Kadiri Jiji la Dar es Salaam linavyoendelea kukua kwa kasi na kuwa miongoni mwa majiji yanayokua haraka zaidi barani Afrika, ukuaji huu unaweka shinikizo kubwa kwenye maarifa asilia ambayo kihistoria yamekua msingi wa jamii endelevu. Wazaramo ambao ndio wenyeji wa Dar es Salaam wanamaarifa muhimu ya jadi yanayoweza kusaidia kukabili changamoto mbalimbali za jiji, ikiwemo uharibifu wa mazingira, uhaba wa chakula bora na salama, na masuala ya afya ya umma. Hata hivyo, maarifa haya yanaendelea kusahaulika kadri makazi holela yanavyozidi kupanuka katika maeneo nyeti ya ikolojia kama vile mabwawa ya asili na ukanda wa pwani, na kuvuruga mifumo ya ikolojia iliyowahi kulilinda jiji. Sehemu kubwa ya maisha ya mijini Dar es Salaam—ikiwemo makazi, usimamizi wa taka, na huduma za afya—inaendeshwa kupitia mifumo isiyo rasmi ambayo mara nyingi haionekani kwenye mifumo ya rasmi ya mipango miji. Mradi huu unalenga kujenga daraja baina ya Wazaramo na maarifa yao yao kwa ujumla kwa kutumia Kijiji cha Makumbusho kama jukwaa la mawasiliano ya kisayansi na elimu kwa umma. Kupitia maonyesho yanayoongozwa na jamii, usimulizi wa hadithi kati ya vizazi, na warsha shirikishi, maarifa ya asili ya Wazaramo yatahuishwa na kushirikishwa kwa hadhira pana zaidi ya jiji la Dar es Salaam.