شەشەمین کۆنفرانسی زانستی نێودەوڵەتی زانکۆی گەرمیان بە ناونیشانی
(میراتی هەمیشەیی ناوچەی گەرمیان: شوێنەوار، ناسنامە و بەهای مێژوویی)
(ISC-AIHG-2026)
بەسەرپەرشتی سەرۆکی زانکۆی گەرمیان
پرۆفیسۆر دکتۆر ئاراس فەریق زەینەل
زانکۆی گەرمیان بە هاوبەشی دامەزراوەی کەریمی عەلەکە، بەشی میراتی کەلەپوری- زانکۆی بۆڵۆنیا-تاقیگەی پاست ئەلما ماتەر ستودیۆروم و ڕێکخراوی میساک، شەشەمین کۆنفرانسی زانستی نێودەوڵەتی خۆی ڕادەگەیەنێت بە ناونیشانی (میراتی هەمیشەیی ناوچەی گەرمیان: شوێنەوار، ناسنامە و بەهای مێژوویی). کۆنفرانسەکە لە زانکۆی گەرمیان-کەمپی بەردەسور-کەلار بەڕێوە دەچێت.
قسەکەرانی کۆنفرانس
پ.د. زرار صدیق توفیق
زانکۆی دهۆک
پ.ی.د. سێرێنێللا مانسینی
زانکۆی بۆڵۆنیا-ئیتالیا
پ.ی.د. ئیسماعیل شەمس
زانکۆی علامە طباطبائی-ئێران
_______________________
گرنگی کۆنفرانس:
1. ئەم کۆنفرانسە بۆ ئاوڕدانەوەیە لە سەردەمێکی مێژوویی دیاریکراو کە لە کۆتایی چاخی برۆنزیەوە تاوەکو کۆتایی سەدەکانی ناوەڕاست لەخۆدەگرێت. ئەم ماوە مێژووییە کەمترین سەرنجی شارەزایان و لێکۆلەرەوانی بەلای خۆیدا ڕاکێشاوە و بایەخێکی گرنگی هەیە لە دەوڵەمەندکردنی ناسنامەی مێژوویی و کەلتوری ناوچەی گەرمیان.
2. ئاوڕدانەیەکی گرنگە لە مێژووی دەوڵەمەندی گەرمیان و ئاشناکردنی کۆمەڵگە ناوخۆییەکان لە بایەخ و گرنگی شوێنەوار و مێژووی ناوچەکە و بڵاوکردنەوەی ڕۆشنبیری گشتی.
3. بایەخدان و بە ناوەندکردنی ناوچەی گەرمیان لە توێژینەوەکانی توێژەری ناوخۆیی و بیانی و بواردەڕەخسێنێت بۆ وروژاندنی چەندین بابەتی گرنگ و نوێ و بەخشینی بیرۆکەی نوێی سەردەمی بە توێژەران بۆ ئەنجامدانی توێژینەوەی زانستی ڕەسەن، چونکە ناوچەکە دەوڵەمەندە بە چەندین کەرەستەی خامی توێژینەوەی زانستی.
4. کارکردن لەسەر پرسە ئاڵۆزە مێژوویی و جوگرافی و شارستانیەتەکانی ناوچەی گەرمیان و ڕەخساندنی دەرفەت بۆ توێژەران بۆ تێپەڕاندنی سنورە جوگرافیە دەستکردەکان و لە چوارچێوەی یەک پاکێجی جوگرافیدا سەرنج دەخرێتە سەر تەواوی سنوری گەرمیان.
5. دروستکردنی هەماهەنگی و کاری پێکەوەیی لەگەڵ زانکۆ و ناوەندە ئەکادیمیە نێودەوڵەتییەکان و ئەنجامدانی کاری هاوبەش. ئەمەش هاندەرێکی باشە بۆ سەرنج ڕاکێشانی زانکۆ و ڕێکخراو و ناوەندە زانستییە نێودەوڵەتییەکانی دیکە بۆ ناوچەی گەرمیان.
6. شوناس و ناسنامەی هەر گەل و نەتەوەیەک بەندە بە پاراستن و زیندوو هێشتنەوەی مێژوو و میراتە شوێنەواریەکانییەوە. ئەم کۆنفرانسە ڕۆڵێکی گرنگ دەگێڕێت لە زیندووکردنەوە و پاراستنی میراتی کەلتوری ناوچەکە. هەروەها لە ڕێگەی دەرخستنی ڕاستییە مێژووییەکانەوە شوناسی دەوڵەمەندی ناوچەکە دەخرێتە ڕوو.
____________________
ئامانجەکان
کۆکردنەوەی داتا شوێنەواری و مێژووییە نوێیەکان لەسەر ناوچەی گەرمیان و ئاشکراکردنی ڕاستییە مێژووییە شاراوەکان.
ئاشنابوون بە ڕۆڵی گەرمیان لە گواستنەوەی پەرەسەندنە فەرهەنگی و شارستانییەتەکان و بیروباوەڕ و ئاین و نەریتە هونەرییەکان.
ئاوڕدانەوە لە بەها شوێنەواری و کەلتوری و مێژووییەکانی ناوچەی گەرمیان و ئاشناکردنی ڕای گشتی ناوخۆیی و دەرەکی بە گەنجینە شوێنەواری و دەوڵەمەندەکەی گەرمیان.
پێکەوە بەستنەوەی دیمۆگرافیای ناوچەی گەرمیان: ئامانجی ئەم کۆنفرانسەیە گەرمیان بخاتەوە نێو چوارچێوە جوگرافی و شارستانییەتەکەی خۆی و ڕەسەنیەتی نەتەوە یەک لە دوای یەکەکانی ناوچەکە بخاتە ڕوو.
ئامانجی گرنگی ئەم کۆنفرانسە ئاشناکردنی ڕای گشتییە بە گرنگی ناوچەی گەرمیان لە ڕووی مێژووی فرەنەتەوەیی و فرە ئاینی لە ناوچەکە و پتەوکردنی گیانی پێکەوە ژیان و یەکترقبوڵکردن لە نێو نەوەکانی ئێستا و داهاتوودا.
بڵاوکردنەوەی توێژینەوەی پێشەنگ و میتۆدە تەکنەلۆژیاییە نوێییەکان کە چارەسەری نوێ بۆ ئاڵەنگاریە شوێنەواری و مێژووییەکان پێشکەش دەکەن.
بونیادنانی چوارچێوەیەکی کاری پێکەوەیی لە نێوان اماەزراوە ئەکادیمی و حوکمی و ڕێکخراوە پەیوەندیدارەکان، لە پێناو بەرزکرنەوەی ئاگایی گشتی و پەرەپێدانی ڕۆشنبیری شوێنەواریی و مێژوویی.