Eguraldi freskoarekin abiatu gara, Anotz herriaren inguruan dagoen Arakil ibaiaren ondotik. Bere urak Arakilenean isurtzen dituen Udarbe ibaiaren gaineko zubia zeharkatu eta basoan murgildu gara. Han aurrez aurre bizpahiru zerri topatu ditugu, eta hasieran aztoratu egin badira ere, lasai jarraitu dute han ugari dauden ezkurrak jaten.

Tontorrean Garañoko gaztelua duen mendia inguratu eta lehenbiziko herrixkak zeharkatu ditugu: Beasoain eta Egillor. Hasiera honetan bide nahiko laua izan dugu, baina hemendik aurrera aldapa pittinka handitzen joan zaigu.

Gorantz goazela, Santa Engrazia eta San Kristobal baselizen ingurutik igaro gara eta basoan haritz eder eta ikusgarriak azaldu zaizkigu (ikusi argazkikoa), eta ez gutxi gainera. Bide onean gabiltza, baina hasi gara aurreko egunetako eurien ondorioak sumatzen.

Basotik irten garenean, ikusmira zabaltzearekin batera, aldapa ere dezente tentetu zaigu. Mortxe eta Saldise mendien arteko lepoan, eskuinaldean utzi dugu Saldise mendiko tontor harritsua (1.043 m) eta Mortxe aldeko bidea hartu dugu.

Azken aldapa pikoa igo eta Mortxeko gailurrera (1.123 m) iristean, a ze panoramika azaldu zaigun begien bistan. Ollo ibarraz gain, Iruñerria ere ederki ikusten da hemen goitik. Haizea hoztu egin da ordea, eta lehen erantzitako janzkiak berriro jantzi behar izan ditugu.

Haizetik babestuko gaituen lekua bilatu eta hamaiketakoa egin dugu hantxe. Indarberriturik, berriro tontorrera itzuli eta taldearen argazkia egin dugu, atzealdean Andia mendilerroa dugula. Zeruan ostarteak daude eta, ibilgiro ederra dagoenez, goitik beherako bideari ekiteko garaia heldu zaigu.

Goitik beherakoan, besteak beste, Azantzako haritz monumentala ikusteko aukera izan dugu. Etxe armarridun dotoreak dituen Azantza herrira heltzean, batzuek Aizpun herrira joatea erabaki dute, baina gehienak NA-7020 errepidetik Ultzurrungo mendatera joan, eta handik sakanera jaisteko bidea hartu dugu.

Bide lauso samarretik jaitsi, oinetakoak lokaztu eta, eureka, gaurko ibilaldiko harribitxia: Aizpungo ur-jauzia. Hura miretsi eta Aizpun aldera jarraitu dugu gaurko ibilaldi dotorea amaitzera. Arropak eta batik bat oinetakoak aldatu eta Errotz herrira joan gara, hango Oskia jatetxean bazkaltzera, beste ibilaldi eder bat egin eta gero.