Sa larangan ng optika ang isang prisma ay isang medyum na pinagkalooban ng transparency. Kung kayat nagiging bahaghari ang purong puting ilaw kapag dumadaan ito sa isang prisma.

Sa madaling sabi, bawat tao ay may natatagong katangian sa likod ng kanyang malabagharing talambuhay. Kabilang na dito si Ginoong Mark-John R. Prestoza, isang gurong kasalukuyang nagtuturo sa Paaralan ng Quirino. Lingid sa ating kaalaman, ang kanyang talambuhay ay maihahalintulad sa puting ilaw na may pagbabagong anyo sa kulay pagkat dumaan sa isang prisma. Kung saan ang puting ilaw ay bumubuo sa ilang kilalang kulay na kapareho ng bahaghari.

Una, ang kulay pula. Minsan naiuugnay ito sa salitang pag-ibig, subalit sa kabilang banda, naikakabit din ito sa kapaligiran ng trabaho. Gaya na lamang ni Ginoong Prestoza, kung saan kakikitaan siya ng determinasyon sa kanyang trabaho na naglalayon sa pagkamalikhain at pagiging bukas para sa mga bagong ideya. Dahil sa kanyang dedikasyon, pinangaralan siya bilang Outstanding Researcher noong 2019.

Tulad ng pula, ang kulay dilaw ay tumutukoy din sa pagiging positibo. Ang pagiging bukas, maaraw at hindi pagkatakot ni Ginoong Prestoza sa mga pagbabago na talagang umaaninag sa kanyang husay bilang makata. Kaugnay sa parangal na nakamit sa nakaraang taon, ang kanyang mga akda at saliksik ay nailathala sa Saringit Journal Division of Isabela Learning Source Management Division Region 2 Curriculum Implementation Division.

Asul, kalmado at payapa. Bagamat sa kabila ng lilim ng pandemya, nanatiling natural at orihinal ang gampanin magbahagi ng edukasyon ang layunin ni Ginoong Prestoza. Hindi man gaanong komportable sa kaslukauyang sistema ng edukasyon, hindi ito naging hadlang sa kanyang pagbibigay kontribusyon sa pagpapalaganap, pagpapaunlad, at pagpapayaman ng wikang Filipino at mga kagutubong wika ng Pilipinas.

Sa usaping lila, masasabing malakas at agresibo si Ginoong Prestoza, ngunit sa makatwirang paraan. Agresibo ang Ginoo pagdating sa pagiging mahusay na makata, guro, at mananaliksik. Siya ay guro sa asignaturang Filipino, Papel sa pananaliksik at Entreprenuership sa Senior Highschool. Bihasa siya sa wikang Filipinob kung saan siya ay nakapagtapos ng Master of Arts in Education at kasalukuyang kumukuha ng Doctor of Philosophy in Language Education-Filipino sa Isabela State University.

Mula sa armonyang katangian ni Ginoong Prestoza bilang repleksyon ng ibat ibat inspiradong kulay ng kanyang talambuhay, binigyan siya ng pagkilala bilang Ulirang Guro 2021 ng Komisyon sa Wikang Filipino.

Kahanga hanga at pambihirang kakayahan at kontribusyon ang ipinamalas ni Ginoong Mark-John R. Prestoza sa kabila ng kanyang simpleng aura.

Datapwat nariyan ang pandemya bilang panakip sa liwanag, ang ating dedikasyon at determinasyon ang magsisilbing puting ilaw na aaninag sa ating prismo upang muling makita ang ganda ng bahaghari. // NEPTHALY C. GASPAR, Grade-9, October 10, 2021