Agiñaga - Urduñako mendatea

(2023-10-31an, asteartea)

Gaur, urriak 31, asteartea, Ordiziatik autobusez irten gara goizeko 6:30ean GMBko 41 mendizale (11 emakume eta 30 gizon). Goizeko 8:05ean Agiñagara (Aiara) iritsi eta EZH zeharkaldiko laugarren etapari ekin diogu.

Hasiera oso gogorra izan da, 670 metrotik gorako desnibela gainditu behar izan baitugu; bidea, berriz, hasieran pista, baina gero bidezidor lokaztua. Menerdigako ataka igarota, Gorobelgo goi-lautadara iritsi gara, eta han desnibelak txikiagoak izan dira. Zerua oskarbi bazegoen ere, Menerdigako atakaren igoeran haizeak gogor jotzen zuen. Gorobelgo goi-ordokian haizea indarrean ibili da, baina eguerdi aldera baretu egin zaigu.

Zati batzuk belardi artean eta beste batzuk txilar artean eginez, mendi hauetan barrena ibili gara: Iturrrigorri (1.073 m), Bedarbide (1.041 m), Solaiera (1.038 m) eta Txarlazo (933 m). Gero Fraideburu haitzaren ingurutik igaro eta Urduñako mendatean amaitu dugu ibilaldia, 6:30 ordu pasa ondoren.

Ibilbidea eta denborak:

Agiñaga (388 m), Menerdigako lepoa (1.061 m; 5,5 km; 2:10), Iturrigorri (1.073 m; 7,4 km; 2:55), La Barrerilla (941 m; 8,5 km; 3:40), Bedarbide (1.041 m; 10,6 km, 4:10), Atezabal tontorra (1.027 m; 12,7 km; 4:40), Solaiera (1.038 m; 13,3 km; 4:50), Txolope (1.027 m; 13,8 km;5:00), Goldetxoko lepoa (914 m; 14,4 km; 5:10), Txarlazo (933 m; 14,8 km; 5:20), Fraideburuko lepoa (850 m; 16,1 km; 5:40), Los Maderos tontorra (913 m; 17.3 km; 6:00), eta Urduñako mendatea (890 m; 19,5 km; 6:30).