Waikato ki Taranaki

I hoe ooku tuunohunohu mai i Hawaiki ki Te Ika -a-Maaui i te waka o Tainui. E tuu teitei ana tooku maunga tapu, me huri too kanohi ki te maunga o Taupiri Kuao, ki te Mata o Tuutonga 'moe mai raa ngaa Kiingi o te poo, Te Arikinui, Te Puea, ngaa karangaranga maha, pai maarire. E rere kau ana ngaa wai o Waikato ki ngaa rekereke o Taupiri. E noho ana tooku marae ko Maurea ki te riu o Waikato e kaha poipoi i tooku hapuu o Ngaati Naho, noo reira, he piko, he taniwha, Waikato taniwharau.

Heoi, he hononga anoo taaku ki Taranaki maunga, e peenei ana;

Ko Ngaati Rahiri te hapuu,

Ko Te Atiawa te iwi.

Ko Manukorihi te marae.

I moe a Rameka Te Hua Piri ki a Iro Teno (w), ka puta ko Waimanapuku Pereniki 'ko ia hoki te tuahine o Tamihana Te Karu' i moe a Waimanapuku Pereniki ki a Te Aho o te Rangi Wharepu, ka puta i a raaua ko Retimana (t) - I moe a Retimana ki a Paremangemange (w) ka puta ko Maaru (w). I moe a Maaru ki a Te Whiunui, ka puta mai i a raaua ko Te Hiwa (t) - i moe a Te Hiwa ki a Taurewa - ka puta mai i a raaua ko Parehiwa (w) - i moe a Parehiwa ki a Te Kowaenga, ka puta ko ahau.