A Garda Civil visita o Valle-Inclán para previr o ciberacoso

O alumnado de 5º e 6º de Primaria aprendeu a facer un uso seguro das redes sociais e a identificar situacións de acoso.

REDACCIÓN | O noso centro recibiu este mes de novembro unha visita moi especial. Axentes da Garda Civil achegáronse ao CEIP Valle-Inclán os días 5 e 12 para impartir unhas charlas informativas sobre os riscos das novas tecnoloxías (TIC), o acoso escolar e o ciberacoso.

Privacidade e seguridade

Durante as sesións, os axentes explicaron ao alumnado de 5º e 6º curso a importancia de protexer a nosa privacidade. Entre os consellos principais, destacaron a necesidade de crear contrasinais longos e complexos, así como a importancia de ter moita precaución coa idade das persoas coas que se fala a través de Internet, desconfiando de estraños que poidan intentar enganar aos menores.

Diferenciar o acoso dunha discusión

Un dos puntos clave da charla foi aprender a identificar o verdadeiro acoso. Os axentes sinalaron que, para que unha situación se considere acoso (e non unha discusión puntual), as agresións ou insultos —xa sexan físicos ou a través das redes sociais— deben producirse de forma repetida e frecuente no tempo.

Aprender a respectar

O obxectivo desta iniciativa é que os nenos e nenas aprendan a respectarse mutuamente e saiban como utilizar correctamente a tecnoloxía. Tras a proxección dun vídeo sobre a convivencia escolar, o alumnado participou nunha quenda de preguntas para resolver dúbidas e recibir consellos sobre como evitar erros no manexo de dispositivos dixitais.

A xornada rematou cunha grande ovación por parte dos estudantes, que agradeceron á Garda Civil a claridade e calidade da súa explicación.

 OS 5 CONSELLOS DA GARDA CIVIL

• 1. Contrasinais fortes: Utiliza sempre claves longas e complexas para protexer as túas contas.

• 2. Coidado coa idade: Non fales con persoas que non coñezas na vida real; poden non ser quen din ser.

• 3. Identifica o acoso: O acoso escolar ou ciberacoso é algo que pasa moi a miúdo, non é un problema dun só día.

• 4. Respecto dixital: A tecnoloxía é unha ferramenta para aprender e desfrutar, pero sempre respectando aos demais.

• 5. Pide axuda: Se tes algunha dúbida ou che pasa algo raro en internet, fala sempre cunha persoa maior de confianza.

Percusión, con material de refugallo, entre clase e clase.

O pasado 23 de febreiro, o alumnado de 5º e 6º de Primaria do CEIP Valle Inclán do Grove participamos nun obradoiro moi especial de percusión impartido por Didier Díaz Madan, director e docente do colectivo Ecopercusión.

Durante a actividade, todos os nenos e nenas tivemos a oportunidade de descubrir como facer música utilizando cubetas, paus e outros materiais de refugallo, aprendendo diferentes ritmos e formas de coordinación en grupo. Divididos en varios equipos, cada grupo preparou unha parte distinta da composición musical ata conseguir crear unha canción entre todos.

O taller estivo cheo de ritmo, traballo en equipo e moita diversión. Despois de varias sesións de práctica intensiva, rematamos cunha actuación para os cursos inferiores de Primaria, demostrando todo o aprendido durante o obradoiro.

A experiencia gustoumos moito a todos os participantes, que gozamos facendo música dun xeito creativo e sostible, ao mesmo tempo que tomamos conciencia da importancia de reutilizar materiais.

Sen dúbida, foi unha actividade diferente e moi enriquecedora para todo o alumnado participante.

Entroido meco no CEIP Valle Inclán

Os medios de comunicación, tema dos disfraces deste curso, que lucíu o alumnado e profesorado do CEIP Valle Inclán.

No noso colexio o entroido comezou, como todos os anos, cos mandadiños diarios, desde traer algo na cabeza ata vir en pixama, cousa que aos nenos e nenas lles gusta moito; e incluso un día de disfrace libre, que se converte nun desfile de todo tipo de personaxes.

Semanas antes o alumnado de todos os cursos, orientados polos seus mestres e mestras, traballaron moito para preparar os seus disfraces con distintos materiais. Algunhas clases tamén prepararon unha canción para animar a celebración do venres, día grande do Entroido no colexio.

Ese día celebrouse un festival de Entroido. Este ano debido ao mal tempo, houbo que facer o desfile e a actuacións das comparsas, no ximnasio.

Todos os disfraces estaban relacionados co tema do PDI deste curso “Os medios de comunicación”. Os máis pequenos, os nenos e nenas de 4º de EI, convertéronse nuns equipados esquimós acompañados polas súas profes reporteiras; completaron o seu desfile, cunha canción sobre estes habitantes da Antártida. En 5º de EI viaxaron a Xapón e como xaponeses desfilaron facendo o baile do dragón. E os nenos e nenas de 6º de EI leváronos a Venecia e como gondoleiros desfilaron, mestres as súas mestras non perdían detalle como reporteiras.

O alumnado de 1º e 2º de E.P. foron disfrazados de pantallas, pero non de pantallas de ordenador ou televisión, foron de pantallas de Xinzo de Limia. Levaban globos que imitaban vexigas de vaca e desfilaron correndo, para que soaran os cascabeis que decoraban os seus cinturóns.

Os nenos e nenas de 3º A e a súa profesora, desfilaron como bailaríns de breakdance levando unha radio na man, feita por eles. E o alumnado de 3º B, foron de ratos, pero non de ratos de ordenador, senon dos roedores.

En 4º A todo o alumnado e a súa profesora disfrazáronse de futbolistas e desfilaron xogando co balón. Mestres que en 4º B eran reporteiros de todo tipo e cantaron unha canción preparada por eles e o seu profesor.

Os maiores do cole, os nenos e nenas de 5º e 6º de E P, elexiron ir disfrazados de reporteiros de guerra, levaban uns chalecos antibalas que fixeron eles mesmos coa axuda dos seus titores e uns grandes micrófonos para recoller toda a información nas zonas en conflito. Os nenos e nenas de 5º de E.P. tamén prepararon unha canción que eles compuxeron, coa supervisión do profesor de música.

Todos, alumnado e profesorado, disfrutaron moito deste animado festival, cargado de creatividade, humor, música e baile. 

COMO CREAMOS EN CREATIVA?

No CEIP Valle Inclán do Grove, varias alumnas de 6º de primaria participan no club de Biblioteca creativa

Este curso na biblioteca creativa alumnas de 6º de primaria fixeron moitos proxectos coa impresora 3D, diseñados coa aplicación Tinkercad, como chaveiros e cadros personalizados.

Agora que remataron o curso de Impresión 3D, comezaron a facer chapas co logo do PDI deste curso “Voces de Ardia”. Este logo foi feito por unha destas alumnas, Samantha Sarahi Padrón Salazar.

Todos os traballos que fan están dirixidos polo director, Ramón López Marín. No tempo de lecer, Ramón explica a estas alumnas paso a paso, como formar cada diseño.

Está resultando unha experiencia moi formativa e sobre todo, moi creativa.

Erica Esmoris visita o C.E.I.P. Valle Inclán de O Grove

O alumnado de 5º e 6º coñeceu en persoa á autora do libro Erin e o lobo

O pasado 24 de marzo de 2026, o alumnado de 5º e 6º de Primaria do C.E.I.P. Valle Inclán de O Grove recibiu a visita da escritora Erica Esmoris. A autora achegouse ao centro despois de que o colexio adquirira o seu libro Erin e o lobo para o alumnado. Foi unha mañá chea de curiosidades, historias e libros firmados.

Durante a charla, Erica Esmoris compartiu co alumnado como foi o proceso de escribir o libro. Contoulles que unha amiga súa, experta en lobos, axudouna a crear o personaxe do lobo azul, achegándolle información real sobre estes animais. Grazas á súa colaboración, a escritora puido darlle máis vida a un dos personaxes máis especiais da historia.

A escritora tamén revelou que, antes de dedicarse á literatura, o seu soño era ser veterinaria polo seu grande amor polos animais. Ademais, confesou que algúns dos seus libros están inspirados en persoas reais, como é o caso de Erin e o lobo, cuxa protagonista está baseada na súa propia filla Erin.

Ao rematar o encontro, Erica Esmoris despediuse do alumnado cun gran sorriso, e todos puideron marchar á casa cun exemplar do libro firmado pola propia autora.

Os alumnos de 5º e 6º de Primaria aprenden a tocar percusión no Valle Inclán

O profesor Didier visita o colexio para impartir unha clase especial de percusión

O pasado 2 de febreiro de 2026, o alumnado de 5º e 6º de Primaria do C.E.I.P. Valle Inclán viviu unha mañá moi especial. Un profesor de música chamado Didier achegouse ao centro para ensinarlles a tocar percusión. Os alumnos e alumnas formaron pequenos grupos e cada un foi descubrindo os ritmos e as posibilidades deste instrumento.

A actividade contou coa participación de toda a clase, e dous mestres traballaron xunto ao profesor Didier para atender ao alumnado durante a sesión. A dinámica de grupos pequenos permitiu que cada neno e nena puidese probar o instrumento e practicar diferentes ritmos dunha forma divertida e ordenada.

O profesor Didier non tardou en compartir un consello clave co alumnado: "Para tocar a batería tes que mirar ao fronte". Unha indicación sinxela pero moi importante para manter o ritmo e a concentración mentres se toca.

Ao rematar a sesión, o alumnado de 5º e 6º tivo que poñer en práctica todo o aprendido diante dos nenos e nenas de 1º de Primaria, que se achegaron para ver a actuación. Antes da chegada dos máis pequenos, os alumnos aproveitaron os últimos dez minutos para repasar e afinar o que ían mostrar.

Visita ao congreso FP Innova 2026 de escolares de 5º e 6º de Primaria

O alumnado de 5º e 6º de primaria visitaron, na Cidade da cultura de Santiago de Compostela, os proxectos innovadores presentados no Congreso FP Innova 2026.

O venres 26 de abril, o alumnado de 5º e 6º de primaria xunto cos seus mestres fixeron unha excursión a Santiago de Compostela. Primeiramente dirixíronse á Cidade da Cultura para visitar a exposición de FP Innova 2026 na que os estudantes de Formación Profesional presentaron proxectos innovadores de tecnoloxía, sostenibilidade e emprendemento.

Os escolares tiveron a oportunidade de participar en obradoiros de cociña, de estética e de robótica entre outros. Descubriron proxectos de drones, cestería, elaboración de alimentos e novas formas de aprendizaxe nun entorno creativo. 

Visitaron os stands da exposición, algúns dos que máis lle gustaron foron “o armario virtual”, no que participaron elexindo as prendas que lles gustaría levar; o de perruquería, no que se peitearon cunhas trenzas moi favorecedoras; os doces de Sandra, no que degustaron biscoitos… E moitos máis como os xogos de ciencia, o DJ, as chapas, os robots, o simulador do avión ou o robot axedrez… Os nenos e nenas quedaron entusiasmados e sorprendidos coa experiencia.

Ao rematar saíron da Cidade da Cultura camiñando cara Santiago. Pararon para comer á sombra dunhas árbores, para logo continuar a súa marcha ata a Praza do Obradoiro. Tamén aproveitaron para degustar un saboroso xeado e comprar un souvenir de recordo deste inolvidable día.