冊店的時陣，我看著一仙豬仔囝的布尪仔，伊有圓圓的耳仔，薄薄的喙唇，佮一簇圓圓的尾溜，古錐的外型，親像一塊吸石，共我的目睭攏吸去矣。我緊叫阿爸來看，我共阿爸吵講欲買這仙布尪仔，阿爸就講:「你若有法度就考全班前五名，我就買予妳。」阿爸你敢是乞食咧下大願?對我來講彼是「火燒罟寮」-全無望!倒到厝 ,我心內攏亦是彼仙布尪仔，敢講咱真正是有緣無份?

阮想著老師捌共我講過，我是一个巧巧的囡仔，就是無愛讀冊爾爾，為著欲得到這仙布尪仔，我決心欲來拼看覓。隔工我就走去共阿爸講這个決定。伊煞，哈!哈!哈!笑徦足大聲，閣講:「臭彈免納稅金，妳較早去睏較有眠啦!」真正袂勘得人激，自彼工開始我就決心共蹽落去矣。阮專心聽課，認真寫課題，袂曉的就問別人，看著按呢，連上課的老師攏當作我是食毋著藥仔呢。彼擺的考試，我對吊車尾的成績進步到全班第七名，雖然離阮阿爸的標準猶閣差兩名，心內有淡薄仔稀微，毋閣，同窗的攏講我比第一名的閣較奢颺喔!過轉工透早醒來，我看著彼仙古錐的布尪仔倒佇我的身軀邊，我當做家己是咧陷眠呢!歡喜ka ,感謝阿爸對我的鼓勵!

自按呢，我就共這仙布尪仔當做家己的寶貝，因為伊代表親情、友情佮我骨力的拍拼。朋友來阮兜𨑨迌，我嘛會請出上麻吉(mah-tsi)的布尪仔佮in做伙耍，逐家嘛攏呵咾伊足古錐的喔!我感覺會當共家己上佮意的𨑨迌物仔佮朋友分享嘛是一件足快樂的代誌啦!

因為伊，我才開始會曉想欲認真讀書；有伊的陪伴，阿爸無佇身邊，我袂感覺孤單，伊予我一種無形的力量去面對困難，提醒我愛靠自己拍拼來完成願望。所以，佇我的心內，這仙布尪仔是我永遠的好朋友，嘛是我上佮意的𨑨迌物仔。我的演講就到遮，感謝逐家!