Lizarragako mendatea - Errotz
Lizarragako mendatea - Errotz
(2024-10-01ean, asteartea)
Gaurkoan, EZH-GI 15 ibilbidea egin dugu. Goizeko 8etan irten gara Lizarragako mendate gainetik 40 mendizale, horietatik 8 emakumezkoak.
Hasieran ekialderantz jo dugu, Tontorraundi mendiaren albotik, Aipeta parajetik eta hor jira eginez, Alzemearko leze ondotik, Euskal Herriko erdigunera iritsi gara. Han gosaldu, Ollo aldeko sakana aldera hartu, Ezpeldixulon ezkerrera egin eta Aizkorbeko borda ondotik Txurregi tontorra harrapatu dugu. Jaitsiera bat egin eta aurrera, Irurtzun parean genuela, Gaztelu gainera igo eta handik dena beherantz, hor ginen Errotzen 7 ordu inguru pasa ondoren.
Ibilbidea eta denborak:
Lizarragako mendate gaina (1.010 m), Tontorraundi alboa (1.161 m; 4 km; 0:50), Aipeta parajea (1.218 m; 8,4 km; 1:50), Alzemearko lezea (1.224 m; 9,5 km; 2:05), Euskal Herriko erdigunea (1.235 m; 10,7 km; 2:20), Ezpeldixulo (875 m; 13,7 km; 3:30), Aizkorbeko borda (850 m; 17 km; 4:20), Txurregi gaina (1.123 m; 18,3 km; 5:00), Gaztelu gaina (1.009 m; 20 km; 5:45), Errotz (bukaera) (464 m; 23,5 km; 6:50).
Desnibel metatua: igoeratan: 840 m; jaitsieratan: 1.427 m.
Mapa
Profila
Aireko bista
Andia mendilerroko idoia
Goizeko 8etan abiatu gara Lizarragako mendatetik. Goiz gorria dugu, baina hemen goian (1.010 m) haize fina dabil eta ondo jantzita ekin diogu bideari. Laster azaldu zaizkigu inguru hauetan ohikoak diren idoiak, oraingoan besteetan baino ur gehiagorekin. Inguruko belardietan ere igarri da hemen ere euria dezente egin duela azkenaldian.
Euskal Herriko Erdigunean
Eremu nahiko lauan abiadura bizian joan gara. Mendi-kaxkoak lainotu egin dira eta ez ditugu tontorrak behar bezala ikusterik izan, harik eta Euskal Herriko Erdigunera inguratu garen arte. Hantxe denok elkartu eta taldeko argazkia egin dugu.
Aizkorbeko borda
Hamaiketakoaren ondoren goitik behera egin dugu tarte nahiko luzean, baina Aizkorbeko borda ingurutik aurrera aldapan gora hasi behar izan dugu. Gure behealdean ikusi ditugu Ollaran ibarreko zenbait herri (Ollo, Senosiain, Ultzurrun) eta hurrengo ibilaldiko mendiak eta haitzarteak.
Txurregira igotzen
Eguzkia inguruak argitzen eta epeltzen hasi denean, aldapa tentetu egin zaigu eta ondo tentetu ere. Kilometro inguruko tartean, ia 300 metroko desnibela gainditu behar izan dugu. Hasieran basoan, gero bidexka harritsuan.
Gaztelu mendiaren ikuspegia
Astiro-astiro heldu gara Txurregiko gainera (1.123 m). Egia esan, postontzia berrehun bat metrora dago, baina hemen goitik ederki ikusten da laster igo behar dugun hurrengo mendi tontorra: Gaztelu (998 m).
Olarregiko leporantz
Igoera aldapatsua izan bada, zer esan jaitsieraz? Argazkia ikusi besterik ez dago. Malda piko-pikoan behera ilaran jaitsi gara denok. Halaxe inguratu gara Olarregiko lepora azken aldapari ekin aurretik.
Irurtzun eta Irurtzungo inguruak
Txurregi eta Gaztelu mendien arteko lepo horretatik ondo asko ikusten da Irurtzun herria eta inguruko mendi, herri, herrixka eta gainerakoak. Mendi horien artean bi ahizpak, Ahizpa Haundia (701 m) eta Ahizpa Txikia (674 m), eta Erga (1.094).
Taldea Gaztelu mendiaren gailurrean
Berriro aldapa gogorra egokitu zaigu Gaztelura igo ahal izateko. Gailur honetan egon zen XIII. mendeko agirietan agertzen den Olarregiko gaztelua eta haren inguruan egin dugu mendizale taldearen bigarren argazkia. Jarraian Arakil ibaiaren ondoan dagoen Errotz herrira jaitsi gara, baso ederraren itzalpean tarte luze batean, eta hango Oskia jatetxean bazkaldu dugu giro paregabean.
Bideoa
Estekak/Enlaces
Page updated
Report abuse